8
Amob Yeeb Yaambed God Dore Nimakarub Dore Wedyiri Dobiri Ye Karub Darewoob Arimbed Kuu Yesu
1 Nubbed ke meene dakmuub ye id kuu kei, nub kuu kwamune ye God dore nimakarub dore wedyiri dobiri ye karub darewoowiib, ye kuu Ewen aom nambiri darewoowiib, ye God ye ooni ye dibirimbon ye wiwi angkambed aromkono kandimbon ari diberekore, 2 karubbed ongmindo Yarimanbed Ewen arimbed ongmoon ye kurikuri ambib anam niindem aom kuu yembed God ye deme ambangkimaan.
3 God dore Yuudan dore wedyiri dobiridan yi korok dareb dareb arimbed kuu Godbed kine kowimaan mimim kuu munob koni yemaniib dingkan aye nengke agedmo kere baeb koni yemaniib kuu bangkani dowad. Kwane, kee kine kowoonman ye kangkon bangkani yemaniib kumbed yimin. 4 Yesu kuu okad arimbed karen kuu, ye kuu God dore Yuudan dore wedyiri dobiri ye karub kerindo karen, amborom kuu karub yena kuu God dore Yuudan dore wedyiri dobiridan kerenib Moses ye amob yaambed munob koni yeman bangkanimaib kowe. 5 Yi kuu Ewen aombed kurikuri ambib kwane kuye kuru arebmo yenambed okad yirimbed yenbiwen kuye niindem aombed ambangkimaib. Kwamune areb kuu Mosesbed kurikuri kombon yenbande kamoon kuu ye yaa ongkane yedmoon, “Kaadkere, aangko arimbed komarewa korokbebdoon ye kumkam korem kuu kwane arebmo ongme.” andoon. 6 Kumban Godbed ye weng kunduk Yesu ye dowad ongmenaboon kuu arimbed, Yuudan yi dowad weng kunduk ongmenaboon arebban. Kwane, kuye weng kunduk Yesu ye dowad ongmenaboon kumbed Yesumbed God dore nub dore amob weng ongmoon kuu arimbed, kurin God dore Yuudan dore amob weng ongmoon arebban. Kwamune areb, Yesumbed God ye deme kandoon kuu arimbed, God dore Yuudan dore wedyiri dobiridan yi deme arebban.
7 Kedi, God dore Yuudan dore amob weng ongmiwen kuu yiminmo keroon karen kuu, amob weng yeeb ongmi dowad kereknindo karen. 8 Kumban God kuu Yuudan yi ambarakmi wedmekore yedmoon,
“Yarimanbed yedmoon,
‘Kedi, aron kuu menuun kii,
Israeldaniib Yudadaniib yaa amob weng yeeb ongmaniin.
9 Nembed yi awoya anuk yiri Idyip aombed dingki yaambed awinde ben kinbanmo angkanaan yaron kuu,
yi yaa amob weng ongmaan kwane areb keraanban,
amborom kuu yi kuu ne amob weng ongmaan kuyaom kuu ongme awinindo, korondiwen kowe,
ne kuu yi yaa angkurom korokbendaan.’ ” andoon.
10 “Yarimanbed yedmoon, ‘Kuyaron dowan keranuun arimbed
nembed Israeldan yaa ongmaniin keye amob weng kei.
Nembed yi inamen aom kuu ne amowamowiib nongkobeni,
yi niindem aom wongkaniin.
Ne kuu yi God keraniine,
yi kuu ne karuwa nimaya keraniib.
11 Kuyaron kuu karub kuu ye dia doreenman yaa o
karub maa kuu ye aarok yaa kuu
“Yariman yaa kunum kere kaadkerime.” ande kedmengkanaanban,
amborom kuu yi aningkoyiibbandanbed kwane wene aningkoyiibdan,
yi korem kuu ne kuu yikaadkeraniib kowe.
12 Nembed yi miin arewa ambangkembiri kuu areni,
yi ambarakmi kuu ika ma meenainban kowe ne kuu yikaadkeraniib kii.’ ” andoon.
13 Amob weng kee “amob yeeb” andoon kuu yembed ibduruk ye amob weng kuu ongme ambangkindeban yeman keroon, kwane ambangkindeban kere korobnoon yeman kee aron doboobban ari kuu dowan keraneen.