PSALMS
Murung’agen e Re Ke Babyor Ney
Fare Babyor ni Psalms e babyoren e tang nge meybil u lan e Bible. Ba yoor e girdi’ u lan bokun e mfen ni yoloy e pi tang nge meybil ney ma u ni kunuy nga u nin’ u ta’abang u nap’an e meybil nge liyor me, munmun min uneg ngalan e Chep ni Thothup.
Boor mit e pi tang ney. Bay e tang riy ni yibe pining e sorok ngak Got, nge meybil ni nge ayuwegney Somol, nge meybil ni nge matanagiy Somol e girdi’, nge yoror rorad; nge meybil ni nge n’ag Got fan e denen, nge tang ni yibe pining e magaer ngak Got ni bochan urngin e tow’ath nma pi’, nge meybil ni yibe wenig ngak Got ni nge gechignag e pi to’ogor. Boch e pi meybil ney e meybil rok ta’abe’ ni fan ngak, ma boch e meybil ni fan ko nam nge pi’in yad be yog e thin ko nam, ma ku boch e be yog e fin be t’uf nga lanian’ gubin e girdi’ rok Got.
Bay boch e thin ko Psalms ni weliy Jesus ngak e girdi’, ma boch e bay ni kan yoloy ko Bin Be’ech e M’ag, me par e babyor ni Psalms kakrom i yib nib t’uf, ya babyoren e meybil nge tang ko liyor ngak Got.
Gathon e Re Ke Babyor Ney
Ra’ay nge wugem e Psalms ni kani yu ulungnag ni lal ulung ara lal ke babyor ni ba’aray rogon:
Psalms 1–41
Psalms 42–72
Psalms 73–89
Psalms 90–106
Psalms 107–150
KAEN TA’REB E BABYOR
1
(Psalms 1—41)
Bin riyul’ e felfelan’
1 Ba felan’ e cha’
nma siyeg ni nge fol ko fonow rok e girdi’ nib kireb,
ma der folwok ko pi’in ni tadenen,
ara un ngak e pi’in dariy fan Got u wan’rad.
2 Ma ra be’eg e motochiyel rok SOMOL mma yib e felfelan’ riy ngak,
ma ku aram rogon nra be’eg ni rran nge nep’ ni bochan e nge nangfan.
3 I ir e bod ba ke gek’iy nike tugul u to’oben ba lul’;
gubin ngiyal’ nma k’uf ko ngiyal’ nra taw ngay ni nge k’uf,
ma der mororoy yuwan.
Urngin e tin ma ngongliy e ma yan i aw ni bfel’.
4 Ma girdi’ nib kireb e gathi ara’rogorad!
Yad bod kenggin e grain ni kan th’ab ke mlik’, nra aw e nifeng ngay me changegnag.
5 Girdi’ nib kireb e bayi gechig nagrad Got;
pi tadenen nem e dab ni unegrad nga fithik’ e pi’in yad mmat’aw.
6 I SOMOL e ra pow’iy me yororiy e pi’in yad ba mat’aw,
machane en nib kireb e be yan u ba kanawo’ ni sor ngabang nib gel e gafgow riy.
DRAFT VERSION — Proofreading in progress