1 Ma aram me yog SOMOL ngak Joshua 2 ni nge ga’ar ngak e girdi’ nu Israel, “Mu mel’eged fapi binaw ni tagil’ e ayuw ni gog ngak Moses ni nge weliy murung’agen ngomed. 3 Fa’anra li’ bigimed be’ nge yim’ ni kal riy, me yan e ngaram nge mil rok fa’en ke yib ni nge falbiy. 4 Rayag ni nge mil nge yan nga reb e pi binaw ney, nge yan nga tagil’ e pufthin riy u langan e garog ko fare binaw, nge weliy e tin nike buch rok ngak e pi tayugang’. Ma aram miyad ra pag nge yan ngalan fare binaw miyad pi’ bang ngak ni nge par riy, ya nge yag ni nge par u rom. 5 Fa’anra lek fa en ke yib ni nge filbeyen fare mo’on ngaram, ma girdi’ ko fare binaw e thingar dab ra pi’ed fare mo’on nga pa’ fa’anem. Thingar ra ayuweged ni bochan e kal riy nge li’ facha’ ma gathi bochan e ke damumuw. 6 Rayag ni nge par u lan fare binaw nge taw ko ngiyal’ ni kan pithig e oloboch rok u mit e girdi’ ni yo’or, nge ngiyal’ nike yim’ e re mo’on ni ir e Prist ni Th’abi Ga’. Ma aram e rayag ni nge sul fare mo’on nga tabnaw ko binaw rok ko gin nike mil riy.”

7 Ere ba’ ni ngal ko Jordan e ra mel’egged yu Kedesh u lan yu Galilee, ni go’ burey u lan yu Naftali, ngu Shekem ni go’ burey u lan yu Efraim, nge Kiriath Arba (ni aram yu Hebron) ni go’ burey u lan yu Judah. 8 Nge ba’ ni ngek ko Jordan u Jeriko e ra mel’eged yu Bezer u lan e binaw ko ganong rok Ruben, nge Ramoth u Gilead ni bay ko ganong rok Gad, ma Golan u Bashan ko ganong rok Manasseh. 9 Irera’ e pi binaw ni tagil’ e ayuw nni mel’eg ni fan ngak gubin e girdi’ nu Israel nge demturug be’ nu bang nma par u fithik’rad. Demturug be’ ni kal nge li’ be’ nge y’im, ma rayag ni ngan ayuweg u rom u pa’ fare mo’on ni be mogow ni nge filbeyen; dabyag ni ngan li’ u rom nge yim’ nge taw nga nap’an ni kan pufthinnag.