1 Ka wde, Jesúza' jali'lawe' sto shii beṉ'ka' nakgake'ne' txen cho'a Nisdo' c̱he Galileana' daa ḻekzka' le Nisdo' c̱he Tiberias. Na' ki gok: 2 Simón Pédrona' len Tomáza', beena' nsi'gake' Dídimo, na' Natanaela', beṉ' yell Canána' daa llia gana' mbani Galileana', na' c̱hopte xiiṉ Zebedewa' na' zi c̱hop beṉ'ka' nongake' Jesúza' txen lle'gake' Galileana'. 3 Na' Simón Pédrona' chi'e ḻegake':

―Sha'ch' lljx̱en' beḻa'.

Na' ḻegake' gollgake'ne':

―Ḻekzka' wza'lennto' li'.

Na'ch wyoogake' to ḻoo barkw zejgake' wxen beḻa', na' ni tlish' kono wxengake' do yel. 4 Na' cheeni'ḻesdo' bllin Jesúza' cho'a nisdo'na', na' beṉ'ka' nakgake'ne' txen aga chakbe'gakile' shi ḻen'. 5 Na'ch Jesúza' wṉie' ḻegake', chi'e:

―Le' beṉ' bish'dawaa, ¿abiṉ' senle beḻa' gaocho?

Na' che'gake'ne':

―Aga no de.

6 Na'ch che' Jesúza' ḻegake':

―Ḻi wzaḻ' yix̱j c̱helena' shḻaa de shḻi c̱he barkwa' na' idoḻ'gakb.

Na' bengake' ka golle', na' ka nan yigoyogake' yix̱ja' ḻoo nisa' aga chizogakile'n daa nyichachgan beḻka'. 7 Na' beena' ḻe chaki Jesúza'ne', golle' Pédrona':

―¡X̱anchonan'!

Na' kon ka beni Pédrona' golle'ne' ka', lii biyakwte xe'na', na' bxitee ḻoo nisa'. 8 Na' beṉ'ka' sto biyajlengake' barkwa' cho'a nisdo'na'lə, zingoyon yix̱ja' daa zinyichachga beḻka', ḻa' aga nakchan zit', ka sto guiyoa metrzan. 9 Na' ka bichejgake' ḻoo barkwa', ble'gakile' ba chi' yi'na' xṉa na' xoa to beḻ lawinna', na' dete yetxtil. 10 Na' che' Jesúza' ḻegake':

―Ḻi yiyox̱'to beḻka' zi' wxenle.

11 Na'ch wyoo Simón Pédrona' ḻoo barkwa' kwenc̱he jaselle' yix̱j beḻa' na' bigoyoe'n ax̱t cho'a nisdo'na'. Na' ḻa'kzi tolla'cha nak yix̱ja' daa ziyoon to guiyoa shiiṉiyon beḻ yeḻka', bi bcheza'n. 12 Na'ch che' Jesúza' ḻegake':

―Ḻi da gaole xsila'.

Na' ni to beṉ'ka' nakgake'ne' txen bi biyaxjgakile' ye'gake'ne': “¿Nora li'?” Ḻa' gokbe'gakile' X̱ancho Jesúza'kzan'. 13 Na'ch wbig' Jesúza' na' bex̱ee yetxtila' len beḻa' na' bi'e c̱he c̱hegake'.

14 Na' dga gok de wyoṉ shii jali'lao Jesúza' beṉ'ka' nakgake'ne' txen ka wde bibane' ladj beṉ' wetka'.

15 Na' ka bidaogake' xsila', na'ch che' Jesúza' Simón Pédrona':

―Simón, xiiṉ Jonás, ¿achakchilo' nad' aga ka to chaki beṉ'ki nad'?

Na' Pédrona' chi'ene':

―X̱an', ṉezkzilo' chakid' li'.

Na'ch che' Jesúza'ne':

―Na'len wdap bwia beṉ'ka' chonḻilall'gake' nad', beṉ'ka' nak ka xil'do' c̱ha'.

16 Na' de wchop shii wizṉabile'ne', chi'ene':

―Simón, xiiṉ Jonás, ¿achakilo' nad'?

Na' Pédrona' chi'ene':

―X̱an', ṉezkzilo' chakid' li'.

Na'ch che' Jesúza'ne':

―Na'len wdap bwia beṉ'ka' chonḻilall'gake' nad', beṉ'ka' nak ka xil' c̱ha'.

17 Na' de wyoṉ shii wizṉabile'ne', chi'ene':

―Simón, xiiṉ Jonás, ¿ana' chakilo' nad'?

Na' gokyeshii Pédrona' daa ba gok shoṉ shii chṉab Jesúza' shi chakile'ne', na' chi'ene':

―X̱an', ṉez nḻe'ilo' yog'ḻoḻte, na' ṉezkzilo' chakid' li'.

Na'ch che' Jesúza'ne':

―Na'len wdap bwia beṉ'ka' chonḻilall'gake' nad', beṉ'ka' nak ka xil'do' c̱ha'. 18 Dii ḻi nia' li', ka goko' beṉ' wew', gokw xalaano' to kwinzo' na' wyajo' kon ga wnan c̱ho'. Per kat' ba gox̱oo, wḻi nooka' na' yiwakw beṉ' yoblə xalaano'na', na' wc̱hi'e li' ga bi cheenilo' shajo'.

19 Na' daa goll Jesúza'ne' ka', bzajniile' ḻegake' ka guet Pédrona', na' daa guete' ka' sho' Chioza' balaaṉ. Na' ka wde golle' Pédrona' ka', chi'ene':

―Btiplalloo benḻilall' nad' toshiizi.

20 Na' biyec̱hj Pédrona' na' ble'ile' beena' sto, beena' ḻe chaki Jesúza'ne', noe' ḻegake'. Ḻen' wchi'e kwit Jesúza' kana' zeelo wdaogake' xshe'na' kana' wṉabile'ne', chi'ene': “X̱an', ¿norakznton' gon li' lo na' beṉ' malka'?” 21 Na' ka ble'i Pédrona'ne', na'ch chi'e Jesúza':

―X̱an', ¿shera beeni?

22 Na' che' Jesúza'ne':

―Shi cheenid', ni mbankz beeni kat' yiyed'. Bi sio' beena' wṉeyi. Lin' btiplalloo benḻilall' nad' toshiizi.

23 Na' daa golle' ka', wze dill' ladj beṉ'ka' chonḻilall' Jesúza' nan aga wet beena'. Per bi goll Jesúza' Pédrona' bi guet beena', san chi'ene': “Shi cheenid', ni mbankze' kat' yiyed'. Bi sio' beena' wṉeyi.”

24 Na' beena' nake' Jesúza' txen, beena' ḻe chakile', cho'e dill' kon ka gokə na' bzeje'n ḻee libri. Na' ṉezinto' dillaa cho'e nakan dii ḻi.

25 Dii zanch dii ben Jesúza' na' bi nyojan. Sheḻ' nyoj yog' diika' bene', chakid' bi gaki yell-lioni ikwa' librka' sheḻ'ka'.