1 Zee mroo Jesús yezh Capernaum, nu nzha xaa yizhyo cheen Judea, nu noka mded xaa stub ta yuu Jordán. Nu mkasa zyen doo myet lo xaa, nu mseed xaa re xaa, kwentaxa nle xaaya rese welt. 2 Zee mzhin lak fariseo nu mnadizh xaa lo Jesús, nel nzhekla xaa kwaan xaa mod zee gaazh xaa kwaan tich Jesús, zee nzhé xaa lo Jesús:

—¿Cho kwaan nzhé ley? ¿Che nzho mod laa tub xaabyi xngwnaa xaa?

3 Zee nzhé Jesús:

—¿Xomod nii ley cheen Ches?

4 Zee nzhé re xaa:

—Ches nzhé nzho mod laa xaabyi xngwnaa xaa, nu nebse zaa xaa tub yech kwaan yé mtexonn xaa me.

5 Zee nzhé Jesús lo re xaa:

—Sbaa nzhé Ches lo re xey be nel tant ned doo xaa mod gu. 6 Per leezha mdexkwaa Dios yizhyo, tubka ngwnaa nu tubka xaabyi mchaal Dios. 7 Kwaanzee nzhé Dios: “Lee xaabyi roo lo xuz xaa nu lo xnaa xaa nu chelya rop sa xaa, 8 zee tubka kwerp gak rop xaa”. [Gn. 2:24] Kwaanzee nagaktra xaa chop sinka tubka gak xaa. 9 Dios mchaal rop xaa, zee nyent mod lux rop sa xaa yalnchelya.

10 Leezha mzhin re xaa mseed lo Jesús roo yoo, zee mnabdizh xaa lo Jesús nu nzhé xaa:

—¿Xomod nak kwaan nzhé lu lo xaa zee?

11 Jesús nzhé lo re xaa:

—Loka cho xaa laa xngwnaa nu ka xaa stub ngwnaa, mle xaa tub jwalt lo xngwnaa xaa, me mka xaa yilo. 12 Nu noka ngwnaa, me laa sa nu ka me stub xaabyi, mle me tub jwalt lo xmbyi me, xaa mka me yilo.

13 Nzhano xaa re madwin lo Jesús, zee zhiib Jesús yaa Jesús cho mad. Per lee re xaa mseed lo Jesús mzelo mgalno re xaa nzhano madwin lo xaa. 14 Jesús nguneya zee nayii Jesús lo re xaa mseed lo xaa, nu nzhé Jesús:

—Laa gu yiid re madwin lo na, nu nayiit gu lo mad. Nel Dios nabeyy leen lextoo re xaa nak kwenta re madwin ne. 15 Wlipa na nii na lo gu, loka cho gu nakayaat pa nabeyy Dios, mod tub madwin, nyent mod zeeb gu pa nabeyy Dios.

16 Nu mdeezh Jesús re madwin, nu mzhib xaa yaa xaa yek re madwin, nu ngunaab xaa lo Dios kwent cheen re madwin.

17 Tub mbizh leezha merla roo Jesús nzha, mzexonn tub xaa nu mkichxub lo Jesús, nu nzhé xaa:

—Maestr wen. ¿Cho kwaan le na zee le na gan yalnaban kwaan tira?

18 Jesús nzhé lo xaa:

—¿Chozhiin né lu lo na, na nak tub xaa wen? Nik tub xaa wen nyent, nebse Dios nak xaa wen. 19 Nela lu re kwaan mlaa Dios le be. Re kwaane:

20 Zee mkeb xaa nu nzhé:

—Axta tik na mlozhaw na rese kwaane.

21 Jesús mwii lo xaa nu mkela Jesús xaa. Zee nzhé Jesús lo xaa:

—Tubka kwaan nzho jwalt le lu. Zyaa, nu bto rese kwaan nkano lu nu bzaaya lo re xaa prob, zee gap lu zyen doo kwaan naz leen yiba, nu breke tich na.

22 Per gorna mbin xaa kwaan nzhé Jesús lo xaa, nales doo ngok lextoo xaa, nel zyen doo kwaan nzhap xaa. Nu mzen xaa xnaz xaa nya xaa. 23 Jesús mwii lo re xaa nzhi baa, nu nzhé xaa lo re xaa mseed lo xaa:

—Nagan doo zeeb tub xaa rik naz yiba, pa nabeyy Dios.

24 Ndedyall doo re xaa mseed lo Jesús leezha mbin xaa kwaane. Per lee Jesús mbare ngunii lo re xaa stub welt nu nzhé xaa:

—Xgaan na, aka nagan rep re xaa naz pa nabeyy Dios. 25 Mas nanagant ded tub kamey yeer cheen tub aguj, ke tub xaa rik le gan zeeb naz leen yiba.

26 Rese xaa mseed lo Jesús mdedyall doo xaa nu nzhé xaa:

—Chol sbaaya, ¿cho le gan nya naz leen yiba?

27 Jesús mwii lo re xaa, nu nzhé lo re xaa:

—Lo re myet yizhyo ne nyent moda, per lee Dios reseya nzho mod le Dios.

28 Pér nzhé lo Jesús:

—Wii lo rese nu, rese kwaan mlaa nu, nu mreke nu tich lu.

29 Jesús nzhé:

—Wlipa na kwaane, loka cho xaa laa li, laa wech, laa bzan nu bal, laa xuz, laa xnaa, laa xinn, laa xleyo, nel nzhekla xaa kee xaa xchinn na, zaa xaa kwent cheen wdizh chul cheen na, 30 zee gayoo welt bareya lo xaa: li xaa, wech xaa, bzan xaa, bal me, xnaa xaa, xinn xaa, xleyo xaa lo yizhyo ne, per noka ted xaa xaa bid yizhyo ne. Per zhin mbizh zee kayaa xaa yalnaban kwaan tira leen yiba. 31 Mbizh zee, xaa kwaan non nal nagaknontra xaa zee; nu xaa kwaan nanont nal gak non zee.

32 Mzen Jesús naz nzha xaa naz Jerusalén, nu nzhaner xaa lo re xaa nzhake tich xaa. Nu mdedyall re xaa, nu nle doo re xaa xgab. Zee mbe Jesús re chiibchop xaa mseed lo xaa tub lad, nu nzhé Jesús nen cho kwaan ded Jesús lo re xaa. 33 Jesús nzhé:

—Bin gu kwaane. Ya be naz Jerusalén paro zaa xaa na lo re ngwleyy non, nu lo re maestr, xaa nlu xtizh Dios; nixa na nak Xaa Mzhin Ngok Myet. Re xaa ne yé: “Xaa ne nzhaal yet”. Zee zaa xaa na lo xaa nanakt xaa sawlazh be. 34 Nu xizhno re xaa na, nu zaa re xaaya yenn na kwaan tub le yed, chuk re xaa lo na, nu gut re xaa na. Per lee mbizh yon, lee na roban stuba.

35 Chag rop Juan, rop xgann Zebedeo, ngwa rop wech xaa lo Jesús nu nzhé xaa:

—Maestr, nzhekla nu le lu tub jabor kwaan naab nu lo lu.

36 Zee mkeb Jesús nzhé:

—Guné, nen cho kwaan nzhekla gu le na lo gu.

37 Nu nzhé rop xaa:

—Zaa diizh zee zob tub nu lad li lo lu, nu stub nu zob lad rebes lo lu, leezha nabeyy lu kwaan dub yalngezh cheen lu.

38 Jesús mkeb nzhé lo xaa:

—Nanet gu cho kwaan naab gu. ¿Che zye gu ded gu bid, kwaan merla deed na, nu yet gu kwentaxa yet na?

39 Zee nzhé rop xaa:

—Zye nu.

Jesús nzhé lo xaa:

—Wli, ded gu bid kwentaxa deed na bid, nu yet gu, kwentaxa yet na. 40 Nyent mod zoob na gu lad li lo na nu lad rebes lo na, nel naleet na za kwaan zee. Kwaan zee kayaa re xaa naklakwent kayaa.

41 Leezha mbin xchii xaa mseed lo Jesús kwaane, zee nayii xaa ne xaa Juan rop Chag. 42 Jesús mrezh re xaa nu nzhé lo re xaa:

—Ne wen gu, re xaa nabeyy yizhyo ne, nabeyy doo xaa re xaa nzhi lo xaa, nu seeka re xaa non nabeyy doo xaa re xaa xaa. 43 Per lee lo re gu nagakta sbaa, sinka rebes gaka. Loka cho xaa nzhekla gak non lo re gu, xaa zee gak xmos gu. 44 Nu loka cho xaa nzhekla nabeyy lo re gu, xaa zee gak xaa le xchiin lo gu. 45 Nel na nak Xaa Mzhin Ngok Myet, nu nanzhalt na zee kee re xaa xchinn na, sinka lee na nzhal zee kee na zhiin lo rese myet, nu yet na zee zii na zyen doo xaa lo yalgut nu za na yalnaban lo xaa.

46 Leezha mzhin re xaa yezh Jericó, lee Jesús nzharoola leen yezh kwaan re xaa mseed lo xaa, nu re xaa nzha ke tich xaa. Lee tub syeg nzob roo naz naab gon lo re xaa. Xaa ne le Bartimeo, xgann Timeo. 47 Leezha mbin syeg lee Jesús, xaa yezh Nazaret nzhaded zee, zee mzelo xaa ngunii xaa dublegan:

—Jesús, lu nak xaa dii cheen rey David, bles lextoo lu ne lu na.

48 Zyen xaa nzhi zee, nzhé lo xaa:

—¡Saaw roo lu! ¿Cho bi tant kee lu?

Per mas nkee xaa bi, nzhé xaa:

—Jesús, lu nak xaa dii cheen rey David, bles lextoo lu ne lu na.

49 Zee mlaz Jesús nu nzhé lo re xaa:

—Brezh gu xaa.

Zee mrezh xaa syeg, nu nzhé xaa lo xaa:

—Byakla lu; kabezh xaa lu.

50 Nzholl xchamar xaa mlabi xaa, nu mkee xaa brink, nzha xaa lo Jesús. 51 Zee mnabdizh Jesús lo xaa:

—Guné, nen cho kwaan nzhekla lu le na lo lu.

Lee syeg mkeb lo xaa nzhé:

—Maestr, nzhekla na yani lo na.

52 Jesús nzhé:

—Nzho mod yani zaalo lu, nel dub lextoo lu ngwii lu lo na, zee gakwen zaalo lu.

Gorzee lee syeg nguni zaalo, nu mreke tich Jesús.