1 I motochiyel SOMOL ngak Moses, 2 ni nge gafaliy yu Israel ngar pi’ed ngak Got e ggan ni maligach ni kan duwgiliy nib magan’ ngay ko re ngiyal’ i n’en ni kan turguy ni ngan pi’ riy.

3 Irera’ e pi maligach ni ggan ni ngan pi’ ngak SOMOL: maligach ni mo’oruf ni gubin e rran, e l’agruw e saf ni pumo’on ni ta’reb e duw rorow ni dariy bang u dowrow nib kireb. 4 Ngan pi’ e bin som’on riy ni kadbul, min pi’ e bin migid ni blayal’, 5 ra reb ma bmu’un e maligach ni grain ngay ni l’agruw e pawn e flour, ni kan athkuy nga l’agruw e pint e gapgep ni olive nth’abi fel’. 6 Irera’ e maligach ni gubin e rran ni kan mu’ i urfiy, ni som’on e ni pi’ ko Burey nu Sinai nib maligach ni ggan, ni bfel’ bon u wan’ SOMOL. 7 Ma fare wayin ni maligach nib mu’un ko bin som’on e saf, e ngan pu’og l’agruw e pint riy ko fare altar. 8 Ma bin l’agruw e saf ni ngan pi’ ni blayal’ e ta’reb rogon ko bin nni pi’ ni kadbul, nib dachug ko maligach riy ni wayin. Ku irera’ reb e ggan ni maligach, ni bfel’ bon u wan’ SOMOL.

9 Rofen ni Sabbath e ngan pi’ l’agruw e fak e saf ni pumo’on ni ta’reb e duw yangarrow ni dariy bang u dowrow nib kireb, nge aningeg e pawn e flour ni kan athkuy ko gapgep ni olive ni ireram e maligach ni grain, nge fare maligach ni wayin. 10 Re maligach ney ni mo’oruf e ngan pi’ ko urngin e Sabbath nib dachug ko maligach ni yu rran nge maligach ni wayin ni yagagen.

11 Maligach ni mo’oruf ni ngan pi’ ngak SOMOL u tabolngin reb e pul: l’agruw e garbaw ni pumo’on ni kab bitir, ta’reb e saf ni pumo’on, medlip e saf ni pumo’on ni ta’reb e duw yangarrad, ni yad urngin ni dariy bang u dowrad nib kireb. 12 Maligach ni grain, e tin th’abi fel e flour ni kan athkuy e gapgep ni olive ngay: yigagen reb e garbaw ni pumo’on e nel’ e pawn e flour; yigagen reb e saf ni pumo’on e aningeg e pawn; 13 mra reb fapi saf ni kab bitir ma l’agruw e pawn e flour ni yigagen ni kan athkuy ko gapgep. Pi maligach ni mo’oruf ney e bogi maligach ni ggan, ni bfel’ bon u wan’ SOMOL. 14 Bin rogon fare wayin ni maligach e aningeg e pint e wayin nga reb fa gali garbaw ni pumo’on, ma dalip pint ko fare saf ni pumo’on, ma l’agruw e pint nga reb fapi saf ni kab bitir. Irera’ e gafal ni fen fare maligach ni mo’oruf ko bin som’on e rran u gubin e pul u lan reb e duw. 15 Ma gin nib dachug ko fare maligach ni mo’oruf u gubin e rran nge maligach ni wayin riy, e ngan pi’ reb e kaming ni pumo’on ni maligach ko denen.

16 Fare Madnom ko Paluk’af ni liyor ngak SOMOL e ngan tay ko rofen ni ragag nge aningeg ko bin som’on e pul. Exo 12:1–13; Deu 16:1, 2 17 Ma bin ragag nge lal e rran e nge tabab fare madnom ni medlip e rran mfini mus, nap’an e re madnom nem e go’ flowa nni ngongliy ni dariy e is riy e ir e ngan kay. Exo 12:14–20; 23:15; 34:18; Deu 16:3–8 18 Bin som’on e rran ko fare madnom e ngam mu’ulunggad ni fan ko liyor, ma dariy ba maruwel ni ngan rin’. 19 Min pi’ ba maligach ni mo’oruf nib ggan ngak SOMOL: ni l’agruw e garbaw ni pumo’on ni kab bitir, ta’reb e saf ni pumo’on, nge medlip e fak e saf ni pumo’on ni ta’reb e duw yangarrad, ni dariy bang u dowrad nib kireb. 20 Min pi’ ba maligach ni grain ni tin th’abi fel’ e flour ni kan athkuy e gapgep ni olive ngay: n’el e pawn riy nga reb fa gali garbaw ni pumo’on, aningeg e pawn riy ko fare saf ni pumo’on, 21 ma l’agruw e pawn riy nga reb fapi fak e saf. 22 Ma ku yira pi’ reb e kaming ni pumo’on ni fen e maligach ko denen, ni irera’ rogon i bangbengnag fare machalbog ni fan ngak e girdi’. 23 Ngan pi’ e pin’ey ni bang ko fare maligach ni mo’oruf ni yima pi’ ni kadbul. 24 Ni ku aram rogon ni ngan pi’ ni medlip e rran ba ggan ni maligach ngak SOMOL, nib m’ag u wan’ bon. Ngan pi’ e biney ni bang ko fare maligach ni mo’oruf ni yu rran nge fare maligach ni wayin. 25 Mu gakgad ngam liyorgad u ta’bang ko bin medlip e rran ma dab mu rin’ed ba maruwel.

26 Re rran ni m’on ko Madnom ko T’ar Wom’ngin e Woldug, e aram e rofen ni ngam pi’ed fare maligach ni grain ni kab be’ech ngak SOMOL, ma gimed e ngam mukun gad nga ta’bang ni fan ko liyor, ma dariy ba maruwel ni ngan rin’. Exo 23:16; 34:22; Deu 16:9–12 27 Ngan pi’ e maligach ni mo’oruf ni bfel’ bon u wan’ SOMOL: l’agruw e garbaw ni pumo’on ni kab bitir, reb e saf ni pumo’on, nge medlip e fak e saf ni pumo’on ni ta’reb e duw yangarrad, ni yad gubin ni dariy bang u dowrad nib kireb. 28 Min pi’ e maligach ni grain ni tin th’abi fel’ e flour ni kan athkuy e gapgep ni olive ngay: n’el e pawn riy nga reb fa gali garbaw ni pumo’on, ma aningeg e pawn riy ko fare saf ni pumo’on, 29 nge l’agruw e pawn riy nga reb fapi fak e saf. 30 Ma ku yira pi’ reb e kaming ni pumo’on ni fen e maligach ko denen, ni irera’ rogon i bangbengnag rogon fare machalbog ni nge tay e girdi’. 31 Ngan pi’ e pin’ey nge fare wayin ni maligach nib dachug ko fare maligach ni mo’oruf ni gubin e rran nge maligach ni grain.