1 Gorna lee Jesús ngulo ngunii re wdizh ne, mroo xaa yizhyo Galilea nu nzha xaa naz yizhyo cheen Judea stub ta roo yuu Jordán. 2 Nu zyen doo myet nzhake tich xaa nu msekwen xaa re xaa ne nzak. 3 Zee lee lak xaa fariseo mbii gax lo Jesús, nu mnabdizh xaa lo Jesús, nel nzhekla xaa kwaan xaa mod zee gaazh xaa tub kwaan tich Jesús, nu nzhé xaa lo Jesús:

—¿Che nzho mod laa tub xaabyi xngwnaa xaa chelee me mle me tub kwaan sbaasa lo xaa?

4 Lee Jesús mkeb nzhé:

—¿Che zer lab gu kwaan nzhé Xkyech Dios, leezha mdexkwaa Dios yizhyo, tubka ngwnaa nu tubka xaabyi mchaal Dios? 5 “Kwaanzee lee xaabyi roo lo xuz xaa nu lo xnaa xaa nu chelya rop sa xaa, zee rop xaa gak tubka kwerp”. [Gn. 2:24] 6 Kwaanzee nanaktra xaa chop sinka tubka myet nak rop xaa. Kwaanzee nyent mod lux rop sa xaa yalnchelya nel mchaal Dios ropse xaa.

7 Zee mnabdizh re xaa lo xaa nu nzhé xaa:

—¿Chozhiin lee Ches nzhé nzho mod laa xaabyi xngwnaa xaa, nebse zaa xaa tub yech kwaan yé mtexonn xaa me?

8 Zee Jesús nzhé:

—Ches né kwaan ba lo gu, tant ned doo gu, per yilo nanakta sbaa. 9 Loka cho xaa nlaa xngwnaa, me namchaalt nik stub xaabyi, nu ka xaa stub ngwnaa, nle xaa tub jwalt gro doo.

10 Zee nzhé re nu lo xaa:

—Cheleeya sbaa nak kwent cheen xaabyi kwaan sa xaa, mas wen nakat xaa ngwnaa.

11 Jesús mkeb né:

—Naret xaa nzho mod le kwaane, sinka nebse xaa nakladiizh leya. 12 Nzho xaa nankat ngwnaa nel sbaa ngol xaa, nu nzho zlak xaa nankat ngwnaa nel myet mle zee nayot yek xaa ka xaa ngwnaa, nu nzho zlak xaa nankat ngwnaa nel nzhekla xaa kee xaa zhiin kwent cheen pa nabeyy Dios. Xaa nzhaal yizo kwaane yizoya.

13 Nzhano xaa lak madwin lo Jesús zee zhib Jesús yaa Jesús yek mad zee naab xaa lo Dios kwent cheen mad. Per lee re nu, xaa mseed lo xaa, mgalno re xaa nzheno mad. 14 Per lee Jesús né:

—Nayiit gu lo re madwin, laa gu yiid re madwin lo na, nel lee pa nabeyy Dios nak cheen re xaa nak kwenta re madwin ne.

15 Nu mzhib xaa yaa xaa yek mad.

Zee mroo xaa baa.

16 Lee tub xaa ngwanabdizh lo Jesús, nzhé xaa lo Jesús:

—Maestr, ¿cho kwaan wen le na zee nzho mod le na gan yalnaban kwaan tira?

17 Jesús mkeb lo xaa nzhé:

—¿Chozhiin mnabdizh lu lo na cho kwaan nak kwaan wen? Nik tub xaa wen nyent, nebse Dios nak xaa wen. Per chelee lu nzhekla lu le lu gan yalnaban kwaan tira, blozhaw re wdizh kwaan né Dios.

18 —¿Xanaya? —nzhé xaa.

Zee lee Jesús nzhé:

20 Lee xaa mad nzhé lo Jesús:

—Rese kwaane kale na dubse nzexen na. ¿Cho kwaan mas nzho jwalt le na?

21 Jesús nzhé:

—Chelee lu nzhekla lu gak lu nali, zyaa nu bto rese kwaan nkano lu nu bzaaya lo prob, zee gap lu zyen doo kwaan naz leen yiba, nu breke tich na.

22 Gorna mbin xaa mad sbaa nzhé Jesús lo xaa, nales doo ngok lextoo xaa nel zyen doo kwaan nzhap xaa nu nya xaa.

23 Zee lee Jesús né lo re nu:

—¡Nagan doo zeeb tub xaa rik naz leen yiba, pa nabeyy Dios! 24 Stub welt nii na lo gu, mas nanagant zeeb tub kamey leen yeer cheen tub aguj, ke tub xaa rik le gan zeeb naz leen yiba.

25 Nu gorna mbin nu kwaane, nu nzhé nu:

—¿Cho le gan nya leen yiba chol sbaa naka?

26 Jesús mwii lo nu, nu né lo nu:

—Lo re myet yizhyo ne nyent moda, per Dios rese kwaan nzho mod le Dios.

27 Zee lee Pér nzhé:

—¡Wii lo rese nu, rese kwaan mlaa nu, nu mreke nu tich lu! ¿Cho kwaan le nu gan?

28 Jesús nzhé:

—Wlipa na nii na lo gu, gorna lee na, Xaa Mzhin Ngok Myet, zoob na nabeey na lo xni cheen na, noka re gu, xaa nzeke tich na, zob naab kwent lo re chiibchop dii cheen be. 29 Wlipa kwaane, loka cho xaa laa li, laa wech, laa bzan nu bal, laa xuz, laa xnaa, laa xinn, laa xleyo, nel nzhekla xaa zaa xaa kwent cheen na, zkayaa xaaya tub gayoo welt mas nu kayaa xaa yalnaban kwaan tira. 30 Mbizh zee, xaa kwaan non nal nagaknontra zee; nu xaa kwaan nanont nal gak non zee.