3 Yoon
Yoon Ye Kerek Ayoobmim
Kerek Kee Komo Dowad Wongkoon
Apaso Yoonbed kerek kee wongkoon. Karub maa yambiwoom nedbe kurikuri kamimaib ye karub yaningko Dioterefes kuu Yoon ye weng kanmeniibdan yaa kuu wunekaroon kumban, amunmo kamoonman Gaiyusbed Yoon ye weng kanmeniibdan ben angkodmendoon kowe, Gaiyus yaa kerek kee wongkoon. Wongkoon ye weeb kuu AD 87 areb.
Korok Weng
1. Gaiyus Yaa Kubeni Weng Ibduruk (ves 1-8)
2. Dioterefes Ye Dowad Kamkono Weng Daanoon (9-10)
3. Gaiyus Yaa Ongkani Weng Daanoon (ves 11)
4. Demetirius Ye Dowad Karub Amun Andoon (ves 12)
5. Yeenbon Amun Kerundi Weng (13-14)
1
1 Aamkono, nembed wongkaan kei.
Nangkodmi amun Gaiyus, mimyob dowaken anam keebdimain, eb yaa wongkaan.
Amun Amun Kami
2 Ee angkodmi, ne nekaad, eb kingkin kuu amunmombed doreen. Kwamune areb eb dowad eb korereyiibban amunmo dobere ande kurikuri kerimain. 3 Kwane, nub kuristen angkodmi yena menenib eb kuu anam anam ye kiwaan yaambed doreeb ye weng daawiwen kowe, kubi darewoob keraan. 4 Ne kubi darewoob yeman kuu ne danaya anam anam ye kiwaan yaambed kwane doriiwe wedmiin kui. Ne kubi yeman yena dangoon kuu yirimo.
5 Ee angkodmi, eb kuu kuristen angkodmi yena yi kuu noroddan kumban kangdommo awandimaab. Eb kuu ma koronde domondeewa winindo. 6 Ewiib yaambed miniwendan kembed eb mimyob dowaken keendimaab kuu anam andiwendan yaa dakme korokbendiwen. Amun kuu kunaya wanandamiib kuu eb kuu yi yaa amun amun kamendeneb, kiwaan ari nongkobe. Kwane nongkobaneeb kumbed God ye aningko kankoonaniib. 7 Kedi, yi kuu Yesu ye deme awini dowadbed winiwen, kumban God yikaadbandanbed yi yaa awandi ma kondindo. 8 Kwanikob, kuristen kee nubbed angkodmendem. Kwananuub kumbed anam anam ye deme kuu nuwiib ibonmo dabokne awinanuub.
Inamen Arewayiib Inamen Amuniib
9 Nembed kerek dukmen anuk yiri wongkani keendaan kuu, anam andiwendan kuyaa nedbimaib yaa keendaan. Kumban Dioterefes, ye kui, yembed nedin andi ye inamen kandoon kumbed ne weng yaa wunekaroon. 10 Ye kuu nub yaa kobkob weng arewa dakmenaboon. Kumbedmomban, ye kangkon anam andiwendan kuyaa winiwen kuu kubendimokban kerene dowakeniibban kerundoon. Kwane, winiwendan yaa kuu kuristen angkodmi yena awandande kamiwen kwangkon yembed kebengkene kuristendan nedbimaib kuyaa ben bunangka kiranmoon. Kowe, ne mananiin kumbed yembed komo kamoon korem kuu korokbendaniin.
11 Ee angkodmi, inamen arewa kumunkingkaab, inamen amunmo kumunkingke. Kanembed amun yaambed awinoon kuu God ye karub kii. Ma, kanembed arewa yaambed awinoon kuu God yekaadban. 12 Demetirius kuu nimakarub korembed amun ande bunbeniwen. Kwane, anam yaambed kuu ye ibmo keroon. Kwane, nub kangkon ye kuu karub amun andenuwen. Yiibkaadaa, nub weng korokbi kuu anam.
13 Ne kuu weng yemoon yedmebdandamaan kumban, kerek yaambed wongkani keebdi kuu ne dowakenban. 14 Kwani kowe, aron doboobban ari kuu ewiib yaa mananiin ande meenaan. Kwamune kumbed kiring ine dakmanuub.
15 Eb yaa yewenub kerubdok. Angkodmi yena keyaambed eb yaa kubebdi weng keebdiib. Nub angkodmia kuyaa doriib kuu mimim kubende.