1 Tame ere Kristen apeilake tete kenake abobe, ere yaku yenbowou abobe. Ete tuma e sekenwai. 2 Kristen apeilake eme gwopkap nenbetete. Eme wule yenbo nente, etepkap tatame eme ete tame emne wule yaper mapeke la? Eme ta wurisubu panete. Eme ok o awos nogwape beke kip a. Eme selpap yenbo, eme tatame emne yenbowou nente. Eme papmame tame, eme ek ya tame emne awos newon ate. Eme God eri tuma tatame emne noub wusoute. 3 Eme ok yaper an sisi beke kip pe. Eme pap beke kip wayen e tameken ei beke kip nai. Ei beke kip nai, eme tatame etemken noub me site. Eme kel wor som beke kip abo. 4 Eme emri yenta noub lakerete, yenta eme etemri kulke temente, eme noub temente. Eme yen emne be wos nente wote, yen eme wan beke kip gwole, eme wan wurik mette. 5 Tame eme etemri yenta emne noub beke kip lakere, eme Kristen tatame emne mapeke noub lakere? Berai. 6 Samsam Kristen eme Kristen apeilake yaku mane pette. Eme ete yaku pette wote, eme maime sig eisau wote. Etep tete wote, God ere Satan erne tuma namdemkap, ere ete tame emne etep kir namdete nenbe. 7 Kristen beke te tatame eme tame emne tame yenbo wobe, ete tamewou eme Kristen apeilake yaku pette. Etepkap tame, Kristen beke te tatame eme ete tame emne ker beke ras, eme Satan eteri manke beke kip wur. Etepkap tame eme Kristen apeilake etemri yaku kerete.

8 Kristen etemne yaku kerebe tatame etem kir, eme selpap yenbo temente. Eme tawul pes beke kip te. Eme wain ok yaper nogwape beke kip a. Eme kel nogwape pette beke kip abo. 9 Eme selpap wurisubuwou temente, God eteri kik tetan tuma seken eme noubwai meten som abote. 10 Kristen lakerebe tatame ne emri kerebe yaku kiyi seilate. Eme yaku yenbowou kerete, wule yaper beke nen, eme yaku som ek kerebetete. 11 Ta etem kir, eme gwopke tete. Eme selpap yenbo temente. Eme kerebe tuma beke kip wo. Be wos eme nente, eme noub sin yenbowou nenbetete. 12 Kristen yaku kerebe tame eme ta wurisubuwou panete. Eme emri yenta emne noub lakerete. 13 God eteri yaku noub kerebe tatame eme wos pes petbe. Wos wuri e eme sig yenbo petbe. Wos wuri e eme Krais Jisas eterne kenawaike abobekap eme muresen tatame emne noub wusoube.

14 An abobe, an nene yan late nenbe. Kap an agetage yate, o kap wos wuri ane keikeresukte? 15 Eke an nene gwo siglou bas rasbe. Nema God eteri tatame, nema nenbekap an nene bas rasbe. Nema som tetan God eteri tame supa, nema nawo kwatkap, nema tuma seken noub sebe. 16 Ye. God eteri wule somo e kik tetan tuma. An tuma seken wobe. E gwopkap.