3
Yesu Kuu Darewoob Arimbed Moses Arebban
1 Kwani kowe, kuristen angkodmia karadmodan, Ewen aombed baandoone ibmo ambangkaibdan, yiib kuu Yesu yaambed meenmembirimamime. Ye kuu nub Apaso, ye kuu God Dore Nimakarub Dore Wedyiri Dobiri Karub Darewoob Arimbed, ye dowad kwamunemo dakmimaub kii. 2 Ye kine kowoon ye God yaa kuu ma domondindo, ye weng yaamo awinimo kamoon. Ye kuu Mosesbed God ye nimakarub korem yaa ma domondindo kwane areb keroon. 3 Ambib yenboon ye karub yaningko kuu kankoonimaib, ambib yaningko arebban kwamune areb kuu, Godbed wedmoon Yesu kuu aningko kankooni darewoowiib yiminmo, Moses arebban, amborom kuu Yesumbed ambib yenboon, ambib kuu God ye nimakarub kui. 4 Kedi, ambib mimim korem kuu karub mimimbed yenbenabimaib kumban, God kuu kumkam korem yenbenabi ye karub. 5 Moses kuu deme awinimo ye karub, ma domondimokbanman, God ye nimakarub korem aom kuu. Kwane, yembed dakme korokboon kuu Godbed aman ari komarewa dakmaneen ye weng ye dowad. 6 Kumban Keresu kuu God ye Mingki, ma domondimokbanman, God ye nimakarub korem yaa kuu. Kwane, nub kuu arudkono doberenub yembed kwananeen ande kerengkanuwen ye weng awine dobaranuub kuu, nub kuu ye nimakarub keranuub.
Anam Andindodan Yi Inamen Yaa Daboknendaib
7 Kowe, Kingkin Karadmo kurinbed Yuudan wabkad keriwen yi dowad yedmoon kuu kibikbed yiib yaa kwamune,
“Kibikee ye weng wengambiribka,
8 yiib niindem aom kamkono keraib,
amboon angkambed yiibbed God yaa komboon darobeniwen yaron kuu
yiib kuu wabkad kere bon keriwen areb ikakman keraib.
9 Yiib awoya yirimbed ne yaa anam dee ande komboon darobewiiwe,
weeb 40yiib nembed komo ambangkaan kuu wedmiwen.
10 Kwanekob, ne kuu kuye nimakarub korem yaa arud wandundekori,
kwane yedmaan, ‘Yi inamen kuu aron korem kimyenmo winimaib,
kwane, ne dobiri kerekmen yaa ma kaadkerindo.’ andaan.
11 Kowe, neka norin wandeni amob weng ongmeni yedmaan,
‘Yi kuu ne yiidkimbon aom awunaibban.’ andaan.” andoon.
12 Angkodmia, korobe kaadkerime, yiib kuyaa karub mim kuu ambarakmiyiib kerene niindem aom anam andindo kumbed wad doreen ye God yaa angkurom korokbenaan andid. 13 Kumban kibikbed wene yimin wandaneen yaron kuu derekmana kowe, aron korem neman kube ongkanoon ongkanoon kamime. Kwamaniib kumbed ambarakmi ye birandimbed yiib niindem aom kebendaanban. 14 Nub kuu ibduruk Keresu ye dowad kerebkarawiibban arudkonomo doburuwen kwane kangdommo dobaranuuwe yimin wandanuun kuu, Keresu yoom ibmo dobaranuub. 15 Anuk yedmoon areb kwane,
“Kibikee ye weng wengambiribka,
yiib niindem aom kamkono keraib,
yiib wabkad kere bon keriwen areb ikakman keraib.” andoon.
16 Kane awene yi kuu wengamberekorib wabkad kere bon keriwen? Yi kuu Mosesbed Idyip aombed bin angkadoroondan korem kui! 17 Kwane, weeb 40yiib kuu kane awene yaa Godbed norin keendoon? Yi kuu ambarakmiwendan, amboon angka dukniwen kui! 18 Kwane, kane awene yaa Godbed ye yiidkimbon aom awunaibban ande amob ongmoon? Yi kuu wengamberedandiwendan kui! 19 Kowe, nub wedmuub kuu yi kuu awunindeban, amborom kuu yi kuu anam andindo kowe.