1 Fakag, mu tiyan’um ma ga motoyil ko gonop rog nge nangan’. 2 Ma aram e ga ra nang rogon ni ngi i par pangim ni bfel’, me yag ni m’ug ko thin rom ni gab llowan’. 3 Thin u dap’ilugun le’engin be’, e rayag nib athib ni bod e honey ma pi kiss rok e rib munguy ni bod e gapgep ni olive, 4 machane bay i tomur, me pagem ndariy ban’en rom kemus ni mo’oy nge amith. 5 Ra fekem nga’ar ko fayleng ko yam’; re kanawo’ ni be yan riy e kanawo’ ni sor ko yam’. 6 Der ma par u daken e kanawo’ ni sor ko yafos; machane yug ma yanyan, ma dernang ko mang e be buch.

7 Pifakag, mmotoyilgad ngog e chiney, ma dab mu paged talin bingyal’ e n’en ni gu be yog. 8 Mu pired u orel ko mitney e bpin! Dab mu chugurgad nga taga’ mab rok! 9 Fa’an gimed ra rin’, ma bugwomed ni immoy e ra yan ngak boch e girdi’, ma gimed ra yim’ ni kagmed bpagel nga pa’ e girdi’ ni der ma runguy be’. 10 Arrogon, pi milekag e bay ra feked e gubin e fla’ab romed, ma tin kammu’gad i marwuliy e bayi milfan ngak be’. 11 Bayi chugur ni ngamum’ ma ga be gel’gel’, ni yi be longlonguy e ufin u dowam kem’ay ngabang, 12 ma bay mu ga’ar, “Mang ni da’ug fol? Mangfan ni dagpag be’ nge yal’uwegneg? 13 Da’ug motoyil ko pi sensey rog. Ma da’ug tiya n’ug ko tin u rogned. 14 Ba tomgin mu gu pir’eg nike ma’fag u fithik’ e girdi’ ni yo’or.”

15 Mu yul’yul’ ngak le’engim ma go’ ir e nge t’uf rom. 16 Bitir ni pifakmed yug boch e ppin e dariy gamingrad ngom. 17 Bitir ni pifakam e ngar ilalgad ngar ayweged gur, gathi milekag. 18 Ere nge fel’ u wun’um le’engim me par e felfelan’ rom ko re pin ni kam la’ay — 19 ma ba pidorang nib sumnguy fel’ngin ni bod e deer. Ngam par ni gab felfelan’ nga fel’ngin; mu pag nge longbiyem e t’ufeg rok. 20 Fakag, mangfan ni ngam adag yug reb e bpin? Mangfan ni nge unan’um nga fel’ngin le’engin be’? 21 I SOMOL e be guy gubin e tin ga be rin’. Demturug e gin ga be yan ngay ma be yaliy. 22 Pi denen ko pi’in kireb e ba wup. Yad ma aw ngalan e nug ko kireb rorad. 23 Yad ra yim’ ni bochan e darir t’ared lanin’rad. Feni gel e pinat rorad e ra suruyrad i yan nga low.