1 Me ere chuw Jesus u rom nge sul ko binaw rok, ni yad pi gachalpen. 2 Ma nap’an ni taw ko Sabbath me tabab ko machib u lan tafen e mu’ulung. Ma bo’or e girdi’ ni ur moyed u rom, ma fa’an rrung’aged e machib rok miyad gin ngak ni yad gubin. Miyad fithrad ni lungurad, “U uw e nang e cha’ney urngin e pin’ey riy? U uw e fek e gonop rok riy? Ma uw rogon ni be ngongliy e pi maang’ang nem? 3 Gathi ir fare daiksang ni fak Maria, ma walagen James, nge Joses, nge Judas, nge Simon? Ma gathi ma par pi walagen ni ppin u roy?” Ma aram mra dabuyed ni ngar motoyilgad ngak.

4 Me ga’ar Jesus ngorad, “Be’ nib profet e gubin yang ni yima tayfan riy, ma kemus ni girdi’ nu lan binaw rok, nge girdi’en, nge girdi’ nu tabinaw rok e der tayfan.”

5 Ma aram e dakiyag ni nge ngongliy e maang’ang u rom, ma kemus ni in e girdi’ e tay pa’ nga dakenrad nge gol nagrad. 6 Me ri gin ngorad ni bochan e de michan’rad ngak.

Ma aram me yan Jesus ngalan urngin e nochi binaw nib chuchugur ngaram ni be machibnag e girdi’. 7 Ma aram me ulunguy Jesus fa ragag nge l’agruw i gachalpen me l’oegrad ngranod ni yad lal’agruw. Me pi’ mat’awrad nrayag ni ngar tulufed e mo’onyan’, 8 me yog Jesus ngorad ni ga’ar, “Ngam marod ko milekag ndariy ban’en ni ngam feked, kemus ni sog e ngam feked; ma dab mu feked e ggan, nge tutuw nma fek e pi’in nma man ban’en, ma dab mu ted e salpiy ngalan e bel ko mad romed. 9 Mi gimed yin’ e sus, ma dab mu feked reb e kenggin e mad ni ngam thiliyeged ko bin ni bay u dakenmed.” 10 Miki yog ngorad ni ga’ar, “Fa’an gimed ra taw nga reb e binaw mi gimed par rok girdi’en e re tabinaw ni kar feked gimed nga taferad nge mada’ ko ngiyal’ ni ngam chuwgad ko fare binaw. 11 Ma fa’anra mmarod ngabang ndabun e girdi’ riy ni kam marod ngay fa daburad ni ngar motoyilgad ngomed, mi gimed chuw riy, mi gimed rurug e rifrif u emed nge chuw e fiyath riy, ni aram e gimed be dag ngorad nib kireb e tin ni kar rin’ed!”

12 Ma aram mranod ngu’ur machib niged i yan ndabisiy ni nge pi’ e girdi’ keru’rad ko denen ni yad be rin’. 13 Ma bo’or e mo’onyan’ nra tulufed ngar chuwgad u fithik’ e pi’in kar yinggad ngorad, ma bo’or e girdi’ ni yad bm’ar nra liyfed e gapgep nga dowrad ngar golgad.

14 Me rung’ag Herod ni Pilung* HEROD NI PILUNG: Herod Antipas, ni ir e ma gagiyeg u Galile. murung’agen e pin’ey, ya ke wear murung’agen Jesus ni yigo’o kan nang i yan. Me ga’ar boch e girdi’, “I John ni i tawfe e ke fos ko yam’! Aram fan ni bay gelngin ni nge ngongliy e maang’ang.”

15 Machane me ga’ar boch e girdi’, “I Elijah.”

Ma boch e girdi’ e lungurad, “Ir reb e profet ni bod reb fapi profet ni kakrom.”

16 Ma nap’an ni rung’ag Herod murung’agen ni aram rogon me ga’ar, “I ir fa’anem i John ni i tawfe nike fos ko yam’, ni fa’an gog faram ni ngan th’ab k’angan!” 17 Herod e ir e yog ni ngan kol John ngan m’ag nga nin’ nga kalbus. I rin’ Herod ni aram rogon ni bochan Herodias nike leengiy, ni leengin walagen ni pumo’on, ni aram Filip. 18 Ya yigi i yog John nma tawfe ngak Herod ni ga’ar, “De mat’aw ni kam leengiy leengin walagem!”

19 Me aw John nga laniyan’ Herodias, me finey Herodias ni nge guy rogon ngan li’ John ngem’, ma dabiyag ni nge rin’ ni bochan Herod. 20 Mi Herod e be tamdag ngak John, ya manang ni John e be’ ni bfel’ ma ba thothup, ma aram me tay ndab nli’ ngem’. Ba’adag Herod nma motoyil ngak John, ni yugu aram rogon ni gubin ngiyal’ nra motoyil ko tin ni be weliy John me yib e marus ngak.

21 Me yan i fel’ rogon Herodias ba ngiyal’ ko chirofen ni ngan madnomnag e ngiyal’ nni gargeleg Herod riy, me ngongliy Herod ba madnom nge pining e pi tolang ko am ngay, nge pi tolang ko salthaw, nge ku boch e girdi’ ni yad ba ga’ ko nug nu Galile. 22 Ma nap’an ni yib bochi rugod ni fak Herodias† bochi rugod ni fak Herodias; boch e babyor e bay riy ni bochi rugod ni fak Herodias. nge yib i churu’ me felfelan’ Herod ngak nge pi’in ni piningrad Herod ni ngar uned ngak ko madnom. Me ga’ar Herod ni Pilung ngak fachi pin, “Mang e n’en ni ga ba’adag ni nge yag ngom? Ya demturug e n’en ni ga ba’adag mrayag ni gu ra pi’ ngom.” 23 Me ri micheg Herod ngak ni ga’ar, “Kari gu micheg ngom ni demturug e n’en ni ga ra yog ni nggu pi’ ngom, ma gu ra pi’, ni mus nga baley e gin ni gu be gagiyegnag!”

24 Ma aram me yan fachi pin i fith e chitiningin ni ga’ar, “Mang e n’en ni ga ba’adag ni nggu ning?”

Me fulweg ngak ni ga’ar, “Mu ning lolugen John nma tawfe.”

25 Ka chingiyal’ nem me sul fachi pin ngak Herod ni Pilung me yog ngak ni ga’ar, “Gu ba’adag ni ngam pi’ lolugen John nma tawfe ngog e chiney ni kan tay nga lan e plet!”

26 Ma aram me ri kireban’ Herod ni Pilung; machane dabkiyag nra t’ar fen fachi pin ni bochan e thin ni yog ngak u p’eowchen urngin e pi’in ni piningrad ni ngar uned ngak ko madnom. 27 Ma ka chingiyal’ nem me l’oeg fare pilung reb e salthaw u fithik’ e salthaw ni yad ma matanagiy ni nge yan i fek lolugen John i yib ngak. Me ere yan i th’ab k’angan u kalbus; 28 me fek fare llug i yib nike tay nga lan e plet nge pi’ ngak fachi pin, me pi’ fachi pin ngak e chitiningin. 29 Ma nap’an ni rung’ag pi gachalpen John murung’agen e n’en ni kan rin’ ngak John, ma aram miyad yib ngar feked downgin ngranod ra chibgiliyed ko gin ni yima chibgiliy e yam’ riy.

30 Me sul fapi apostel ngak Jesus, miyad yog ngak e tin ni kar rin’ed nge tin ni kar machib niged ngak e girdi’. 31 Ma bo’or e girdi’ ni be yib ma tin ni be yan ndariy e ngiyal’ nrayag ni nge abich Jesus nge pi gachalpen riy. Me ere ga’ar Jesus ngorad, “Mmarod ngdarod ngabang ndariy be’ riy nga yugu mu toffangad bochu’uw.” 32 Miyad af ngalan e bowoch ni go’ yad ngar leked bangi yan’ ndariy be’ riy.

33 Ma pire’ e girdi’ ni guyrad ni ka ranod, min poyrad; me mil e girdi’ u gubin e binaw ngranod u arow ngranod ra son gad ko gin ni be sor Jesus nge pi gachalpen ngay. 34 Ma nap’an ni chuw Jesus u bowoch nge yan nga daken e binaw, me guy e girdi’ ni pire’ ni pire’, me ri taganan’ ngorad, ya yad bod e saf nde moy e en nma gafaliyrad rorad. Ma aram me tabab i machibnag bo’or ban’en ngorad. 35 Ma nap’an nike chugur ni nge aw e yal’, me yib pi gachalpen ngak me lungurad, “Chiney e kari gonowrug, ma gin’ey e danir par riy. 36 Mu non ngak e girdi’ ngranod ko yungi n’en nib chugur ngaray ni yibe par riy yibe woldug, nge pi binaw nib chugur ngaray ngar chuw’iyed ban’en ngar ked.”

37 Me fulweg Jesus ni ga’ar ngorad, “Gimed e mpi’ed ban’en ngorad ngar ked.”

Me lungurad ngak, “Gab adag ni gamad ra yan gu chuw’iyed urngin e flowa nrayag u l’agruw mir’ay yang e salpiy ni wasey nib silber‡ SALPIY NI WASEY NIB SILBER: Ba salpiy ni wasey nib silber e pulwoy ko maruwel u reb e rran (mu guy e Mat 20:2.) nggu pi’ed ngorad ngar ked?”

38 Ma aram me fithrad Jesus ni ga’ar, “In yal’ e flowa ni bay romed? Mu guyed ngam nanged.”

Ma nap’an nra nanged urngin me lungurad ngak, “Lal yal’ nge l’agruw e nig.”

39 Me yog Jesus ngak pi gachalpen ni ngrogned ngak urngin e girdi’ ngar yuulunggad ngar pired nga but’ nga daken e pan nib galunglung. 40 Me par fapi girdi’ nga but’ ni kar yuthalgad ni yad yu ulung ni yu ra’ay nge yu wugem reb e ulung. 41 Me fek Jesus fa lal yal’ i flowa nge fa gali nig, me sap ngalang, me pining e magaer riy ngak Got. Mi i t’et’ar fa yu yal’ i flowa ngi i pi’ ngak pi gachalpen ngar f’othed ko girdi’. Ma ku errogon fa gali nig ni ki t’et’ar nge pi’ ngorad ngar f’othed ko girdi’ ni urngin. 42 Ma yad urngin nra ked ngar fosgad ngay. 43 Me kunukunuy pi gachalpen Jesus e flowa nge nig ndaki m’ay i kay me gaman ragag nge l’agruw e dug riy. 44 Mu fithik’ fapi girdi’ nra ked fa flowa e lal e biyu’ e pumo’on ni ur moyed riy.

45 Ka chingiyal’ nem me yog Jesus ngak pi gachalpen ni ngar afgad nga bowoch ngar m’onod rok Jesus nga Bethsaida, ni bay nga baraba’ fare lipath, me yog ngak fapi girdi’ ni aram urngirad ni ngar sulod. 46 Ma nap’an ni mu’ Jesus i fangichiyrad me yan nga daken bburey ni nge meybil. 47 Ma nap’an ni aw e lumor ma ke taw fare bowoch nga lukngun e lipath, ma bay Jesus u daken e binaw ni go ir. 48 Me guy pi gachalpen ni kar gafgowgad ko maman, ya yad be yan nga mit e nifeng;§ yan i thiliyegrad; ara yib ngorad. me bingiyal’ u thilin e dalip nge nel’ e kolok ko tanirran me yib ngorad ni be yib u daken e ran. Me yan ni nge yan i thiliyegrad, 49 machane miyad guy Jesus ni be yib u daken e ran, miyad finey nib kan, miyad tolul. 50 Ya fa’anra guyed ni yad gubin miyad tamdag ngak.

Ka chingiyal’ nem me non Jesus ngorad ni ga’ar, “Mu pagan’gad, ya gag, dab kum tamdaggad!” 51 Me af ngorad nga bowoch, me mocha’ e nifeng. Me gin owchen pi gachalpen ko n’en ni kar guyed, miyad par ni kari balyangan’rad, 52 ya de yag ni ngar nanged fan fa yu yal’ i flowa ni yodoromnag Jesus; ya de pat nga lanin’rad.

53 Miyad th’ab e lipath ngarbad nga Gennesaret, miyad yuluy e bowoch u rom. 54 Ma nap’an nra afgad u bowoch nga talang, ma ka chingiyal’ nem me poy e girdi’ Jesus. 55 Me mil e girdi’ u lan e binaw i yan ni yad be kunukunuy e pi’in nib m’ar ngu’ur gochowriyed yad i yib ko yu yang i n’en ni kar rung’aged ni bay Jesus riy, ni kan tayrad nga daken e wormel. 56 Ma gubin yang ni i yan Jesus ngay, ni lan e pi binaw ni ba’achig, nge pi binaw ni ba ga’, nge yungi n’en ni kan par riy yibe woldug e i gochowriy e girdi’ e liliy rorad riy nga lukngun e binaw, miyad wenig ngak Jesus ni nge pag e pi’in yad mm’ar nga yugu ra mathgad nga taban e thal ni wuru’ e mad rok u but’; ma urngin e pi’in nra mathgad ngay e yigo’o ra golgad.