1 Yannah, rnaba duxa nu loh tu bwihtsi raꞌ nu, pur dxyih nin dxiꞌ Jesucristu, dxyih nin gadiaaꞌha nuꞌh loh Ñiꞌh, 2 ayi chuu gah tu guelrzaaꞌ, nee ayiza gusaaꞌn tu guchihbi raꞌ ba laꞌh tu cun dxyiꞌdxyi nin guluuꞌyi tuhbi bwiinn nin naa profeta nicala za cun dxyiꞌdxyi nin nnaa raꞌ ba loh tu caa loh tuhbi dxihtsi nin nnaa raꞌ ba guluꞌnehza nu loh tu ziga cañiꞌn: “Laꞌh dxyih nin dxiꞌ Jesucristu stuhbi laꞌnbadzihn gahxu.” 3 Ayi gusaaꞌn tu gusaguiꞌhi bwiinn laꞌh tu pur dxyiꞌdxyi raꞌ, laasii chin nagahdxi gadzihn dxyih ca, ziuuꞌ ziahan roo raꞌ bwiinn nin cweꞌhestoꞌ raꞌ ñiꞌh xchiꞌdxyi Dxiohs tin gucaꞌnee raꞌ ba laꞌh Ñiꞌh, chiꞌchi zuluuꞌyiloh bwiinn duhlda duxa, bwiinn nin ziñichiloh par tuꞌpazi. 4 Deeꞌ nin zuhnn lasahca laꞌhgahca ba nee zidxyiꞌchinee ba garaa raꞌ nin zenee lah Dxiohs, ya hasta laꞌn xquidoꞌ Dxiohs soobaa ba tin guunn ba zigazi Yuꞌbi Dxiohs tin chechiistoꞌ bwiinn raꞌ laꞌh ba. 5 ¿Tayi riagannastoꞌ tu gaduhbi nin guyuuꞌhuhn loh tu guñiꞌraꞌn dxyiꞌdxyi raꞌ riiꞌ loh tu? 6 Yannah laꞌh tu naann xi niꞌca nuugacweꞌza laꞌh ba tin ayi guluuꞌyilohgah ba galoh nin gazaaꞌ raꞌ dxyih xteenn ba. 7 Pwihsi laꞌh guelnagaꞌtsi xteenn guelduhlda duxa chi zeezah la nnah loh guidxyiyuh, cayaꞌdxi si chesuu nin zuu galaayi, nin cagacweꞌza laꞌh niꞌchi nnah, 8 ya chiꞌchiyi zuluuꞌyiloh bwiinn duhlda duxa chi ya Daada Jesucristuyi guzaꞌloh gadxiinn laꞌh niꞌchi cun bwih rooꞌ xteenn rwaaꞌ Ñiꞌh, ya zuñichiloh Ñiꞌh niꞌchi cun xquelrnabwaꞌ xteenn Ñiꞌh nin dxieꞌnee Ñiꞌh chin gabiaꞌgarii Ñiꞌh stuhbi. 9 Bwiinn duhlda duxa gadzihn ba cun xquelrnabwaꞌ bwiinndxaaba, ya chin gadzihn ba, gadzihn ba ziga zi tuhbi bwiinn nin nahpa guelrnabwaꞌ rooꞌ; zuhnn ba sehn rooꞌ raꞌ loh guidxyiyuh cun dziꞌn roo raꞌ cun nin gusaguiꞌhi ba laꞌh raꞌ bwiinn, 10 ya zuhnn xtsiꞌn ba garaaloh cohsa dxaaba, guelduhlda raꞌ tin gusaguiꞌhi ba laꞌh raꞌ bwiinn nin nacweenta ziga bwiinn nin guñichiloh loh Dxiohs laasii ayi guzaꞌbistoꞌ raꞌ ba xchiꞌdxyi nanchii Dxiohs nin ñutaꞌh laꞌh raꞌ ba loh duhlda, 11 niꞌchin nin zusaaꞌn Dxiohs dxiꞌ tuhbi guelrusaguiꞌhi duxa loh raꞌ ba tin niꞌchi guunn chechiistoꞌ raꞌ bwiinn dxyiꞌdxyi xihn, 12 tin ziꞌchi loh gabihldxyi guzee garaa raꞌ bwiinn raꞌ nin ayi guclaaꞌdzi ñachiistoꞌ raꞌ ñiꞌh nin naa dxyiꞌdxyi guchii mas guzaꞌbistoꞌ raꞌ ba nin naa duhlda duxa raꞌ.

13 Per laꞌh nu nahpa gadiꞌhi nu guelzuxchiilli loh Dxiohs pur laꞌh tu, bwihtsi lasaaꞌ nu nin nadziiꞌhi laꞌh Daada Jesucristu, laasii Dxiohs gulii laꞌh tu galohyi tin taꞌh tu loh duhlda pur Spíritu Saantu Dxiohs nin rusiaa lastoꞌ tu cun neezaa dxyiꞌdxyi guchii nin gwachiistoꞌ tu. 14 Niꞌchin chin bihndxiahga tu xchiꞌdxyi Dxiohs nin baluuꞌyi nu laꞌh tu, gudihdxyi Dxiohs laꞌh tu tin ziꞌchi za nee tu guicaꞌha tu loh xquelñaꞌñih xteenn Jesucristu. 15 Pwihsi, bwiitsi raꞌ; gulchezah dziꞌtsi nee ayi dxiaꞌldastoꞌ tu xchiꞌdxyi Dxiohs nin baluuꞌyi nu laꞌh tu chin bidxuu nu riꞌca, nee cun neezaa raꞌ dxyiꞌdxyi nin bacaꞌh nu loh dxihtsi nin bachiguꞌnehza nu loh tu. 16 Laꞌh gahca Daada Jesucristu xteenn nuꞌh, nee cun laꞌh Dxiohs nin naa Xtaada nuꞌh, cuꞌguiꞌw laꞌn lastoꞌ tu pur guelrucaꞌstoꞌ nin nahpa Ñiꞌh para laꞌh nuꞌh pur paseensi xteenn Ñiꞌh nin ba naa par tuꞌpazi para laꞌh nuꞌh, nee pur nin naannloh nuꞌh zachicaꞌha raꞌ nuꞌh guelnazaꞌca loh Ñiꞌh cun pur nin rahcanee Ñiꞌh laꞌh nuꞌh. 17 Ziꞌchi guunn Ñiꞌh nee neezaa guzuhdziꞌtsi Ñiꞌh laꞌh tu loh garaa raꞌ dxyiꞌdxyi zaꞌca nin guiñiꞌ tu nee cun loh dziꞌn zaꞌca za raꞌ nin guunn tu.