6
1 Kwane, nub kuu Yesu yoom deme ibonmodan kowe, yiib yaa ke nangkande yedmuub kei. God ye kabamoon kondoon ye mimyob dowaken kuu yiib kuu anammo awinime, idiibban keraan anduwed. 2 Amborom kuu Godbed Ye Weng aombed yedmoon,
“Nembed ne kubi dowakeniib aron kinaan arimbed yiib kurikuri weng wengambere kwanaan,
bobni yaa burudande bindi yaron arimbed yiib awandaan kui.” andoon.
Kedi, Pool, nembed yiib ke yedmendaan kei, kibireb kee Godbed ye kubi dowakeniib kinoon yaron kii, kibikee bobni yaa burudande bindi yaron kii.
Pool Deme Dabawiib Arewa Aom Awunoon
3 Yesu ye deme awinuub kuyaa kuu yenambed daanubdaanab kame deme arewa andaib andi dowad kumbed nub kuu yena yi murubia ari boknandi yeman ma kowokban. 4-5 Kwane, kiwaan korem yaambed yiib yaa nubka nub kuu God ye demedan ande korokbenduub kukei, dabawa yobdooda mimyob wande yiminban keri yemana nub yaa meneboon kuyiib, atdebokbed nub yenbandiwen kuyiib wii aom nub benkamobiwen kuyiib nuwiib yaa mene arud wande yirinde baande kamiwen kuyiib deme yobdood ambangkuwen kuyiib unuk angkindeban keruwen kuyiib mungimo doburuwen kuyiib yaa kuu aron doboob yinmoniyiibban kangdommo doberemburuwen kii. 6 Kwane, nub kangkon doburuwen kuu karadmo inameniib kaadkeriyiib yodbirimban iwarimbed dobiriyiib awandiyiib Kingkin Karadmo yaambed dobiriyiib ma aadikmiyiibban ye mimyob dowaken keendiyiib 7 anam anam ye weng daandiyiib God ye aromkono korokbiyiib kingkin kerekmen yaambed God ye yorokmo ye kuman wiwi angka yemaniib an angka yemaniib kuyiib doberemburuwen kui. 8 Kwane, nub kuu yenambed karub amun ande benkoobaiwa yenambed karub arewa ande benkubunimaib kumbed doruub. Kwane, nub dowad yenambed dudanabidan andaiwa yenambed yorokmodan andimaib kumbed doruub. Kwane, nub kuu ma aadikmiyiibban doruub kumban yenambed nub dowad aadikmidan andimaib. 9 Kwane, nub kuu yenambed aningkoyiibbandan andaiwa yenambed aningkodan andimaib. Kwane, nub kuu yenambed yowori yeman andiwen kumban wad doruub. Kwane, nub kuu atdebokbed yenbandiwen kumban yenbande nongkobindo. 10 Kwane, nub yaa kuu yenambed kubiyiibban mimyob wandi kerundiwen kumban kubimo doruub. Kwane, nub kuu kamboknon keruwen kumban kedmengkanduwen kumbed yena yemoon yi anam andiwenkob yi anam andi yaa kuu yiribman yemoon keremoon areb keriwen. Nub kuu dingkirud keruwen kumban kumkam korem kuu nubman.
11 O Korindan, nub kuu yiib yaa kwane dianbonmo dakmuwen, nub mimyob ambongko kuu kwane yiib yaa anam nanduwen kii. 12 Nub kubi dowaken kuu yiib yaa keendimaub ma korondokban kumban, neman yiibbed kubi dowaken nub yaa kebeniwen. 13 Ne danaya areb kereni daandaan kii, neman konoon neman konoon ibmo keremoon areb, yiib mimyob ambongko kangkon nub yaa nandime.
Anam Andindodan Yaa Dabokne Ibmo Keraib
14 Yiib kuu anam andindodan yoom ibmo kere dabokne awinaib, deme korok keriyiib awaniyiib kwamune awene kuyiib ye dowad. Kedi, inamen yorokmo yoom inamen arewa yoom kuu ibmo dabokne ambangkaniiwoo? Dowan. Kwane, awingyab kuu kumun yaa dabokne yonenanuunoo? Dowan! 15 Kwane, Keresu yoom Seten yoom kuu ee inamen mimo kerem andaniiwoo? Dowan! Kwane, anam andiwendan yi inamen yoom anam andindodan yi inamen yoom kuyaom kuu inamen maa kuu ibmo keroonoo? Dowan! 16 Kwane, God ye kurikuri boyambib darewoobdan yoom dudi god yoom amob weng ongmiwenoo? Dowan! Kedi, wad doreen ye God ye kurikuri boyambib darewoob kuu nub kei. Kuye dowad Godbed Ye Weng aombed yedmoon,
“Ne kuu yi yoom dobereni yi yoom ibonmo dewenebaniin.
Kwane, ne kuu yi God keraniine, yi kuu ne karuwa nimaya keraniib.” andoon.
17 Andekore, yi yaa ika yedmoon, “Kwana kowe, yiib kuu yi numun kumaom doriib kuu koronde yaro mene yiibka kerime.
Ne yaa arewa keri yeman ma angkoronaib.
Kwane ma angkoronaibban kuu yiib yaa kuu amun ande kubende baniin.
18 Ne kuu kwamuneni yiib Ambe keraniina,
yiib kuu ne nima dana karub dana keraniib.” andoon, Aromkono Korem ye Yarimanbed.