3
Jisas eri sig eisau ere Moses eri sig eisau me teitkwunten.
1 Kristen geisimase, God ere kemne kir Hevenke yite wom. Kerem, kem Jisas eterne noub abote. God ere erne won yam, ere Aposel yakuken God eteri ake lakerebe apeilake tame eisau tem. Nema erne kenawaike abote, eteri sigke nema tuma wusoube. 2 Erne wom tame eteri yaku ere akei noub kerem. Kiyi Moses ere God eteri tatame etemri borke yaku noub kerebetemkap, Jisas ere etep kerebetem. 3 God ere Jisas erne sig eisauwai newom, ere Moses eri sig eisau teitkwunem. Beke ere etep nenem? Tame ere ake kerebe, nema ake eri sig eisau beke wo. Berai. Ake kerebe tame eri sig nema eisau wobe. 4 Wurare wurare ake e tamek kerem. Wos akei God eter seikim. 5 Moses ere yaku kerebetem tame, ere God eteri tatame etemri borke yaku noub kerebetem. Eri kerebetemkap, e yurik wote tumakap. 6 Krais eter, ere God Eteri Yen, ere God eteri tatame emne lakerebe, ere ete yaku noub kerebe. Nerem, nema eteri tatame. Nema kenawaike abon oksubu ten metekwasen Aneyen erne noub som koute, etepkap nema God eteri tatame seken.
Wan gwolebe tatame eme ege beke kip si.
7 Eke God Eri Wou ere wobe tuma nema etep mette. Ere etep wobe.
Gwopte kem God eteri tuma mette,
8 kem wan mane gwolete. Kiyi keremri yeiwarege eme wan gwolebetem, eme ari tuma mo won ane magel taibetem. Eme tameken berai emik temenem, eme ane seilabetem. Eme wan gwolebetem. Emri nenbetemkap kem etepkap mane tete.
9 Eme etek temenem, nabe nogwape (40-pela) eme ari nenbetemkap labetem. Labetem, eme ane som seilabetem.
10 Etep tebetem, an ete tatame emne pap kenake wayen emne etep wom. Kwokwos kwokwos emri porere e yaper sene tebe. Ari wule eme beke se. Etep wom.
11 An pap kenake wayen an areri sigke gare awo yewen etep wom. Ari ege si emi eme beke kip yan si. Etep wom.
12 Geisimase, kem noub la. Keremri tame wuri ere porere yaper mane peten ere kenawaike abobe wule mane mesginin ere som tetan God erne mane magel taite. 13 Gwopte yabel som tetan, kem wos yenbowou nenen, tuma yenbowou awoawo wobetete. Kwokwos kwokwos kem etep tebetete. Yaper nenbe wule e keremri tame wuri erne mane tuma yikwokwon ere pap etewouke ten wan gwolete. 14 Nema Krais erne kiyi kenawaike abomkap, nema etepkap kenawaike som abon yin nema woreyuwu me pe sate nenbe, eke nema Krais eteri tatame seken tete. Tete, eter pette wos nema kir pette. 15 Nema metten, ete tuma ere etep wom.
Gwopte kem God eteri tuma mette, kem wan mane gwolete. Kiyi keremri yeiwarege eme wan gwolebetem, eme ari tuma mo won ane magel tayem. Emri nenbetemkap kem mane nente.
16 Kiyi eike tame eme wan gwoleten God eri tuma mo won erne magel tayem? E Moses eter emne panen Isip nowsel mesginin yim tatame etem, eme akei wan gwolen God erne magel tayem. 17 Nabe nogwape (40-pela) God ere eikene pap wayem? Wos yaper nenbetem tatameken kelpe emik saiwobetem tatameken etemne God ere pap wayem. 18 God ere pap wayen eteri sigke wom tuma ere eikene wom? Etek wan gwolebetem tatame etemne ere etep wom. Eme ari ege si emi beke kip yan si. 19 Etep tem, nema metten, eme God erne kenawaike beke abo, eke eme eteri ege si emik beke kip yi.