1 Kwane, yiib kuu Yesu yaa iniwen kumbed yiib niindem aom kuu aromnenib, ye mimyob dowaken yaambed yiib mimyob wandi kankubune kubenib, Kingkin Karadmo yaa mene dabokne yonendenib, mimyob keendiyiib keriwen kowe, 2 inamen ibmo kerime, mimyob konoon konoon mimo kerime, kingkin ye kerekmen yaambed mimo kerime, meeni mimo kerime, kui. Kwananiib kuu ne kubi dowaken yiminmo keraneen. 3 Komo komo ambangkandamiib kuu kirim ye inamen yaambed keraib o inameniibban ye kerengkan yaambed keraib. Kumban yiibka kankubune yirimbed kerenib, yena yi aningko benkoobime. 4 Yiib mimim korem kuu yeka ebka eb dowaken yaamo awinembaraab. Karub yena yi dowaken kerekmen yaayiib awine kandunde.

5 Yiib meeni inamen kuu Yesu Keresu ye meeni inamen areb kerime. Ye meeni inamen kuu kei.

12 Nangkodmia, kukuu kwamune kowe, ne yiib yoom dobaraan kuye aron kuu yiib kuu God yaa wengambere awine doberembiriwen, kumban kibikee ne yiib yoom dorokban kumban kuye inamen darewoob arimbed kere wengambere awine doriib kii. Kowe, kwamune ambangke wene Godbed burudande bindi ye inamen ibmo kere uniyiib kiringmiyiibbed kwane awine ambangkembirime. 13 Yiib kwanimaib amborom kuu Godbed yiib aom ambangkimaan, ye inamen amun ye kerekmen yaambed kinenib ambangkime andi ye dowad kowe.

14 Komo komo ambangkandamiib kuu mungkubmangkawiibban wengbiriyiibban kumbed ambangkime. 15-16 Kwana kumbed yiib kuu okad kiri unitab inamen miin arewadan kuyaom dobaraniib kuu, ambarakmiyiib kii ande dedmone daandiyiibban karadmo kere God ye meed ambarakmiyiibban kere dobaraniib. Kwamenib wadkeri weng yi yaa kondaniib kumbed mindong ambid ari yuudkanaan areb kwane yuraniib. Yiib kwananiib kuu Keresu ye aron arimbed kerengkanbed yedmaniin, “Kwamune keriwen kowe nembed God ye deme ambangkaan kuu idiibban kerindo, idiib keroon kii.” andaniin.

17 Yiib anam andi kumbed God yaa munob koni yeman areb konimaib kuu kuye animari kuu durud yewed kandaan kumbed ne wadkeri kuu ok amun God yaa koni dowad ondukne wenemoon keraan kumban, kuyaa kuu dowakeniib kereni yiib korem ye kubi kuu ne yoom kubaan kii. 18 Kowe, yiibka kwangkon kuyaa kubenib ne kubi kuu yiib yoom kubime.

19 Yariman Yesu ye dowaken keraneen kuu, nembed Timoti kuu kibirebya yiiwiib yaa nenkowaniin. Kwananiin kumbed yiib weng kuu keewaneene wengambereni kubaniin. 20 Nembed meenimain areb ye kuu ibmo, yiib dobiri anammo awandi ye karub kuu yembedmo, nembed karub maa kuye dowad ma wedmenindo. 21 Amborom kuu kuristen angkodmia korem yena kuu yeka yeka yi dobiri yaamo meendobimaib, Yesu Keresu ye meeni dowaken ye deme yaamban kowe. 22 Kumban Timoti kuu ne yoom kuu dana mingkimbed awodki yaa awanenimaan areb ibonmo Yesu ye weng amun ye deme ambangkimaub kumbed korokboone yiibkaadkeriwen ye kuu karub amun. 23 Kwani kowe, ne dowaken kuu yimbed dudberewaniib o komo keruwaniiwe wedmaniin kuu erebnarimban Timoti kuu yiiwiib yaa nenkowaniin andid. 24 Ne kuu Yariman yaambed keyiib kembed arudkonoyiib keraan kuu aron dukmen arimbed yiiwiib yaa nekayiib mananiin.

25 Kumban Epafrodaitus yiiwiib yaa ikakman nenkowaniin ande meenaan. Ye kuu ne kuristen angkodmi, ne yoom deme ibmo ambangkuwenman, ibmo Yesu ye ana nangmuwenman, yiibbed yiib wengiib nenkowiiwe ne dobiri dowad awawok monoonman, ye kuu nembed meenaan kuu yiiwiib yaa ikakman nenkowaniin kumbedmo yimin. 26 Amborom kuu ye kuu yiib yaa mimyob inamen darewoob keendekore, anikad keroon yiib wengambiriwen kuyaa meeni darewoob kere kubiyiibban keroon kowe. 27 Anamaa, ye anikad kerunoon kuu bobnok andoon. Kumban Godbed ye yaa mimyob keenoone amun keroon. Godbed kwanoon kuu ye yaamomban, ne kuu Epafrodaitus bobnok andoon yaa meendobi darewoob keraan kowe ne yaa kwangkon mimyob keewoon, kubiyiibban ye mimyob yenayiib ne kandain ye dowadbed. 28 Kwanikob, ne dowaken ariyiib keraan kuu ye kuu nenkowako yiiwiib yaa monok andid. Kwani kowe, ye wedmenaniib kuu yiib kubaniiwe ne meendobembiri kuu kankubunaneen. 29 Yariman yaningko yaambed kubi darewoowiibbed ye kuu kubenime. Karub Epafrodaitus areb kwamunedan kuu yiib wedmaniib kuu yi aningko kankoonime. 30 Amborom kuu yiibbed yiib awawi ne yaa kawi yiminban kumbed Epafrodaitus yeka ye wadkeri kawe awawoon kuu Yesu ye deme dowadbed ye bobnok andoon kowe.