1 Jesús nzhé lo re xaa mseed lo xaa:

—Telisa yo xaa kiil gu le gu jwalt lo Dios, per bid ded doo xaa kiil sa myet nu nle zee ralnii sa myet. 2 Mas wen kee xaa tub ke gro doo yenn xaa nu gobi xaa xaa leen nistoo, ke le xaa zee tub re xaa chut ne le jwalt. 3 Kwaanzee ¡list gok gu! Chelee tub wech lu le tub jwalt lo lu, bgalno lu xaa nu chelee xaa laa xaa kwaan nawent kwaan mle xaa lu, byenlazh kwaan mle xaa lu. 4 Nu chelee xaa mle xaa jwalt lo lu gazh welt tub mbizh, nu gazh welt bare xaa lo lu nu né xaa lo lu: “Yenlazh kwaan mle na lo lu”, zee nzhaal yenlazh lu kwaan mle xaa lu.

5 Lee re xaa mseed lo Jesús nzhé lo xaa:

—Ble zee mas wii nu lo Dios.

6 Zee lee Xaa Nabeyy nzhé lo re xaa:

—Chelee gu ngwii gu lo Dios, lalsa paro na tub bizh dik cheen mostas, nzho mod yé gu lo yag ne: “Bachii nee nu bzo axta leen nistoo”, nu leeya gon xtizh gu.

7 ’Chelee tub gu nkano tub mos xaa nkee goon o xaa nkano xma gu naz wen, gorna mbare xaa nya xaa wen, at nambezht gu lo xaa: “Bded zee gaw lu”; 8 sinka mbezh gu lo xaa: “Bdexkwaa kwaan gaw xchee na nu list bzo koo lu kwaan leen xkyann na gorna lee na kayaw nu kayoo. Nu gorna yilo gaw na zeesi nzho mod gaw lu nu go lu.” 9 At nixa dixkix nanzaat gu lo xmos gu, xaa mle xchiin gu. 10 Nu leeka snee re gu, gorna yilo le gu re kwaan mnabeyy xaa gu, guzh gu: “Nak re be tub mos xaa nanont, nel nebse kwaan nzhaal le be, mle be”.

11 Gorna lee Jesús nzha naz yezh Jerusalén, mded xaa roo wri yizhyo cheen Samaria nu cheen Galilea. 12 Nu gorna mzhin xaa tub yezh, zee mbii chii xaa nzak yalyizh kwaan nyall cho lo Jesús. Nu zit mzo re xaa lo Jesús. 13 Nu dublegan nzhé xaa:

—¡Maestr! ¡Jesús! ¡Blesla lu ne lu re nu!

14 Gorna ngune Jesús lo re xaa zee nzhé Jesús lo re xaa:

—Gwa gu nu blu gu gu lo re ngwleyy, lee gu ngokwenla.

Nu gorna nzhaze re xaa naz, lee yalyizh kwaan nzak xaa ngokwen. 15 Zee lee tub xaa mbare, gorna mzeen xaa lee xaa ngokwen, nu dublegan nzholl xaa lo Dios, 16 nu mkichxub xaa nu mkichyek xaa lo Jesús, nu nzhé xaa:

—Dixkix lu.

Nu xaa ne nak tub xaa Samaria.

17-18 Zee lee Jesús nzhé:

—Ngu chii xaa msekwen na per tubka xaa stub yizhyo mbare mzaa dixkix lo Dios. ¿Per ma stub yee xaa msekwen na?

19 Zeera nzhé Jesús lo xaa:

—Guxso nu zyaa. Nel mwii lu lo Dios zee ngokwen lu.

20 Zee lee re xaa fariseo mnabdizh lo Jesús nu nzhé xaa:

—¿Pok zhin yalnabeyy cheen Dios?

Jesús nzhé lo xaa:

—Gorna zhin yalnabeyy cheen Dios, naluta. 21 Nayét xaa: “¡Wii gu, leeya nzo nee!” o “¡Leeya nzo baa!” Nel lee mbizh kwaan nabeyy Dios mzhin gaxla lo re gu.

22 Zee nzhé Jesús lo re xaa mseed lo xaa:

—Zhin tub mbizh leezha zoblazh gu ne gu mbizh kwaan nabeey na, Xaa Mzhin Ngok Myet, nu nanet guya. 23 Lak xaa yé: “Lee xaa nzo nee, lee xaa nzo baa”, nayat gu baa nixa nareket gu tich xaa. 24 Gorna bare na, Xaa Mzhin Ngok Myet, gaka mod la tub balngwzi; lee xni cheena la dubse yizhyo. 25 Per yilotlaka nkin ded doo na bid, nu lee re myet xaa nzhi re mbizh ne, nakayaat xaa na. 26 Kwentaxa ngok re mbizh cheen Noé, sbaaka gak gorna bare na. 27 Re mbizh cheen Noé, gorna zeeraka la yey lux re kwaan nu zeeraka zeeb Noé leen bark, lee re myet seetaka nzhaw nu nzho nu nchelya. 28 Nu leeka snee ngok re mbizh cheen Lot, lee re myet nzhaw nu nzho, nzi xaa nu nto xaa, nzhaan xaa nu nza xaa yoo. 29 Per lee mbizh leezha mroo Lot yezh Sodoma, mroo ki nu azufre naz leen yiba nu mod yey mlaya leen yezh, nu mluxa dubse Sodoma. 30 Sbaaka gak mbizh leezha yal na. 31 Lee mbizh zee, lee xaa nzob yek yoo, nakoot xaa re xcheen xaa kwaan nzho leen yoo, nu lee xaa nzha naz wen, nabaretra xaa garli xaa yaadxii xaa xcheen xaa. 32 ¡Bselazh gu cho kwaan ngok kwaan sa Lot!

33 Xaa kwaan tira nanzheklat yet lo yizhyo ne telisa yet xaa, per lee xaa kwaan tira nanzhebt yet lo yizhyo ne, xaa ba le gan yalnaban kwaan tira. 34 Nu wlipa na nii na lo gu, yaal zee chop xaa naxna lo tub loon, tub xaa wee xaa nu stub xaa lake xaa. 35 Chop ngwnaa tubka nkayoo; tub me wee xaa stub me lakeka xaa. 36 Chop xaabyi tubka nkee zhiin naz wen; tub xaa wee xaa nu stub xaa lakeka xaa. 37 Zee mnabdizh xaa lo Jesús:

—¿Pa ded re kwaane, Xaa Nabeyy?

Nu lee Jesús nzhé:

—Pa nax tub ma ngut, baa ndop re ngolbech.