1 Nangkodmia, yiib kuyaom kuu yemoonbed kwane God ye weng kedmengkandi ye korok korok kerem andaib, amborom kuu yiib yiibkaad nub kane kane God ye weng kedmengkanduubdan kuu yobdood kamkonomo arimbed wengyundaneen kowe.

2 Nub korem kuu kiwaan yemoon yaambed ambarakmi yaa kombirimaub. Karub kanembed weng arewa ambong ma yedmindo keraneen kuu, ye kuu demkoronmo ye karub, yeka yemeren kangkadme korobe oonimaan ye karub kui. 3 Kedi, nub kuu hoos mongkodkono aom angkani yeman kankereknekorub nen dewenebanuub kuu, hoos kumundin kuu nubbed komo kamanuub kuu nub wengmo wengambaraneen. 4 Ma, kwamune motod yaa meenime. Yi kuu kedbon kedbon kwangkon nuubbed benwinimaan kumban, kamundi ye ud embeng yibi anuk angkeen kumbed motod oonoon ye karubbed awinene kunaya wanandameen kuyaamo wananeen.

5 Kwamune areb, nub ong kuu nub id aom kuyaa yone angkeen kuu embeng kumban, kuyaambed kerengkan weng miin dareb dareb meneboon. Meenime, nembereng embeng kumbed at biid koknoon yaa awine kande denaneene, kwane denenmo wene dura darewoob kuu dene dookbemoon areb. 6 Kowe, ong kuu kwane amot areb. Ong kuu arewamo, indob o dingki o yon kwamune awene arebban. Kukuu karub id kumundin kan monmare arewa kerene, inamen korem be kiwaan arewa ari nongkobimaan. Kukuu kumbaanban yamotbon ye inamen yaambed kwane ambangkimaan.

7 Dingkan maa maa korem, ayari oniib niiniib yiyiib ok niindem yiri dange weneen ye dingkaniib kuu karubbed bangkandaiwa amongkob kerimaib. 8 Kumban karub maambed ong kuu kan kwamune kerok ande ma kwanindo. Ong kuu kangkadmindeban ye barang miin arewa, arud niin ye ambod arewayiib areb.

9 Kwane, ong mimo kumbed nub Yariman Ambe God yaningko kankoonenub, angkon ong mimo kumbed karub yena yaa woonbi weng dakmimaub, kuned nimakarub kuu Godbed yeka ye kuruwak ongmendoondan kui. 10 Kube kankooni wengiib weng arewa ye woonbi wengiib kuu mongkodkono mimo kumaom kumbed menebimaan. Nangkodmia, kwamune kamaib. 11 Kwane, karamokiiwa okmanambon okiiwa kuu ok kirubdem mimombed dabokne ibmo menebanuun dee? Dowan! 12 Nangkodmia, yedob at arimbed olif yob iraneen dee o munid nong arimbed yedob yob dibaraneen dee? Dowan! Kwamune areb kuu karamok ye kirubdem aombed ok ambod amuniib yaro menebaunban.

13 Yiib kuyaom kuu kane kanembed meeni kangdomiib kerenib yorokmo meenimaib? Kee kwamune awiniibdan kuu yi meeni kangdom yaambed yika kankubune amun amun kamimaib kumbed yi meeni kangdom korokbime. 14 Kumban yiib niindem aom kuu wungkandi mung kook arewiib kirim inameniib keroka, kuyaa kerengkanaib, kuyaa aadikmaib. 15 Kwamune ye meeni kuu Ewen arimbed minimban, kukuu okad yiri yeman, id ye dowaken yeman, awad arewa ye meeni kui. 16 Kedi, kunayambed kwane wungkandiyiib kirim ye inameniib, kuyaa kwangkon ibonmo kerinban ye inameniib deme miin arewa maa maa korem kuu yiib wedmaniib.

17 Kumban Ewen arimbed minimaan ye meeni kangdom kuu ibduruk kuu karadmo, angkon ari kuu yewenubbon ye inameniib arudiibban ema dobiri ye inameniib yena yi dabderem aom dobiri ye inameniib mimyob keende kakman are nonondandi ye inamen yiminmoyiib yob amunmo iri ye inamen yiminmoyiib manmo keri ye inameniibbaniib aadikmiyiibbaniib kui. 18 Karub maa dore karub maa dore wedyiri dobere kiwaan ongme kunum keri ye karub kuu kab kibingkemoon areb yewenub bangkandaneen kuu yob wandemoon areb yorokmo dobiri kandaneen.