1 Dab mu uf ko tin ngam rin’ gabul, ya da mu nang e n’en ni bay yib u thilin e chiney nge gabul.

2 Ri dabmog e sorok ngom mpag nge mang boch e girdi’ e rogned ara ba milekag; ma gur ri dabmog.

3 Tomalngin e malang nge yan’ e dabi chugur nga malngin e oloboch nra k’aring be nib pinat.

4 Damumuw e bbuchan’ ma ba magothgoth, machane talyag e ba thum’ ngaru’.

5 Bfel’ ni ngam puwan’ ku be’ ni ga be yal’uweg ko bin ngam digey nge leamnag nde t’uf rom.

6 Ra puwan’ e fager rom ngom ma bfel’, mra palyag e to’ogor rom ngom ma ngam kol ayuw.

7 Ra gab fos, ma ga ra siyeg e honey, machane ra gab mak’iy ma ga ra kay e ggan nib mo’oy ma ba athib u langam.

8 Be’ nike chuw u tabnaw rok e bod ba arche nike chuw u tafen.

9 Florida nge gapgep ni bfel’ bon e ma felfelan’ nigem, machane ololoboch e ma bilig e gapas u lanin’um.

10 Dab mu pagtalin e pi fager rom nge pi fager ko chitmam. Ya fa’anra ke yib e gafgow ngom, ma dab mu ning e ayuw ngak pi girdi’em; ya kabfel’ be’ nib buguliyoror nib chugur, ku be’ ni walagem nib palog rom nga orel.

11 Fakag, mu gonop, ma gu ra felfelan’; ya bay e fulweg ni gu ra yog ko en be gathibthib nageg.

12 Girdi’ nib sul laniyan’ ngak e yad ra guy e oloboch ni be yib miyad pilo’ riy, ma be’ nib manan’ e ra yan nga fithik’ mfini kalngan’ riy ko tomur.

13 Feni manan’ be’ me ognag ir ni nge thang e malfith rok ba milekag, e bay tapgin ni ngan kol e gayog rok nge par nni talpen fare malfith.

14 Kabfel’ ni ga ra yaba’iy e fager rom ko bin ngam pug ni tanirran ni ga be fangichiy nib ga’ lamam.

15 Le’engin be’ nib ta pupuwan’ e bod e ran ni be map’ map’ u rebo rran ni be aw e n’uw; 16 Uw rogon ni ngam taleg ni dabki non? Ka am taleg e nifeng, ara mu gogoy e gapgep ngalan pa’am?

17 Girdi’ e ma fil ban’en rok be’, ni bod ni wasey e ma uthum e wasey.

18 En ma ayweg bake gek’iy ni fig era kay wom’ngin; ma ba tapigpig nma ayweg e masta rok e yira tayfan.

19 Bod e ran nra dag ya’an owchem ngom, e aram rogon gumircha’em nra dag ya’am ngom.

20 Ar ar ko dowef ko girdi’ e bod e fayleng ko yam’ ndariy bingyal’ nra gaman.

21 Nifiy e ma sikengnag e silber nge gol; bugwan be’ e ku rayag i sikengnag.

22 Fa’anra mu pirdi’iy be’ nib balyang nge chugur ni nge yim’, ma dabyag ni ngam pirdi’iy e balyang rok nge chuw rok.

23 Ngam ayweg e saf nge garbaw rom nge musmus rogom riy, 24 ni bochan e fla’ab e dabi par ni manemus. Mus ko pi nam ma dabi par ni dariy n’umngin nap’an. 25 Ga ra th’ab e gargear ni gan e gamanman, mfin mu th’ab e pan u thatharen e burey ma be tugul e gin migid e gergear. 26 Rayag ni ngam ngongliy e mad u buni’en e saf rom ma ga chuw’iy bang e binaw ko salpiy ni yag ngom ko pi kaming rom ni mu pi’ ni chuway’. 27 Ma tin kabay e kaming e ra pi’ e milik nge durwi’iyem nge tabnaw rom, nge pi’in ppin ni tapigpig rom.