1 Gwluzh ngulo mded re kwaane, zee nzha Jesús kwaan re chiibchop xaa mseed lo xaa, nzhazaa xaa kwent cheen wdizh chul cheen pa nabeyy Dios re yezh nu re rench. 2 Nu noka nzha lak ngwnaa, me mloo Jesús mbi mal lextoo nu me msekwen xaa lo yalyizh. Tub me nzha kwaan lee xaa le Mari, me yezh Magdala, me ne mloo xaa gazh mbi mal lextoo; 3 nu stub me le Juan sa Chusa, xaa mkee zhiin lo Herod; nu stub me le Susana, nu noka nzha zlakra ngwnaa. Nu re ngwnaa ne mzaa me kwaana nkano me lo Jesús nu lo re xaa xaa.

4 Zyen doo myet mroo lazh yiyon kwaan yé Jesús, snee mod zyen doo myet mdop lo Jesús, zee mzaa Jesús kwent nabix lo re xaa nu nzhé xaa:

5 —Nal lee na za tub kwent lo gu cheen tub xaa nchech nzhobxtil lo yo. Nu gorna kachech xaa ben lo yo tub naza mla leen naz, nu mtaazh xaa ticha, nu lee mbyin ngwa nu ngutawa. 6 Stub naza mla lo ke pa nyent zyen yo; nu gorna mlena mxena chep, nu mbizha nel nyent gop xena. 7 Nu lee stub naza mla leen yag yich; gorna mlena, mlena leen yag yich zee mdin yicha. 8 Per lee stub naza kwaan mla lo yo wen, mxen dooya nu mzaaya zyen doo nzhobxtil, axta tub yiyoo nzhobxtil mzaa tub ben. Sbaa nak kwent.

Nu dublegan nzhé Jesús:

—¡Loka cho nzob nzha, nzhaal gon kwaane!

9 Lee re xaa mseed lo Jesús mnabdizh lo Jesús:

—¿Xomod nak kwent ne?

10 Jesús mkeb lo re xaa nu nzhé xaa:

—Dios mzaa yek re gu zee ne gu xomod nak re kwaan nanyunt cheen pa nabeyy Dios; per lee lo stub naz xaa nii na duzna kwent nabix, nu zee nixa wii xaa nu naluta lo xaa, nu nixa gon xaaya nu nalata yek xaa.

11 ’Snee nak kwent nabix ne: Lee nzhobxtil nak kwenta xtizh Dios. 12 Lee nzhobxtil kwaan mla leen naz nak kwenta re xaa nzhon xtizh Dios, per lee Maxuu nzha nkiiba lo xaa zee nawiit xaa lo Dios nu zee nalet xaa gan yalnaban kwaan tira. 13 Lee nzhobxtil kwaan mla lo ke pa nyent zyen yo nak kwenta re xaa nzhon xtizh Dios, nu nyakdoola xaa mkayaa xaaya, per nanyet nzo xaa lo xtizh Dios; ngwii xaa lo Dios tub tyemp, per gorna nzhin tub yalzi lo xaa zee nlaa xaa Dios. 14 Lee nzhobxtil kwaan mla leen yag yich nak kwenta re xaa nzhon xtizh Dios, per chepse chepse lee re xgab yizhyo ne nle gan lo xaa nu re demi kwaan nkano xaa nu re kwaan nlu chul cheen yizhyo ne, ngin xtizh Dios lextoo xaa nu kwaane nle zee nanzaat xaa xle. Lee xaa nak kwenta tub nzhobxtil kwaan ngin yag yich nu nanzaata nzhobxtil. 15 Per lee nzhobxtil kwaan mla neb lo yo wen, nak kwenta re xaa nzhon xtizh Dios kwaan dub lextoo xaa, nu nle xaa re kwaan nzhé xtizh Dios, nu nye nzo xaa lo xtizh Dios, nu xaa ne nzaa zyen doo xle.

16 Noka nzhé Jesús:

—Nik tub xaa nankeet tub bruj nu nsaaw xaa yeka kwaan tub almud o chep xaaya xan loon, sinka nzob xaaya pa ya nzeb, zee zaaya xni lo re xaa rep leen yoo. 17 Nik tub kwaan xlaan nyent mod nalut, nixa tub kwaan nzholaan nyent mod nanet re xaa loya.

18 ’Kenzha wen gu re kwaan nii na. Nel re xaa nkano kwaan, kayaa xaa masraya; per lee re xaa nankanota axta chep re kwaan nkano xaa yiib lo xaa.

19 Xnaa Jesús nu re wech Jesús mzhin pa nzo Jesús, per nyent mod bii xaa gax lo Jesús nel zyen doo myet nzhi baa. 20 Nu gorzee nzhé lak xaa lo Jesús:

—Xnaa lu nu re wech lu nzo naz jwer, nzhekla re xaa nii xaa lo lu.

21 Lee Jesús mkeb nzhé:

—Re xaa nzhon xtizh Dios nu nle kwaan nzhéya, re xaa zee nak mod xnaa na nu mod re wech na.

22 Tub mbizh Jesús mzeeb leen tub kano kwaan re xaa mseed lo xaa, nu nzhé xaa lo re xaa:

—Ya be stub ta roo nistoo.

Zee nzhaze xaa nzha xaa leen nistoo. 23 Nu gorna nzhaze re xaa leen nistoo, ta ngot Jesús. Nu lee tub mbi dox doo mroo leen nistoo, nu mzelo nis nguzhe leen kano, nu nzho reyez la kano naz xan nistoo, nu kaded doo xaa bid. 24 Kwaanzee mloo xaa mkaal lo Jesús nu nzhé xaa:

—¡Maestr! ¡Maestr! ¡Nzhalaw be leen nistoo!

Jesús nguxche nu mgalno nistoo nu mbi, nu gorzee lee nistoo nu mbi zheta ngok. 25 Gwluzh nzhé xaa lo re xaa mseed lo xaa:

—¿Chozhiin nzheb re gu? ¿Ma kwaan ngwii gu lo Dios?

Per lee re xaa mzheb doo nu mdedyall xaa, nu mnabdizh xaa lo wechxinn xaa:

—¿Cho nak xaabyi ne, nu axta nistoo nu mbi nzhon xtizh xaa?

26 Mzhin xaa stub ta roo nistoo cheen Galilea yizhyo kwaan le Gadara. 27 Nu gorna mla Jesús leen kano zee mroo tub xaa yezh, mbii gax lo Jesús. Xaa ne nzho mbi mal lextoo. Nzha zyen doo mbizh nanzhaktra xaa xab xaa, nixa nanzhotra xaa li xaa, sinka lee xaa nyu duzna leen yeer pa nyu re xaa ngut. 28 Gorna ngune xaa lo Jesús, nu mkichxub xaa lo Jesús nu mbazhe xaa nzhé xaa:

—¿Chozhiin nze lu lo nu, Jesús Xgann Dios, xaa nzob naz yiba? ¡Naab na lo lu nateedt lu nu bid!

29 Nzhé xaa kwaane, nel Jesús mgalno re mbi mal kwaan nzho lextoo xaa, zee mrooya lextoo xaa. (Zyen welt nzen nye mbi mal xaa. Nu nixa nkado re myet yaa xaa nu nii xaa kwaan kaden, per nle xaa gan nchoog xaaya nu nzhe mbi mal xaa naz wen.) 30 Jesús mnabdizh lo xaa:

—¿Cho le lu?

Nu lee xaa mkeb nzhé:

—Na le Zyen Doo.

Nzhé xaa kwaane, nel zyen doo mbi mal nzho lextoo xaa. 31 Nu lee re mbi mal ngunaab lo Jesús:

—Nagubit lu re nu leen yerdoo.

32 Nel gax zee nzhi zyen doo kuch kayaw, zee lee re mbi mal nzhé lo Jesús:

—Laa zeeb re nu lextoo re kuch ba.

Nu zee lee Jesús mzeyal. 33 Nu lee re mbi mal mroo lextoo xaa nu nya ngu lextoo re kuch. Nu leeka gorzee mzelo re kuch mrexonn nkato naz yat nu mla axta leen nistoo. Nu ngwep re ma nis nu tira ngut re ma.

34 Per gorna mzeen re xaa nkanap re kuch kwaane, gorzee mrexonn xaa nu nya xaa mzaa xaa kwenta lo re xaa nzo wen nu lo re xaa yezh. 35 Gorzee nzhasewii re myet nen cho kwaan ngok. Nu gorna mzhin xaa pa nzo Jesús, zee mlu xaabyi, xaa mroo re mbi mal lextoo, nzob lo Jesús, nakla xaa ler nu ngokwenla xaa, zee mzheb doo re xaa. 36 Nu lee re xaa ngune ngok kwaane mzaa kwent lo re xaa nen xomod ngokwen xaa ngu mbi mal lextoo. 37 Rese myet, xaa yizhyo Gadara, nzhé lo Jesús zee nya Jesús, nel nzheb doo re xaa. Kwaanzee lee Jesús mzeeb leen kano nu nya. 38 Lee xaabyi kwaan mroo re mbi mal lextoo nzhé lo Jesús:

—Laa reke na tich lu.

Per Jesús mnabeyy xaa, zee lake xaa zee zaa xaa kwent lo re xaa:

39 —Zyaa garli lu, nu guzh re kwaan mle Dios lo lu.

Lee xaabyi zee nya, nu mzaa xaa kwent kwaan mle Jesús lo rese xaa dub yezh.

40 Gorna mbare Jesús stub ta roo nistoo, nyakdoola re myet mkayaa xaa xaa, nel rese xaa nkambaz xaa. 41 Nu gorzee mzhin tub xaa le Jairo, xaa nak tub xaa nabeyy pa nkasa re xaa Israel nseed xaa xtizh Dios. Xaabyi ne mkichxub lo Jesús nu ngunaab xaa zee ya Jesús garli xaa, 42 nel nkano xaa tubka xchap xaa, mad nzho kan tub chiibchop liin, mer yet. Nu gorna nzha Jesús zyen doo myet nzhake tich xaa nu ntaaw doo re myet xaa. 43 Lo re myet zee nzha tub ngwnaa, me nzhala chiibchop liin ne nzak. Tubka nded ren lextoo me. Nu mlux me rese kwaan nzhap me ngwa me lo re doktor, nu nik tub xaa namlet gan sekwen me. 44 Ngwnaa ne mbii naz tich Jesús, nu mgal me cho xab xaa. Nu leeka gorzee lee ren kwaan ded lextoo me mlaz. 45 Zee lee Jesús mnabdizh:

—¿Cho mgal cho na?

Nu rese xaa nzhé:

—Namgalt na cho lu.

Per lee Pér nzhé:

—Maestr, rese xaa ntaaw lu nu nzobya lu.

46 Kwaanzee Jesús mbare nzhé:

—Nzho tub myet mgal cho na, nel mzeen na mroo yalngezh cho na.

47 Per lee ngwnaa ne nyent mod kaxlaan me nzheb me nu mbii me gax mkichxub me lo Jesús. Nu nzhé me delant lo re xaa, cho zhiin mgal me cho xab Jesús, nu xomod ta ngokwen me mgal me cho xab xaa. 48 Jesús nzhé lo me:

—Xchap na. Nel mwii lu lo Dios, zee ngokwen lu. Nal wen nya lu.

49 Seetaka kanii Jesús gorna mzhin tub mos lo Jairo nzhé lo Jairo:

—Lee xchap lu ngulola ngut, nankintra nii lu lo maestr.

50 Per Jesús mbin kwaan nzhé mos nu nzhé xaa lo Jairo:

—Nazhebt lu. Nebse wii lu lo Dios, lee xchap lu roban.

51 Nu gorna mzhin xaa garli Jairo, namlaat Jesús mzeeb re xaa kwaan lee xaa, nebse mzeeb Pér, Chag, nu Juan kwaan xuz mad nu xnaa mad mzeeb. 52 Rese xaa nzhi nzhonn nu mbazhe nel ngutla mad, per lee Jesús nzhé lo re xaa:

—Nagonnt gu nel nanguta mad, nebse naxna mad.

53 Rese xaa mxizhno Jesús, nel nela xaa ngut mad. 54 Zee mzen Jesús yaa mad nu ngunii xaa dub gan nu nzhé xaa:

—¡Mad, guxche!

55 Nu lee mad mbare mroban. Nu gorzee nguxche mad, zee mnabeyy Jesús zaa xaa kwaan gaw mad. 56 Mdedyall doo xuz mad nu xnaa mad. Per lee Jesús nzhé lo re xaa nik tub kwaan ngok nayét xaa lo re myet.