1 Zeera mwii na nu myun Mbakxiil cheen Dios lo na, nzoli yek yi Sión; nu kwaan lee ma nzo tub gayoo choobtap mil xaa, xaa kwaan nkee le Mbakxiil nu le Xuz xaa lechuzh. 2 Zeera mbin na tub bos kwaan nze naz yiba, kwaan mbezh kwenta tub bos cheen tub pa nla nis, nu mod bos cheen ngwzi; nu lee bos kwaan mbin na nak mod bos cheen zyen xaa kwaan kayoll bagwel. 3 Nu nzholl re xaa tub kant kub, delant lo Dios, pa nzob xaa nabeyy, nu delant lo tap xaa mban, nu delant lo re xaa gol; nu nik tub xaa nyent mod seed kant ne, nebse re tub gayoo choobtap mil xaa, xaa mzi Jesucrist nu mloo xaa lo yizhyo. 4 Re xaa ne nali nak lo Dios nu namchaalt xaa nik tub ngwnaa. Re xaa ne nzhake tich Mbakxiil naz kwaana nzha ma. Dios nu Mbakxiil mzi re xaa ne lo yizhyo, zee gak xaa mod tub gon kwaan yilotlaka lo Dios. 5 Nu roo re xaa ne nik tub yalnkade nangut; nel nzhul nak re xaa lo Dios.

6 Myun stub mandad cheen Dios lo na, xaa nzebi naz yiba, nu xaa ne nkano wdizh chul kwaan ndii tira, zee zaa xaa kwenta lo rese xaa nzhi lo yizhyo, lo xaa rese yezh, lo xaa rese dii, lo xaa nii rese dizhze, lo rese myet. 7 Nu mbezh xaa dublegan:

—Bzheb gu ne gu Dios nu bill gu lo xaa, nel mzhinla gor naab xaa kwent lo rese myet. Bill gu lo xaa mdexkwaa yiba nu yizhyo, xaa kwaan mdexkwaa nistoo nu rese pa nzhib nis.

8 Zeera nzhake stub mandad, nu nzhé xaa:

—¡Mlux Babilonia, yezh ndok, nel Babilonia mle zee le rese myet rese yezh kwaan tira nawent nak, nu nak mod msezuzh Babilonia xaa rese yezh!

9 Zeera nzhake stub mandad, nu dublegan mbezh xaa:

—Chelee tub xaa nzholl lo ma nakap nu lo maj cheen ma nu mlaa xaa nkee sey cheen ma lechuzh xaa o yaa xaa, 10 telisa naab Dios kwent cheen xaa kwaan yalnayii cheen xaa kwaan nak mod xis ub nala, nu ded xaa bid lo ki nu lo ki cheen ke azufre delant lo re mandad cheen Dios xaa nambey nak, nu delant lo Mbakxiil. 11 Nu tubka roo zhen cheen yalne cheen xaa. Nu nixa nakwazt yalne cheen xaa zhe nu yaal, re xaa kwaan nzholl lo ma nakap nu maj cheen ma, nu xaa nkano sey cheen ma. 12 Nee luu, nen xomod nye nzo re xaa mle nambey Jesús lo Dios ded bid, xaa nzhon kwaan nabeyy Dios, xaa tubka ngwii lo Jesucrist.

13 Zee mbin na tub bos kwaan nze naz yiba kwaan né lo na:

—Bkee kwaane: “Chul ded re xaa, xaa nak Xaa Nabeyy, xaa kwaan yet nalzhe naz delant”.

—Aja —né Mbi Naban—, lee re xaa kwaz deskans lo xchiin xaa, nel lee re zhiin kwaan mle xaa nzha kwaan lee xaa.

14 Mwii na, nu myun tub xkaw rus lo na; nu tich xkaw nzob tub xaa nzhak kwenta Xaa Mzhin Ngok Myet, nu yek xaa nzob tub koron or nu yaa xaa nzho tub syer ndox. 15 Nu zee mroo stub mandad leen yidoo cheen Dios, dublegan ngunii lo xaa kwaan nzob tich xkaw:

—¡Bloo syer cheen lu nu btop yalgon; nel mzhinla gor lee yalgon cheen yizhyo listla!

16 Zee lee xaa kwaan nzob tich xkaw mzee syer cheen lo yo nu mtop xaa rese yalgon cheen yizhyo.

17 Nu leen yidoo cheen Dios, kwaan nzob naz yiba, mroo stub mandad, nu noka lee xaa mkano tub syer ndox. 18 Nu lo mdo mroo stub mandad, xaa nkano yalnabeyy lo bal nu mrezh xaa dublegan lo xaa kwaan nzheno syer kwaan ndox, nu nzhé xaa lo xaa:

—¡Gwa, choog re ram yag ub kwaan nzhi lo yizhyo nel lee re ub listla!

19 Lee mandad mzee syer xaa dub lo yizhyo nu mchoog xaa rese yag ub, kwaan nzo lo yizhyo nu mchep xaa rese ub pa kichxkazii Dios re ub, kwaan yalnayii cheen xaa. 20 Nu naz jwer yezh mkichxkazii xaaya kwaan nii xaa, nu mxo ren loya, nu tant mxo ren zee tira mzhina axta yek re kabay nu mxoya kan tub chon gayoo kilómetro.