3
Gechig, kalngan’, nge l’agan’
1 I gag e cha’ ni gumnang e gechig nma pi’ Got.
2 I pi’eg nga’ar i yan nga to’ar nga fithik’ e lumor
3 Me toyeg i toyeg ko dumow ndariy bochi marunguy rok.
4 Me pageg ni kug maad’ad ma ke t’et’ar yileg.
5 I ning e mab ngog nggu par u kalbus u fithik’ e gafgow nge amith.
6 I gelfen ngog ni nggu par u fithik’ i talumoren e yam’.
7 Ke michgiyeg ko chen; I gag ba kalbus ni dariy liben mug thay.
8 Gu yor nag e ayuw ngalang, me siyeg Got ni nge motoyil;
9 U gu wan ni gu be thigthig ma yungi rungrung ni malang e be ning e wo’ ngog u gubin yang ni gu ra cheal ngay.
10 I son nageg ni bod ba gamanman ni bear; me og ngog ni bod ba layon.
11 I tulfeg nga wuru’ e kanawo’, nge popofeg ni yoch yang, me pageg nge yan.
12 I girengiy e gat’ing rok me paluweg ngog e pi gan e gat’ing rok.
13 I pag e pi gan e gat’ing rok nge aw ngog nge rich nga’ar.
14 I minmin e girdi’ nga ya’ag ni polo’ e rran; ni kug mang ba makak’ar ngorad ni yad gubin.
15 Ggan nge garbad rog ni pi’ ngog e bilig t’ay e gafgow.
16 I gichgichiy owcheg u fithik’ e but’ nge m’ing nguweleg u daken e malang.
17 Gu pagtalin rogoy ni yima par ndariy e m’ar nge rogoy ni yib gapas nge uw rogon ma yi ba felfelan’.
18 Daki n’uw nap’an ni nggu par ni gubfos; ya l’agan’ rog ngak SOMOL e dakriy.
19 Lanin’ug ko amith rog, nge gag ni dakriy e tabnaw rog, e ba yub nib mo’oy.
20 U gu par ni yiggu be leamnag, mi ri parde’ lanin’ug.
21 I sul e l’angan’ ngog nap’an ni gu leamnag e ren’en ni ba’aray:
22 Fare t’ufeg rok SOMOL ni dabi m’ay nge marunguy rok e ku be ul ul i yan,
23 Nib k’akling ni bod e kadbul, nib mich ni bod e yal’ nra for ngalang.
24 I SOMOL e kemus ni ir e urngin ban’en ngog, are ir e kug tay e pagan’ rog nga daken.
25 I SOMOL e ba gol ko pi’in ni karted e pagan’ rorad nga daken,
26 Ere rib fel’ ngodad ni ngu’ud son gad u fithik’ e gumaen’, ni ngad son niged ni nge mat’aw nagdad ngak.
27 Rib th’abi fel’ ni ngad filed e re guma’ ney ni kagdad ppagel.
28 Nap’an ni gadad ra gafgow, ma thingar da pired nga but’ u bang ni go’ gadad nib math gulngudad u fithik’ e gumaen’;
29 Thingar da siro’gad ni kadm’ing gad, ya kuramoy ban’en nra lagan’dad ngay.
30 Yug aram rogon e parde’ nge thin nib wupwup, ma thingarda feked ni gubin.
31 I Somol e rib marunguy ma dabi n’ag dad ni manemus.
32 Yug bay i feke kireban’ i yib ngodad, machane t’ufeg rok ngodad e rib mich ma ba gel.
33 Dar ma felfelan’ ngay ni nge k’aring e gafgow ara amith ngodad.
34 I Somol e manang e ngiyal’ nike parde’ lanin’dad u kalbus;
35 Ma manang e ngiyal’ ni kan siyeg rodad mat’awdad ni pi’ ngodad;
36 Nap’an ni yira chefeg ni daki yal’uw e tin nib mat’aw ni ngan rin’ u kort ma manang.
37 Tiriggil rok Somol e gubin ngiyal’ nma yan ni bfel’ rogon ni dabiyag i thilyeg.
38 Fel’ fa kireb e ta’reb rogon, nma m’ug fe buch ni ir e keyog.
39 Mangfan nap’an ni yira gechig nagdad ni bochan e denen rodad ma gadad gun’gun’?
40 Ngad fal’egned i yaliy e pi kanawo’ rodad ma gadad sul ngak SOMOL.
41 Ngad binged lanin’dad ngak Got nu tharmiy ma gadad meybil, ni ngad ga’ar gad,
42 “Kug denen gad ma kug togopluwgad, me gur SOMOL, e dawor mu n’ag fan romad.
43 “Kam tulufmad kam thang e pogofan romad; wurengan’ rom e ke mith nga fon e dumumuw rom,
44 Nga fon bang i manilang ko dumumuw ni kay gi dubu’ag ni dabiyag ni nge bugor e meybil romad nga barba’.
45 Kam taymad ni bod ba modo’ ko fayleng.
46 “Urngin e pi to’ogor romad ma yad be yog e thin nib mkunkun ngomad ma yad be moning nagmad.
47 Kug warod u fithik’ e riya’ nge bilig tay e gafgow; ma gamad be par u thatharan e riya’ nge marus.
48 Be map’ ni lul’ e lu’ nu owcheg ko gafgow rok e girdi’ rog.
49 “Lu’ag e bayi map’ ni bod e lul’ ni dabi tal
50 Nge taw ko ngiyal’ nike sap SOMOL u tharmiy nga but’ ke guy dad.
51 I yor lanin’ug u nap’an nug gguy e n’en ni kan rin’ ngak e ppin ko fare binaw.
52 “Kug ma’achthal ni bod ba arche’ u pa’ e pi to’ogor ni dariy tapgin ni ngar fananikayed gag.
53 Ra thuryed gag ngalan ba low ni ku gubfos miyad ning ngab malang.
54 I chugur ni nge chap e ran u dakenag, mu gu leamnag nike chugur e yam’.
55 “Mug yor ngalang ngom, SOMOL, u rom u t’ay e low.
56 Ma nap’an e gu wenig nag ngom ni ngam rung’ag e meyor rog, ma ga rung’ag.
57 Ma ga fulweg lamag ngamog ngog ni dab kugrus.
58 “Somol, gur e mub mu lageg, ma ga ayweg e pogofan rog.
59 Mu fol ngog; ya gamnang e kireb ni kan rin’ nib togopluw ngog.
60 Gamnang rogon e pi to’ogor rog ni yad be fananikayeg ma yad be makath nageg.
61 “SOMOL, kam rung’ag oren e morugthin ni karted ngog; me gur e gamnang urngin e makath rorad.
62 Polo’ e rran ni yad be weliy murung’ageg ma yad be puruy’ nag e n’en ni ngar rin’ed ngog.
63 Yug ra kadbul nge mada’ ko nep ma yad be gosgos nigeg.
64 “SOMOL, mu gechig nagrad ko tin karrin’ed.
65 Mu kirebnag wa’athrad mag suguyrad ko buchbuchan’!
66 Ngam tulufrad ngam thirifrad u daken e fayleng!”
DRAFT VERSION — Proofreading in progress