2 JON
Jon eter yuri sene bas rasem siglou.
Kiyi late tuma.
Gwote siglou e Jon ere yurik bas rasem siglou. Ere bas rasem, ere ta wuri teri yen etemken emne newopitim. Tame kau eme abobe, ete tuma, yenta emne wobe tuma, e sekur sakur tuma. Tuma somo e gwopkap. Jon ere kom wuriri Kristen lakerebe tameken Kristen tatameken emne gwote siglou newopitim.
Ere emne etep bas rasem. Kem akeite tatame emne kobo lan noub eyarbetete. Be wos be wos Apei God ere kemne wote, kem etepke nente. Kem akeite tumaken yikwokwobe tumaken kem mane mette. Jon ere etep bas rasem.
Jon ere bas rasem tuma gwo.
Nema God eteri tuma seken noub tobon tuma yikwokwobe tame emne eisa eisa.
1
1 God eter wom taken etetri yenken an kemne gwote siglou bas rasbe. An Kristen apeilake, an wule sekenke an kemne pap yewon noub eyarbe. Arenwou berai. Nogwape tuma seken metten tatame etem kir eme kemne etep kobo labe. 2 Ete tuma seken e neremken tetan, e neremken som temente. Eke, nema kemne kobo lan noub nenbe. 3 Apei Godken Apei Eteri Yen, Jisas Kraisken epe wule seken nenen kobo lan noub nenbe, eke epe nemne noub eyarte, nemne kobo late, selpap yenbo newote.
Nema pap yewobe wule noub tobobetete.
4 Apei ere nemne wobekap, nereri yen kau eme etep nenbe, eme ete wule seken tobobe. An etep metem, an kenake metekwasbe. 5 Kristen ta yenbo, an nene noub etep wobe. Nema pap yewote. An nene wobe tuma e tuma ager berai. Ete tuma kem kiyi metem. 6 Pap yewobe wule eri somo ere gwo. God eteri wom tuma nema etep tobobetete. Kiyi eri tuma, eri wule kem etep metem. Nema akei, nema pap yewon eyarbe wule tobobetete.
Nema Krais eri tuma noub tobobetete.
7 Tuma kenake yikwokwon wusoube tame eme kom komke sewuren etep wobe. Jisas Krais ere more tame beke te. Etep wobe tame eme tuma me yikwokwobe tame. Eme Krais eteri peiktame. 8 Kem maime noub la. Kem yaku eisau keren kem Kristen tem. Eke kem etemri tuma mane meten keremri yaku oksubu mane yite. God ere kemne newote wom tokwo, kem ete tokwo akei pette, e yenbo. 9 Tatame eme Krais eter wusoubetem tuma noub beke kip tobo, eme ete tuma mesginen akeite tuma sene pette, ete tatame eme God eterken beke kip te. Tatame eme Krais eteri tuma noub som tobomente, eme Yenken Aken etepken som temente. 10 Eike tatame eme kemne yan lan Krais eteri tuma wotaken yikwokwo tuma wusoube, kem emne pap mane yewon kemri akek mane panen yite. Kem emne pir mane wote. 11 Emne pir wobe etepkap tatame eme etemri yaku yaper kir kerete tamesip tete nenbe.
Apeilake ere emne late abobe.
12 Tuma nogwape an kemne wusoute abobe. Ete tuma an siglouke beke kip bas ras. An abobe, an kemne yan late, nema noub sin namdete. Etep namdete, kem pap yenbo ten metekwaste.
13 Kemri God eter kenem geisi etetri yen eme kemne pir wobe.
Jon ere bas rasem tuma ab eteke.