1 De yo’or e rran nga tomuren miki mu’ulung boch e girdi’ ni pire’ ni pire’. Ma nap’an ndakuriy ban’en ni yad ra kay, me pining Jesus pi gachalpen me ga’ar ngorad, 2 “Ke taganan’ug ko pi girdi’ ney, ya nga dalip e rran ni kar pired rog, ma dakuriy ban’en ni yad ra kay. 3 Ma fa’anra gu pagrad ngar sulod nga taferad ni yad ba yam’ ko bilig, ma yad ra aw nga but’ u kanawo’, ya boch i yad e ba orel e kanawo’ nrabad riy.”

4 Me ga’ar pi gachalpen, “U taman yang u daken e re ted ney e rayag ni nge pir’eg be’ e ggan riy nra gaman e pi girdi’ ney ni urngin riy?”

5 Me fithrad Jesus ni ga’ar, “In yal’ e flowa ni bay romed?”

Miyad fulweg ni lungurad, “Medlip yal’.”

6 Me non Jesus ngak fapi girdi’ ni aram urngirad ni ngar pired nga but’. Me fek fa medlip yal’ i flowa, me pining e magaer riy ngak Got, me t’et’ar nge pi’ ngak pi gachalpen ni ngar f’othed ko girdi’; miyad rin’ ni aram rogon. 7 Ma ku bay in e nig ni ba’achig rorad. Miki fek Jesus me pining e magaer ngak Got ni bochan fapi nig, nge mu’ me yog ngorad ni ngkur f’othed fapi nig ko girdi’. 8 Miyad kay ni yad urngin ngar fosgad ngay — ma gonap’an e aningeg biyu’ e re girdi’ nem u gubin. 9 Me kunukunuy pi gachalpen e flowa nge nig ndaki m’ay i kay me gaman medlip e dug riy. Me pag Jesus fapi girdi’ ngar weargad, 10 ma ka chingiyal’ nem me af Jesus nge pi gachalpen nga bowoch miyad yan ko nug nu Dalmanutha.

11 Me yib boch e Farise miyad tabab ngak Jesus ko tugthin; ya yad ba’adag ni ngar ninged e kanawo’ ngak ko thin, ma aram miyad wenig ngak Jesus ni nge ngongliy reb e maang’ang ni nge mang pow riy ni n’en ni be rin’ e mm’agan’ Got ngay. 12 Me ri ga’ar Jesus, “Ah”, nike kireban’, me ga’ar, “Mangfan e girdi’ ko bin daba’ e rran ni yad be mogow maang’ang? Dab ndag ngak e pi girdi’ ney e re pow ni be’er ni gimed be ning!”

13 Ma aram me pagrad nge af nga bowoch nge th’ab nga baraba’ e lipath.

14 Ma aram e ke pag talin pi gachalpen Jesus ni ngar feked boch e flowa, ere ri ta’ab yal’ e flowa ni bay rorad u bowoch. 15 Me tay Jesus chiylen ngorad ni ga’ar, “Mu ayuweged gimed rok e is ko pi Farise nge is rok Herod.”

16 Miyad weliy rorad ni be lungurad, “Keyog ni aram rogon ni bochan e dariy e flowa rodad.”

17 Ma manang Jesus e n’en ni yad be weliy rorad, me fithrad ni ga’ar, “Mangfan ni gimed be weliy romed ndariy e flowa romed? Dawor mu nanged fan? Er feni man lanin’med? 18 Damur guyed ban’en ni bay lan owchemed? Ma damur rung’aged ban’en ni bay lan telmed? Kam paged talin 19 fa ngiyal’nem ni gu t’et’ar fa lal yal’ i flowa ni nge kay fa lal i biyu’ i girdi’, ma in dug e tin ni mu kunukunuyed ndaki m’ay i kay?”

Me lungurad ngak, “Ragag nge l’agruw.”

20 Me fithrad Jesus ni ga’ar, “Ma fa ngiyal’nem ni gu t’et’ar fa medlip yal’ i flowa nge kay fa aningeg biyu’ i girdi’, ma in dug e tin ni mu kunukunuyed ndaki m’ay i kay?”

Miyad fulweg ngak ni lungurad, “Medlip dug.”

21 Me fithrad ni ga’ar, “Ere ku dawor mu nanged fan?”

22 Marbad nga Bethsaida, me fek bogni’ be’ nib mo’on nib malmit i yib ngak Jesus, miyad wenig ngak ni nge math ngak. 23 Me kol pa’ fare malmit i yan nga wuru’ fare binaw, me thuwag e nguboch ngalan mit me tay pa’ nruw raba’ nga daken me fith ni ga’ar, “Kam guy ban’en fa?”

24 Me pug fare malmit owchen ngalang me ga’ar, “Gu be guy e girdi’ ni yad be yan, machane yad bod ya’an e gek’iy ni be yan.”

25 Me tay Jesus pa’ nruw raba’ bayay nga daken lan mit facha’. Me changar fa’anem nike uthum e changar rok, me sul e changar rok ngarogon, me guy gubin ban’en nike motabgol u owchen. 26 Me yog Jesus ngak ni nge sul nga tafen me ta’chiylen ngak ni ga’ar, “Dab kum sul ngalan binaw.”

27 Me yan Jesus nge pi gachalpen ko fapi binaw ni bay u lan yu Cesarea Filippi. Ma nap’an ni yad be yan me fith Jesus ngorad ni ga’ar, “I gag mini’ ni be yog e girdi’?”

28 Miyad fulweg ngak ni lungurad, “Be ga’ar boch e girdi’ e gur John ni i tawfe, ma boch e be ga’ar e gur Elijah, ma boch e be ga’ar e gur reb fapi profet.”

29 Me fithrad ni ga’ar, “Ma gimed e be lungumed e gag mini’?”

Me fulweg Peter ngak ni ga’ar, “I gur fare Messiah.”

30 Me ning Jesus chiylen ngorad ni ga’ar, “Dab mogned gag ku be’.”

31 Ma aram me tabab Jesus i weliy ngak pi gachalpen ni ga’ar, “En ni Fak e Girdi’ e thangri ga’ ba gafgow ni nge tay, ma pi’in pi’ilal, nge pi tolang ko prist, nge pi tamchib ko Motochiyel e bay ra n’iged. Ma bay nli’ ngem’, ma bayi pag dalip e rran min faseg ko yam’.” 32 Me yog e re bugithin ney ngorad nrib tamilang. Me fek Peter Jesus nga orel rorad me tabab ngak ko puwan’. 33 Machane me cheal Jesus u luwan, me changar ngak pi gachalpen, me puwan’ ngak Peter ni ga’ar, “Satan, mu chuw rog. Ya leam ni ga be tay e rogon e leam nma tay e girdi’, ma gathi rogon e leam nma tay Got!”

34 Me pining Jesus fapi girdi’ ni aram urngirad nge pi gachalpen ngarbad ngak, me ga’ar ngorad, “Fa’anra ba’adag be’ ni nge un ngog, ma thangri pag talin ir, nge fek e kuruth rok, nge lekeg. 35 Ya en nra finey ni nge ayuweg e pogofan rok e ra thay rok; ma en nra thay e pogofan rok ni bochag nge bochan e Thin Ni Bfel’ e ra fos. 36 Be mang e ra fel’ rogon be’ riy ni fa’anra yag ngak e re fayleng ney ni polo’, machane me thay e bin riyul’ e yafos u pa’? Bmuduwgil ndariy! 37 Dariy ban’en nrayag ni nge pi’ be’ ngki sul e yafos rok ngak. 38 Ere fa’anra tamra’ be’ ni bochag nge n’en ni gu be fil ngak e girdi’ ko ngiyal’ney ndakir mich Got u wan’ e girdi’ ma yad be rin’ urngin mit e kireb, e ku ra tamra’ e en ni Fak e Girdi’ ngak ko ngiyal’ nra yib riy ni yad e pi engel rok Got ni be galgal ram’en ni bod e Chitamngin.”