3
Yoon Baptaismanbed Kiwaan Ongmoon
(Mt 3:1-12, Mk 1:1-8)
1 Kwane, Romdan yi korok Saesaa Taiberiusbed oonoon kuu weeb 15iib keroon kuyaombed, Pontius Pailet kuu Yudea ambibkin aom oonoone, Erod Antipas kuu Galeli ambibkin aom oonoone, ye aagorok Filip kuu Iturea ambibkiniib Trakonaitis ambibkiniib aom oonoone, Laisanias kuu Abilin ambibkin aom oonoon. 2 Kwane kuyaron aombed, Anas yoom Kaiyafas yoombed God dore Yuudan dore wedyiri dobiridan yi korok keriiwe, amiibban ye amboon aombed God ye weng kuu Sekaraiya ye mingki Yoon yaa daanoon.
3 Kwani kowe, ye kuu wene ok Yooden yu ambibkin aom angkuun kumaom kuu dewenebene, “Ambarakmi yaa koronde amonombe baptais kere dobirime.” ande daandimaan. 4 Kwane, profesiman Aisaiyambed wongkoon kuu anam id keroon, Yoon yaa. Kwane wongkoon kuu,
“Karub maa amboon angkambed baande daandaneen kii,
‘Yariman mananeen ye kiwaan nekwime,
ye kiwaan yorokmo kerime.
5 Kwane, okad kankubune wuneen yiri korem kuu daubenib,
aangko koremiib koodbon koremiib kuu nire dabonmo ongmaniib.
Kiwaan unitawiib kuu ongme yorokmo kerenib,
kiwaan ari boknandiyiib kuu dabonmo amunmo ongmaniib.
6 Nimakarub korem Godbed bobni yaa kuu burudande bindi ye kiwaan kuu wedmaniib.’ ” ande wongkoon.
7 Kwane, Yoonbed kadaareb menebe baptais kerandamiib yaa yedmoon, “Yiib kuu niin arud niin kii! Kanembed daandeenkob God ye norin mananeen yaa kuu kirokmone wanandamiib? 8 Yiibka anam nub ambarakmi yaa kuu koronduwen ande amun amunmo kamime. Abraham kuu nub ambe andaib, amborom kuu nembed yiib yaa ke yedmaan kei, bot keembed Abraham ye dana Godbed ongmi kuu yimin kowe. 9 Kapak kuu kundukmo at ambokab yaa angkuun kowe, at korem kee id amuniibban keraneen kuu nare ben amotbon aom kiraraneen.” andoon.
10 Andoone, kadaarebbed Yoon yaa kaamoneniwen, “Kwani kowe, komo keranuub?” andiwen. 11 Kwanandiiwe, yembed yi yaa yedmoon, “Kanembed ebkad doboob ayoob keroka, maa kuu ebkadiibban ye karub yaa nonok, animan iniyiib kangkon kwamune kerime.” andoon.
12 Andoone, tak od bimaibdan kangkon baptais kerande mene ye yaa kaamoniwen, “Kedmengkandi korok, komo keranuub?” andiwen. 13 Andiiwe, Yoonbed yi yaa yedmoon, “Nimakarub yaa od kuu yiib meeniyiib arimbed yedme baib, korok korokbed komo andiwen kuu kuyaamo bime.” andoon.
14 Andoone, ana nangmidanbed ye yaa kaamoneniwen, “Nub kangkon komo keranuub?” andiwen. Andiiwe, yembed yedmendoon, “Karub maa yaa ambarakmoon ye dudi weng dakmaib. Aniin kowe od kawe ande kamimbed od baib. Yiib deme ye kakman odbed kandimaib kuu yimin andimamime.” andoon.
15 Kwane, nimakarub korem kuu Godbed kinaneene mananeenman Keresu monok ande meedmiib yaambed kowe, yimbed meeniwen kuu Yoon kuu Keresu manok andiwen. 16 Kwaniiwe, Yoonbed yi yaa inandoon, “Ne kuu yiib yaa okbed baptais kerundimain, kumban karub maa mananeen kuu korok darewoob aromkonoyiib ne arebban. Ye yonkad nong kuu nembed dudmungki kuu yiminban, amborom kuu yaningko kuu ambab ari kowe. Ye kuu Kingkin Karadmoyiib amoyiibbed yiib yaa baptais kerundaneen. 17 Ye mananeen kuu andokbi dowad mene yob nekwane kad kuu kirarundekore id amunmo bene ye animan nongkobimbon ambiwoom nongkobene kad kuu bene kumbaanban yamotbon yiri kiradmaneen.” andoon. 18 Andekore, kwane yembed yi yaa weng amun kedmengkandene weng yenayiib daandene ongkandoon.
19 Kumban Yoonbed korok darewoob Erod yaa butun kamoon, amborom kuu Erod kuu ye aagorok ye wonong Erodias awanene ambarakmi yemoon yenayiib kamoon kowe. 20 Kwanoone, Erodbed ambarakmi maa kamoon ambarakmi yena ari nongkoboon kuu Yoon kuu nende wii aom kowoon.
Yesu Kuu Yoonbed Baptais Kerunoon
(Mt 3:13-17, Mk 1:9-11, Yn 1:29-34)
21 Nimakarub korem kuu Yoonbed baptais kamendoon yaron kuu Yesu kangkon yembed baptais kerunoone, ye kuu kurikuri kameene ambid kuu bengkeroone, 22 Kingkin Karadmo kuu on arud areb ye ari wan kubudoroon. Kwanoone, ambid arimbed wengmo meneboon, “Eb kuu ne Dana, mimyob dowaken darewoob keebdaan, eb yaa anam kubimain.” andoon.
Yesu Ye Awoya Yiri
(Mt 1:1-17)
23 Kwane, Yesu kuu weeb 30yiib kerekore, God ye deme kuu andowe ambangkoon. Nimakarubbed meeniwen kuu ye kuu Yosef ye dana mingki manok andiwen.
Yosef kuu Heli ye dana mingki,
24 Heli kuu Matat ye dana mingki,
Matat kuu Livai ye dana mingki,
Livai kuu Melki ye dana mingki,
Melki kuu Yannai ye dana mingki,
Yannai kuu Yosef ye dana mingki,
25 Yosef kuu Matatias ye dana mingki,
Matatias kuu Amos ye dana mingki,
Amos kuu Nahum ye dana mingki,
Nahum kuu Esli ye dana mingki,
Esli kuu Nagai ye dana mingki,
26 Nagai kuu Maat ye dana mingki,
Maat kuu Matatias ye dana mingki,
Matatias kuu Semein ye dana mingki,
Semein kuu Yosek ye dana mingki,
Yosek kuu Yoda ye dana mingki,
27 Yoda kuu Yoanan ye dana mingki,
Yoanan kuu Resa ye dana mingki,
Resa kuu Serubabel ye dana mingki,
Serubabel kuu Sealtiel ye dana mingki,
Sealtiel kuu Neri ye dana mingki,
28 Neri kuu Melki ye dana mingki,
Melki kuu Adi ye dana mingki,
Adi kuu Kosam ye dana mingki,
Kosam kuu Elmadam ye dana mingki,
Elmadam kuu Er ye dana mingki,
29 Er kuu Yosua ye dana mingki,
Yosua kuu Eliesee ye dana mingki,
Eliesee kuu Yorim ye dana mingki,
Yorim kuu Matat ye dana mingki,
Matat kuu Livai ye dana mingki,
30 Livai kuu Simeon ye dana mingki,
Simeon kuu Yuda ye dana mingki,
Yuda kuu Yosef ye dana mingki,
Yosef kuu Yonam ye dana mingki,
Yonam kuu Eliakim ye dana mingki,
31 Eliakim kuu Melea ye dana mingki,
Melea kuu Mena ye dana mingki,
Mena kuu Matata ye dana mingki,
Matata kuu Netan ye dana mingki,
Netan kuu Dewid ye dana mingki,
32 Dewid kuu Yesi kuu ye dana mingki,
Yesi kuu Obed ye dana mingki,
Obed kuu Boas ye dana mingki,
Boas kuu Salmon ye dana mingki,
Salmon kuu Nason ye dana mingki,
33 Nason kuu Aminadab ye dana mingki,
Aminadab kuu Rem ye dana mingki,
Rem kuu Hesron ye dana mingki,
Hesron kuu Peres ye dana mingki,
Peres kuu Yuda ye dana mingki,
34 Yuda kuu Yekob ye dana mingki,
Yekob kuu Aisek ye dana mingki,
Aisek kuu Abraham ye dana mingki,
Abraham kuu Tera ye dana mingki,
Tera kuu Nahoo ye dana mingki,
35 Nahoo kuu Serug ye dana mingki,
Serug kuu Reu ye dana mingki,
Reu kuu Peleg ye dana mingki,
Peleg kuu Eber ye dana mingki,
Eber kuu Sela ye dana mingki,
36 Sela kuu Kainan ye dana mingki,
Kainan kuu Arfaksad ye dana mingki,
Arfaksad kuu Sem ye dana mingki,
Sem kuu Noa ye dana mingki,
Noa kuu Lamek ye dana mingki,
37 Lamek kuu Metusela ye dana mingki,
Metusela kuu Enok ye dana mingki,
Enok kuu Yared ye dana mingki,
Yared kuu Mahalalel ye dana mingki,
Mahalalel kuu Kenan ye dana mingki,
38 Kenan kuu Enos ye dana mingki,
Enos kuu Set ye dana mingki,
Set kuu Adam ye dana mingki,
Adam kuu God ye dana mingki, kui.