1 I SOMOL ni Gubin ma Rayag Rok e pi’ e re thin ni ba’aray ngak Zekariah: 2 “Kargum’ ni bochan ni nggu ayweg yu Jerusalem ni fan e t’ufeg rog nib to’ar ngak e girdi’ riy, nib t’ufeg nma k’aring ngeg nggu damumuw ko pi to’ogor rok. 3 Bay gu sul nga Jerusalem, ni fare binaw rog nib thothup, nggu par u rom. Re binaw nem e go’ bay nnang ni aram fare binaw nib yul’yul’, nge fare burey rok SOMOL ni Gubin ma Rayag Rok ni bay u nog ni fare burey nib thothup. 4 Pi pumo’on nge ppin ni kar pilbithirgad ni yad ma kol e sog, e bay kur sabalgad u but’ u lukngun fare binaw. 5 Ma yu pa’ i kanawo’ riy e bay kisug daken ko yochi pagel nge bulyel ni yad be fefal.

6 “Ran’ey e sana ra leamnag e pi’in ni magach ko fare nam ni dabiyag, machane dariy ban’en ndabi yag rog. 7 Bay gu chuweg e girdi’ rog ko pi nam ni kan fekrad ngay, 8 bay gu fulwegrad u lan e ngek nge lan e ngal ngar pired u lan yu Jerusalem. Bay ra manged pi girdi’eg, ma bay gumang Got rorad, mug gagiyeg nagrad u fithik’ e yul’yul’ nge mat’aw.

9 “Mu athamagil gad! Ya chiney e gimed be motoyil ko fapi thin ni i yog e pi profet ko fa ngiyal’ ni yibe filaeth e def ko Tempel rog ni ngan toy bayay. 10 Ma nga m’on ko ngiyal’nem e dariy be’ ni yag rok ni nge pi’ puluwon be’ ara ba gamanman nge maruwel rok, ma dariy be’ nrayag ni ayweg ir u pa’ e pi to’ogor rok. Ya gu pingegrad ngar togopluwgad ngorad. 11 Machane chiney e pi’in ra magay gad ni darm’ad e ba thil rogon e tin bay gu rin’ ngorad. 12 Bay ra yunged e woldug rorad u fithik’ e gapas. Yuke grape rorad e bay yib wom’ngin, me tugul e woldug u but’, ma bayi yo’or yang e n’uw ni ngi i aw. Gubin e pi tow’ath ney e bay gu pi’ ngak girdi’en fare nam rog nra magachgad ni yad bfos. 13 Gimed e girdi’ nu Judah ngu Israel! Kakrom e pi girdi’ nu bang e mang ba yaba’ ngorad ni bayi n’en me ga’ar bagyad ngak bagyad, ‘Mang e yigi aw fare riya’ ni aw nga daken yu Judah ngu Israel ngom!’ Machane bay gu aywegmed, ma aram e fa pi girdi’ nu bang e bay u roged ngorad ni ngar ga’ar gad, ‘Mang e yigi yag ngom e pi tow’ath ni yag ngak yu Judah ngu Israel!’ Ere nge pagan’med ma dab mrusgad.”

14 I SOMOL ni Gubin ma Rayag Rok e be ga’ar, “Nap’an ni k’aring e pi chitamangimed kakrom e damumuw ngog, mug turguy e riya’ ni nge yib ngorad ma dag thilyeg e leam rog, mug pag nge buch ni aram rogon. 15 Machane chiney e kug turguy ni nggu fal’eg wa’athan e girdi’ nu Jerusalem ngu Judah. Ere dab mrusgad. 16 Ba’aray e tin ngu’um rin’ed: Ngu’um weliyed e tin riyul’ ngomed. Mu lan tafen e puf oloboch e tin nib mat’aw e ngam rin’ed — ni ir e ra pi’ e gapas. 17 Dab mu tanom niged wo’en ni ngam gafgow niged bochi gimed. Dab mu mow gad ni gimed be micheg ban’en ni de riyul’. Gub fananikan e sasalap l’ugun, nge tin nde mat’aw, nge mod yargal.”

18 I SOMOL ni Gubin ma Rayag Rok e pi’ e re thin ney ngak Zekariah: 19 “Fare pag abich ni yima tay ko bin ni aningeg, lal, medlip, nge bin ragag e pul e nge par ni bogi madnom ko felfelan’ nge paslagan’ rok e girdi’ nu Judah. Thangri t’uf romed e tin rriyul’ nge gapas.”

20 I SOMOL ni Gubin ma Rayag Rok e be ga’ar, “Bayi taw nga bangiyal’ ni ba yo’or e nam ni bayib e girdi’ riy nga Jerusalem. 21 Girdi’en reb e nam e bayi lungurad ngak girdi’en e tin ba’aram e nam, ‘Nggu warod gu liyorgad ngak SOMOL ni Gubin ma Rayag Rok nggu ninged e fel’ wa’athan rok, ere mired ngdarod!’ 22 Ba yo’or e girdi’ nge boch e nam nib ga’ lungrad ni bay rabad nga Jerusalem ni ngar liyorgad ngak SOMOL ni Gubin ma Rayag Rok miyad meybil ngak ni nge fal’eg wa’athrad. 23 U lan e pi rran nem e bayib ragag e girdi’ nu bang ra ga’argad ngak reb e Jew, ‘Gamad ba’adag ni nggu uned ko gin ngam man ngay, ni bochan e kug rung’aged ni bay Got rom.’ ”