1 Girdi’ nda rir m’aged yad ndak boch e girdi’ e go’ yad e yad ma leam nagedyad; ma der ma m’ag u wan’rad e tin go’ yimnang ni bfel’.

2 En nib balyang e dariyfan u wan’ ni ngari nangfan ban’en; kemus ni ba’adag ni nge m’ug ni ir e ba llowan’.

3 Denen nge tamra’ e ma yan u ta’bang. Ga ra mul ko liw rom nib tolang ma moning e ra yib nga luwan.

4 Thin rok be’ e rayag ni nge mang kenggin e gonop, nib to’ar ni bod e regur, ma ba kak’ling ni bod ba lul’ ni be yan.

5 De mat’aw ni ngan fol ko en nib kireb e rok mi ni pag e cha’ nib mat’aw ndabiyag ngak e tin mat’wun.

6 Nap’an nra tababnag be’ nib balyang e tugthin, ma be gay ni ngan pirdi’iy.

7 Nap’an nra welthin be’ nib balyang, ma ir e be thiyernag ir; mra mang ir e aw ko thin rok.

8 Gun’gun’ e rib fel’ lamean; aram feni gadad ba’adag i ful’.

9 En nib gamead e ta’reb feni kireb ko en nib mogothgoth.

10 I SOMOL e bod ba wulyang ni tafen e damit nib gel; ni gin rayag ni nge yan e pi’in nib mat’aw ngay ma dabi buch ban’en rorad. 11 Ma pi’in yo’or ban’en rorad e wun’rad e fel’ rogon rorad e ra yororiyrad ni bod ba yoror nib tolang ma ba gel u wuru’ bbinaw.

12 Pi’in tolangan’ e yad be bibiy e riya’ i yan; dariy be ni yira tayfan nge mada’ ko ngiyal’ nike sobut’an.

13 Mmotoyil u m’on ni ngam non. Ya ra danga’ ma gur be’ ni ga ba pinat ma ga ra reg ku be’.

14 Lanin’um ni ngam par ni gabfos e ir e ra chibiyem u fithik’ e m’ar rom, machane fa’anra mul lanin’um ma aram e dakriy e n’en ni nge tilem.

15 Girdi’ nib llowan’ e gubin ngiyal’ ni yad be nameg ni ngar filed ban’en.

16 Ga ba’adag ni ngam mada’nag be’ nib tolang? Mu fek ba tow’ath i yan ngak me mom ngom.

17 Cha’ ni som’on nra non u tafen e puf oloboch e yira leamnag nib pluw e tin be yog, nge mada’ ko ngiyal’ nike tabab e en be togopoluw ngak i fith u boch ban’en.

18 Fa’anra malu’ag thin l’agruw ni’ ni yow ba yargal u tafen e puf oloboch, ma ngan girengiy e pow nge puf fare pa’ i oloboch.

19 Mu ayuweg pibe’ rom ma yad ra ayuwegnem ni bod e yoror u bbinaw nib gel, machane fa’anra um tugthin ngorad, ma yad ra ning e mab rorad ngom.

20 Bay um par u fithik’ wenigan urngin e tin ga ma yog. 21 Tin ga ra yog e rayag ni ayweg e yafos fa reb e ra thang; ere thangri fel’ u wun’um wenigan e pi thin rom.

22 Ga ra pir’eg reb e bpin ni ngam le’engiy ma aram ban’en ni bfel’ ni ka mu pir’eg; ma be dag ni SOMOL e ba gol ngom.

23 Nap’an nra non be’ nib gafgow, ma thangri non nib munguy, machane fulweg rok be’ nib yo’or ban’en rok e ba taf.

24 Boch e pi tafager e der ma par thilrad ni bfel’ nib n’uw nap’an, ma boch e pi tafager e ka ba gel farad yul’yul’ ngak e walag.