1 I motochiyel SOMOL ngak Moses 2 ni nge pi’ e pi gafal ni ba’aray ngak Aron nge pifak ni pumo’on nge ngak urngin e girdi’ nu Israel. 3-4 Be’ nu Israel nra li’ ba garbaw nge yim’ ara ba saf, fa ba kaming nge pi’ ni maligach ngak SOMOL u yug bang ni gathi langan e mab ko fare Tent u p’eowchen SOMOL, e aram e ke th’ab e motochiyel. Ke pu’og e racha’, ma aram e dabki mang reb e girdi’ rok Got. 5 Fan e biney e motochiyel e fapi girdi’ nu Israel e thingar rfeked i yib ngak SOMOL fapi gamanman ni ur li’ed u lan e tafelfel’. Thingar ra feked i yib ngak e prist nga langan e mab ko fare Tent ngar li’ed fapi gamanman ni bod e maligach nma gapasnag thilin Got nge girdi’. 6 Ma fare prist e nge pag e racha’ nga l’agruw raba’ fare altar u langan e mab ko fare Tent me urfiy e mam ni nge wereg bon gol’ochngin ni rib fel’ u wan’ SOMOL. 7 Fapi girdi’ nu Israel e thingar yul’yul’gad ngak SOMOL ya nga dab kur li’ed e gamanman u lan e yung i tafelfel’ ni nge mang maligach ko fare kaming ni mo’oniyan’. Girdi’ nu Israel e thingar ra folgad pi gafal ney e chiney i yan ngaram.

8 Demturug be’ nu Israel ara yug be’ u reb e nam ni be par u fithik’ piyu Israel nra pi’ ba maligach ni mo’oruf ara yug reb e maligach, 9 ni aram e ke ognag ngak SOMOL u bang ni gathi langan e mab ko fare Tent e yira n’ag ndabki mang reb e girdi’ rok Got.

10 Fa’anra kay be’ nu Israel ara be’ u bang nma par u fithik’ yu Israel e ufin ni kabay e racha’ u fithik’, mra togopluw SOMOL ngak ma dabki tay fa’anem ni reb e girdi’ rok. 11 Yafos ko gubin ban’en nib fos e bay u fithik’ e racha’ riy, ma arfan ni SOMOL e keyog ni urngin e racha’ ma ngan pu’og nga daken fare altar ni nge chuweg e denen ko girdi’. Racha’, ni ir e yafos, e ma chuweg e denen. 12 Aram fan nike yog SOMOL ngak e girdi’ nu Israel nge girdi’ nu bang ni yad be par u fithik’rad ndab ra ked e ufin ni kabay e racha’ u fithik’. 13 Fa’anra kol be’ nu Israel ara be’ nu bang nma par u fithik’ yu Israel ba gamanman fa ba arche’ nib be’ech, ma thangri pu’og racha’en nga but’ me tharay ko but’.

14 Yafos ko gubin ban’en nib fos e bay u fithik’ e racha’, aram fan ni yog SOMOL ngak e girdi’ nu Israel ni dab ra ked demturug e mit i ufin ni kabay e racha’ u fithik’, ma cha’ nra rin’ e dab kun tay ni reb e girdi’ rok Got. 15 Ma demturug be’, nu Israel fa be’ nu bang nma par u fithik’rad, ni kay ufin ba gamanman ni yim’ ni rogon e yam’ fa li’ ba gamanman ni malboch, ma thingari luknag e mad rok, me maluk, me son nge mada ko blayal’ ma aram fini be’ech. 16 Machane fa’anra dabi rin’, ma ra gafgow u wanegan nra yib ngak.