1 Mzhin gaxla mbizh la yalni kwaan le Paskwa, zee selazh re xaa Israel xomod mloo Dios re xey xaa Egipto, nu lee lo yalni ne nzhaw xaa pan kwaan nanyut lebadur leen. 2 Nu lee re ngwleyy non, nu lee re maestr xaa nlu xtizh Dios, kakwaan xaa mod zen xaa Jesús xlaan, zee gut xaa xaa, per mzheb xaa ne xaa re myet.

3 Zee lee Maxuu mzeeb lextoo Judas, xaa le Iscariote, tub xaa lo re chiibchop xaa mseed lo Jesús. 4 Judas ngwa mdizhno re ngwleyy non nu re polisi, xaa nkanap yidoo, zee ne xomod zaa Judas Jesús lo re xaa ba. 5 Nyakdoola re xaa nu nzhé xaa:

—Nal kix nu ka lu.

6 Zee lee Judas myaan kwaan re xaa zee zaa xaa Jesús lo re xaa, nu mkwaan xaa le xaaya leezha nyent zyen myet.

7 Mzhinla mbizh cheen yalni kwaan le Paskwa, mbizh kwaan nzhaw xaa pan kwaan nanyut lebadur, leeka mbizh kwaan nteed xaa mbakxiil lo Dios. 8 Jesús mxaal Pér nu Juan nu nzhé xaa lo rop xaa:

—Gwa gu nu bdexkwaa xchee kwaan le Paskwa gaw be.

9 Per lee rop xaa nzhé lo xaa:

—¿Pa nzhekla lu yadexkwaa nuya?

10 Jesús mkeb nzhé:

—Gwa gu yezh, nu baa yizhal gu tub xaabyi, xaa nyano tub re nis. Breke gu tich xaa axta roo yoo pa zeeb xaa. 11 Yé gu lo xaa nak li yoo: “Lee Maestr né: ‘Nzhekla na gaw na kwaan re xaa kaseed lo na xchee Paskwa. ¿Pa nzob yoo gaw nu leen?’ ” 12 Nu zee luu xaa tub yoo ndok lo gu kwaan nak stub pis leen yoo ndok, pa nzho rese kwaan. Baa dexkwaa gu kwaan gaw re be.

13 Nu mroo rop xaa mseed lo Jesús. Nu mzhin xaa yezh. Nu nguzhal xaa re kwaan kwentaxa nzhé Jesús lo xaa, nu mdexkwaa xaa kwaan gaw xaa.

14 Gorna mzhin gor, mzelo Jesús ndaw kwaan re chiibchop xaa mkayaa yalnabeyy lo xaa. 15 Jesús nzhé lo re xaa:

—Nzhekla doo na gaw na xchee Paskwa kwaan re gu, gorna zer ted xaa na bid. 16 Wlipa na nii na lo gu, nabaretra na gaw na xchee ne xcha, axta yilo gak re kwaan nii xchee ne, zeera gaw naya pa nabeyy Dios.

17 Zee lee Jesús mzen bas nu mzaa xaa dixkix lo Dios nu nzhé xaa:

—Bzen guya nu bted guya lo rese wechxinn gu. 18 Wlipa kwaan nii na lo gu, nalsi nagotra na xis ub nee, sinka go na axta mbizh kwaana go naya xis ub pa nabeyy Dios.

19 Zee lee Jesús mzen pan nu mzaa xaa dixkix lo Dios nu mlerol xaaya. Zee mzaa xaaya lo re xaa nu nzhé xaa:

—Kwaane nak xbaal na, kwaan za na zee le gu gan yalnaban kwaan tira. Ble gu kwaane zee selazh gu na.

20 Leeka sbaa mzen Jesús bas, gorna ngulo ndaw xaa pan, nu nzhé xaa:

—Lee xis ub kwaan nzho leen bas ne nak ren cheen wdizh kub kwaan xo na kwent cheen re gu. 21 Wii gu, lee xaa zaa na lo re xaa nayii ne na, tubka kayaw kwaan be. 22 Wlipa na nii na lo gu, lee na Xaa Mzhin Ngok Myet, zaa xaa na lo re xaa nayii ne na, nel sbaa nak mod mle Dios xgab. ¡Per tira nawent ded xaa zaa na lo re xaa!

23 Zee rese xaa mnabdizh lo wechxinn xaa, ne xana xaa le kwaane.

24 Zee lee re xaa mseed lo Jesús mzelo nkediizha nen xana xaa nak xaa mas xaa nonra. 25 Jesús nzhé lo re xaa:

—Ne wen gu, lee re xaa nabeyy yizhyo ne, nabeyy doo xaa lo re xaa nzhi lo xaa, nu seeka re xaa non nabeyy doo xaa re xaa xaa, nu nii re xaa lo xaa: “Xaa nle yudar be”. 26 Per lo re gu nanakta snee. Blaa gu lee xaa mas non lo re gu gak mod xaa yeen. Nu blaa gu lee xaa nabeyy gu gak xmos gu. 27 ¿Cho kwaan nzak gu? ¿Cho xaa nonra, xaa kayaw o xaa kago kwaan leen yann? Lee xaa kayaw nonra lo xaa nkee zhiin kago kwaan leen yann. Per lee na nak tub xaa nkee xchiin gu.

28 ’Re gu nzo kwaan na leezha ndeed na bid. 29 Na za yalnabeyy lo gu, modxa mzaa xuz na yalnabeyy lo na, 30 zee nzho mod gaw gu nu go gu pa nabeey na, zee zob gu nabeyy gu lo chiibchop dii cheen re be.

31 Zee lee Xaa Nabeyy nzhé lo Pér:

—Pér, bkenzha kwaane. Lee Maxuu ngunaab zee nabeyy xaa gu, zee koo xaa gu, kwentaxa ngoo xaa nzhobxtil lo paj. 32 Pér ngunaab na lo Dios kwent cheen lu zee nalaat lu xomod ngwii lu lo na. Zee gorna bare lu lo na, nzhaal le lu yudar re wech lu zee noka re xaa nye zo lo Dios.

33 Pér nzhé lo Jesús:

—¡Xaa Nabeyy! List nzo na nya na yoo na kwaan lu lozhyib, nu noka list nzo na yet na kwaan lu.

34 Jesús mkeb lo xaa nu nzhé:

—Pér, lee na nii lo lu, zeeraka kozhe gaay lee lu yé chon welt nanlabeyyt lu na.

35 Jesús nzhé lo re xaa mseed lo xaa:

—Leezha mxaal na gu ngunii na lo gu zee naweet gu demi, nixa yex kwaan yo re xcheen gu leen, nixa yelyed. ¿Che nzho tub welt ngu jwalt tub kwaan lo gu?

Lee re xaa mkeb nzhé:

—Nik tub welta.

36 Zee nzhé xaa lo re xaa:

—Per lee nal xa naka; nzhaal wee gu demi nu yex kwaan yo re xcheen gu leen. Nu loka cho nankanot espad, nzhaal to xaa xkamis xaa zee zii xaa tuba. 37 Na nii lo gu, kwaan nzaa Xkyech Dios kwent cheen na nzhaal gaka, paro nzhé: “Lee re myet nzak lee xaa nak tub xaa nakap doo”. [Is. 53:12] Zee gak rese kwaan nzaa Xkyech Dios kwent cheen na.

38 Zee lee re xaa mseed lo xaa nzhé:

—Xaa Nabeyy, nee nkano nu chop espad.

Jesús nzhé:

—Wena.

39 Zee mroo Jesús leen yoo, zee ngwa xaa yi kwaan le Olib, kwentaxa nleka xaa yilo, noka re xaa mseed lo xaa ngwa kwaan lee xaa. 40 Gorna mzhin xaa baa, zee nzhé xaa lo re xaa:

—Bdizhno gu Dios zee nakiilt Maxuu gu.

41 Zee mlaa Jesús re xaa, kan tub lal paro ngol xaa tub ke kwaan yaa xaa. Baa mkichxub xaa nu mdizhno xaa Dios. 42 Snee nzhé xaa:

—¡Ay, Xuz na! Che leeya nzho moda, nalaat lu deed na kwaan nakladiizh deed na, per nagakta kwentaxa nzhekla na, sinka kwentaxa nzhekla lu.

43 Zee tub mandad cheen Dios myaad naz leen yiba mzaa jwers lo xaa. 44 Nu nales doo nzhak leen lextoo xaa, nu xche doo mdizhno xaa Dios. Nu kwenta ren nzhak nis neey ngob garlo xaa.

45 Gorna ngulo mdizhno xaa Dios, zee nguxso xaa, nu mbare xaa paro mlaa re xaa mseed lo xaa. Nu mzhin xaa lo re xaa, lee re xaa naxna, nel nales doo nzhak lextoo re xaa.

46 Zee nzhé Jesús lo re xaa:

—¿Chozhiin naxna gu? Guxche gu nu bdizhno gu Dios, zee nakiilt Maxuu gu.

47 Lee Jesús seetaka kanii lo re xaa mseed lo xaa, zee lee Judas, xaa ngok tub xaa lo re chiibchop xaa mseed lo Jesús, nze delant lo zyen doo myet. Nu mbii gax lo Jesús, ndaw xaa bit tagarlo xaa. 48 Per lee Jesús nzhé lo xaa:

—Judas, ¿che kwaan tub bit luu lu na, xaa nak Xaa Mzhin Ngok Myet lo re xaa nak zhiin?

49 Gorna ngune re xaa nzo kwaan Jesús lee kwaane kayak, zee ngunabdizh xaa lo Jesús nu nzhé xaa:

—Xaa Nabeyy, ¿che zdil nu kwaan spad cheen nu?

50 Per tub xaa nzo kwaan Jesús, mloo spad nu mchoog lad li nzha xmos ngwleyy non doo.

51 Jesús nzhé lo xaa mchoog nzha xmos ngwleyy:

—¡Laa!

Nu gorzee mzen xaa nzha xaa zee mkened xaaya stuba. 52 Jesús nzhé lo re ngwleyy non nu lo re maestr, nu lo re xaa gol, xaa kwaan nzewee xaa:

—¿Chozhiin nze gu kwaan spad nu kwaan yag zen gu na kwenta tub wann? 53 Zyen doo mbizh mzo na lo re gu lo lach roo yidoo nu namzent gu na. Per nal nze gu lo yalnabeyy cheen yalnakaw zen gu na, nel gor nal nak gor cheen gu.

54 Zee mbe xaa Jesús garli ngwleyy non doo, nu lee Pér zit zit nzhake tich re xaa. 55 Nu xsaww jwer roo yoo, mze re xaa tub bal, nu mzob re xaa dub welt lo bal zee zhe xaa. Nu noka Pér mzob kazhe lo bal. 56 Tub ngwnaa mad, me nak mos lo ngwleyy non doo, ngune lee Pér nzob kazhe lo bal, zee wen wen mwii me lo Pér lo xni cheen bal, zeera nzhé me:

—Noka me nee mkanze kwaan Jesús.

57 Pér mkade nu nzhé:

—Ngwnaa, nanlabeyyt na xaa ba.

58 Gwluzh xep lee stub xaa ngune lo Pér nu zee nzhé xaa:

—Noka lu nak tub re xaa nreke tich Jesús.

Pér nzhé:

—¡Aa, nanot na!

59 Kan stub gor gwluzh, zee stub xaa nzhé:

—Wlipa na, noka xaabyi ne mzo kwaan Jesús nel nak xaa tub xaa yizhyo Galilea.

60 Per lee Pér mkeb nzhé:

—¡Nanet na cho kwaan né lu lo na!

Nu leeka gorzee, lee Pér seetaka kawdizh lee gaay mbazhe. 61 Nu gorzee lee Xaa Nabeyy mwii lo Pér, zee lee Pér mzelazh kwaan nzhé Xaa Nabeyy lo Pér: “Zeeraka kozhe gaay, chon welt lee lu yé nanlabeyyt lu na”. 62 Gorzee mroo Pér nu nales doo ngok lextoo xaa nu mbinn doo xaa.

63 Nu lee re xaa nkanap Jesús, nxizhno xaa Jesús, nu nzaa golp re xaa Jesús. 64 Msaaw xaa garlo Jesús kwaan tub lee ler nu mbezh re xaa lo Jesús:

—¡Né, cho mkeeya yek lu!

65 Mxizhno xaa Jesús nu zyen doo kwaan nawent nzhé xaa lo Jesús.

66 Nu gorna ngulo nguni yizhyo, lee re xaa nabeyy lo re xaa Israel, xaa nak re ngwleyy non nu re maestr xaa nlu xtizh Dios mkasa, zee lee re xaa yiidno Jesús pa nzhi re xaa. Nu nzhé re xaa lo xaa:

67 —Né lo nu, ¿che lu Crist, Xaa Mxaal Dios Nabeyy?

Jesús mkeb nzhé:

—Chelee na za na kwent lo gu, nalet gu krer xtizh na. 68 Nu chelee na nabdizh na tub kwaan lo gu nakebt gu nik tub kwaan lo na. 69 Neta nalzhe naz delant lee na zoob lad li lo Dios xaa ngezh doo, nel lee na nak Xaa Mzhin Ngok Myet.

70 Rese xaa nzhé lo xaa:

—¿Che nak lu Xgann Dios?

Jesús nzhé:

—Leeka re gu nguné, lee na nak xaa.

71 Zee nzhé re xaa:

—Nankintra wdizhno be stub xaa, zaa kwent cheen xaa ne. Mbinla be mer lee xaa nguné kwaane.