1 Nap’an nike th’ab piyu Israel fare lul’ ni Jordan nga baraba’ me ga’ar SOMOL ngak Joshua, 2 “Mmel’eg ragag nge l’agruw e pumo’on, nra reb e ganong ma ta’reb e pumo’on ni ngam fek riy, 3 me lungum ngorad, ‘Mu feked ragag nge l’agruw e malang u lukngun e lul’ ni Jordan ko chigin’en ni duwgil fapi prist riy; nge un ngomed, mi gimed tay nga but’ ko gin bay mu pired riy e nep’ ney.’ ”

4 Ma aram me pining Joshua fa ragag nge l’agruw i pumo’on nike mel’eg, 5 me ga’ar ngorad, “Mmarod ngalan e lul’ ni Jordan, ngam m’onod rok fare Kahol ko M’ag rok SOMOL ni Got romed. Ra bigimed ma nge tay reb e malang nga daken pon nge fek, nra reb e malang ma fan ngak reb e genong nu Israel. 6 Pi malang ney e nge puguran ngak e girdi’ e n’en nike rin’ SOMOL. Fa’anra yan i daken bi’id ni fith pifakmed ngomed fan e pi malang ney 7 ma nga mogned ngorad ni ran ko lul’ ni Jordan e tal ndaki yan nnap’an ni yib fare Kahol ko M’ag rok SOMOL i th’ab e re lul’ nem. Pi malang ney e bay i par ni gubin ngiyal’ nib puguran ngak piyu Israel.”

8 Me rin’ fapi pumo’on e tin keyog Joshua ngorad. Miyad fek ragag nge l’agruw e malang u lukngun e lul’ ni Jordan, ni bod rogon ni yog SOMOL ngak Joshua, nra reb ma fan ngak reb e ganong nu Israel, nge un ngorad ko gin nranod ra pired ngay, mranod ra ted e pi malang nem ngaram. 9 Miki tay Joshua ragag nge l’agruw e malang nga lukngun fare lul’ ni Jordan ko chigin’en ni duwgil fapi prist riy ni kar mat’egned fare Kahol ko M’ag. (Pi malang nem e kabay u rom.) 10 Me par fapi prist ni yad ba sak’iy u lukngun e lul’ ni Jordan nge mada’ ko ngiyal’ ni kan rin’ urngin e tin ni yog SOMOL ngak Joshua ni nge weliy ngak e girdi’ ngar rin’ed. Irera’ e n’en ni yog Moses ni ngan rin’.

Me gurnag piyu Israel yad ngar th’abed e lul’ nga baraba’. 11 Ma nap’an nra thapgad nga baraba’ ni yad gubin, me m’on fare Kahol ko M’ag rok SOMOL nge pi prist nga fin i lay e girdi’ nu Israel. 12 Pi pumo’on ko genong rok Ruben nge Gad, nge baley ko ganong rok Manasseh e ra m’onod rok e girdi’ ngar th’abed e lul’ nga baraba’, ni kar fal’eged rogorad ni fan ko mael, ni bod rogon nike yog Moses ngorad. 13 U p’eowchen SOMOL e gonap’an 40,000 e pumo’on ni kar fal’eged rogorad ni fan ko mael e ra th’abed e lul’ nga baraba’ nga daken bangi tafelfel’ nib chugur nga Jeriko. 14 N’en ni rin’ SOMOL e rofen nem e gagiyegnag piyu Israel ngar tedfan Joshua ni ir be’ nib ga’. Miyad tayfan u n’umngin nap’an e yafos rok, ni bod rogon ni ur tedfan Moses.

15 Me ga’ar SOMOL ngak Joshua, 16 “Mog ngak fapi prist ni yad be mat’nag fare Kahol ko M’ag ngarbad u lan e lul’ ni Jordan nga talang.” 17 Me rin’ Joshua ni aram rogon. 18 Ma nap’an ni yib fapi prist ko gin nib mlik nga daken mirichlen e lul’, ma aram mfini yan e ran u lan fare lul’ bayay, nge sug ngalang.

19 I th’ab piyu Israel e lul’ ni Jordan nga baraba’ ko rofen ni ragag ko bin m’on e pul, mrabad ra pired nga Gilgal, ni bay ko ngek u Jeriko. 20 Me tay Joshua fa ragag nge l’agruw i malang u rom nni fek u Jordan. 21 Me ga’ar ngak e girdi’ nu Israel, “Galufen nem e ra fith pifakmed ngomed komang e n’en ni fan e pi malang ney, 22 ma ngmogned ngorad murung’agen yu Israel nra th’abed e lul’ ni Jordan nranod u daken e but’ nib mlik’ nga baraba’. 23 I SOMOL ni Got romed e chuweg e ran u lan e lul’ ni Jordan nge mlik’ nge mada’ ko ngiyal’ ni kam th’abed nga baraba’, ni bod rogon ni mliknag lan fa gi day ni fithingan e Red Sea ngomed. 24 Urngin e girdi’ nu fayleng e bay ra nanged gelngin SOMOL ni bochan e ren’ey, ma bay um tedfan SOMOL ni Got romed ndariy n’umngin nap’an.”