The New Testament in the Yongkom Language

Western Province, PAPUA NEW GUINEA

Buk kemaom kee Yariman Yesu Keresu ye dowad wongkiwen. Ye weng amun ye dowad buk kemaom kee dakmoon. Kwane, unyeman anukbed Kingkin Karadmombed karub yaa inamen kaadkeri kondoone weng amun kee wongkiwen. Yesu Keresu wooneen yaronbed mene ari kibik weng amun kee Yongkom wengbed ongmiwen kuu weeb 2003yiib, nub kalendaa ye weeb kimingki yeman kii. Buk kee nimakarub komarewa God yaa ikakman kunum keri ye kiwaan dakmenaboon. Kemaom kuu buk 27iib, kumban yi korem kuu kiwaan mimo God ye Mingki Yesu Keresu ye kerekmen korokbiwen.

Matyu yoom Maak yoom Luk yoom Yoon yoom Pool yoom karub yena yoom yimbed buk kee Gurikdan yi wengbed wongkiwen. Amaanbed karub yenambed Gurik weng kee wedmekorib, ben nengkire weng maa maa yi weng yaa nongkobiwen. Buk kee kwane nengkire wongkiwen. Weng kee aningko mimo mimo ben nengkire wongkindo, Gurik ye weng id kuu ben nengkire, weng id mim kuu kwamunemo Yongkom wengbed ben nongkobe wongkiwen. Gurik weng kande weng mimim aningko wongkiwen ye kiwaan kerene wene nengkidmiwen karen weng id kuu kirod kandimokban karen. Kwanekob, ves yena kuu ben dabokne Yongkom weng dakmi ye kiwaan yaambed nengkidmiwen kowe, ves namba kangkon ben dabokne wongkiwen, ves 2-3 o 10-12 kwamune areb kui.

Yesu bobnoonbed ari wene weeb 300iib areb keruune kuristen korok korok yi mene nedbenib buk maa maa andangkenib weng mimo kerenib buk 27iib kuu Yesu ye weng amun anam kii ande ben nong- kobiwen. Kwane weeb yemoon kere amaan arimbed karub yena kuu saptayiib vesiib ben dabokne winiwen, kirodmo kuyaa kii ande baamoni kaadkeri dowad. Buk ibduruk wongkiwen ye kuru kuu kwamune yenayiib dingkimbed wongkanabiwen. Kwane wongkanabe kopis yemoon keriwen. Kumban amaanbed wedmiwen kuu kopis yena kuu ves yena ariyiib kuned kopis yena kuu dowan. Kwani kowe, kwamune keroon ye dowad ambobi weng yena kuu dabderem dungkun yiri wongkoon, buk keyaombed.

Buk Matyumbed wene Buk Korokboon, buk korem kuu andowe ambobi weng wengiib. Kuye weng kuu buk kuu kanembed wongkoon ye wengiib komo dowad wongkoon ye wengiib komo aron areb wongkoon ye wengiib weng yenayiib. Kukuu yiib awandi dowad wongkanabiwen. Kwane, dungkud ambobi weng wongkanabiwen, wongkoonman ye meeni inamen darewoob korokbi ye dowad.

Kwane, buk korem aombed ves yena ben wenore korok wengiib wongkiwen. Korok weng kuu God Ye Wengban, kukuu God ye weng id korokbi dowad weng dukmen wongki yeman. Korok weng yena yiri kuu weng id ibmo ye weng God ye weng aombed karub maambed wongkoon kuye buk aningkoyiib ves nambayiib wongkiwen.

Kwane, buk aom beegod yena dungkun yiri nongkobiwen kuu weng id ambobi wengiib wongkiwen. Ambobiwen ye ves kuyaa kekamune bereng * kowiwen. Kuye bereng kuu dungkun yiri ambobi weng angkeen andi yeman.

Ves yena andowe wongkiwen kuu ben aom kobkokmo keriwen, kukuu komkum kui. Komkum yena kuu God Ye Weng wongkoon- manbed God Ye Kerekmen Korokbi Ye Weng Ibduruk yaambed boon kowe, kunayambed boon ye bukiib vesiib kuu beegod dungkun yiri nongkobiwen. Kuyaa kuu buk aningko kuu dukmen wongkiwen, dukmen wongki ye kiwaan kuu Buk Aningko Korokbi Weng aombed.

God Ye Weng ye buk yeenbon ye yoman kuu kumkam ayoob, mim kuu Weng Yena Ye Ambobandi Weng, maa kuu Ambobi Korok Weng, Kiwaan Maa Maa Kedmengki Weng Nekwiwen. Weng maa ye id o karub ye kuu kane ande kaadkerandameb kuu Weng Yena Ye Ambobandi Weng yaa wene kuye weng wedme kimingke. Ambobi Korok Weng kuu korok wengiib, korok weng maa yaa inamen ariyiib kaadkerandameb kuu korok weng yiri ye vesiib kimingke. Kuye ves kuu korok weng yaa korobe kedmengkandi yeman.

God Ye Weng kee komo dowad wongkiwen kuu God yekareb dakme korokboon, kuu Yesu yaa anam andi dowad, Yoon 3:15-17a,36 kimingke. God ye kangkon korokboon kuu Buk kembed nub awandodned kaadkere ye dowaken yaambed dobiri ye kiwaan arimbed dobirime anded, 2 Timoti 3:16 kimingke. Kwani kowe, inamen ayoob keyaa Godbed awabdoko anammo awine kande.

This book is a translation of the New Testament into the Yongkom language. This is the language of approximately 4,000 people who live along the west side of the Ok Tedi River from the Birim River in the north to south across the Fly River and to the northern tip of Lake Murray in Western Province of Papua New Guinea.