2
Chin badzihn Spíritu Saantu xteenn Dxiohs
1 Chin badzihn dxyih nin rahca lañih xteenn Pentecostehs, rii garaa raꞌ xpwiinn Jesucristu tuhsi lahta laꞌn tuhbi yuuꞌ, 2 chin guzoꞌbaloh cayuuꞌ bwih llaaꞌndxibaaꞌ zigazi tuhbi biduhn, ya guyuuꞌtii bwih duxa chi gaduhbi laꞌn yuuꞌ hasta zohba raꞌ ba, 3 chiꞌchi baluuꞌyiloh ziahan bwehliꞌhn nin xñah ziga luhdxyi bwiinn nez guiyaꞌ, ya bigaaꞌzi bwehliꞌhn raꞌ chi yihca cada tuhbigah raꞌ ba. 4 Ya garaa raꞌ ba guyuuꞌtii Spíritu Saantu Dxiohs laꞌn lastoꞌ raꞌ ba. Chiꞌchi guzoꞌbaloh cañiꞌ raꞌ ba guriin-guriin dxyiꞌzah ziga badꞌhi Spíritu Saantu xteenn Dxiohs guelrnabwaꞌ guiñiꞌ raꞌ ba.
5 Ya laꞌn dxyih raꞌ chi ziahan bwiinn Israel raꞌ nin zezahnee ziga baluuꞌyi Moisehs guunn raꞌ ba, badzihn raꞌ ba Jerusalehn nee zeꞌ raꞌ ba guriinn-guriin guihdxyi. 6 Chin bihndxiahga raꞌ ba guyuuꞌ bwih duxa chi, badiaaꞌha raꞌ ziahanroo raꞌ bwiinn chi, nee badxyigaaꞌ duxa raꞌ ba laasii bwaꞌha raꞌ ba cañiꞌ raꞌ pooxtla dxyiꞌzah nin xñiꞌ cada tuhbi raꞌ bwiinn nin rii riꞌchii, 7 ya loh riiyadxyigaaꞌ bwiinn raꞌ chi, chiꞌchi rahbi loh lasaaꞌ raꞌ ba:
―¿Ta bwiinn Galilea raꞌgaa deeꞌ nin riiñiꞌ? 8 ¿Xaxmohda naann raꞌ ba xchiꞌzah cada tuhbi raꞌ nuꞌh nin gulaanee nuꞌh?, 9 nee laꞌhnuꞌh naa nuꞌh bwiinn ziitu nin zeꞌ cada stuhbi lahta raꞌ; ziga bwiinn Paartia, bwiinn Media, bwiinn regiohn Elahm, bwiinn Mesapotamia, bwiinn Judea, bwiinn estadu Capadocia, bwiinn regiohn Pontu, bwiinn Asia, 10 bwiinn Frigia cun bwiinn Panfilia, cun bwiinn Egiptu cun neezaa bwiinn distrihtu xteenn Africa. Loh raꞌ bwiinn nin zeꞌ Roma, nuu raꞌ nin riachiizistoꞌ raꞌñiꞌh xcweenta zigazi riachiistoꞌ raꞌ bwiinn Israel xreligiohn raꞌ ba, ya nuu za raꞌ ba desde guulaa raꞌ ba naa raꞌ ba bwiinn Israel, 11 neezaa bwiinn Creta rii riiꞌ cun bwiinn Arabia. Yannah rihn nuꞌh cañiꞌ raꞌ bwiinn ca dxyiꞌzah nin rñiꞌ cada tuhbigah raꞌ guihdxyi raꞌ riiꞌ. Neezaa cun xchiꞌzah nuꞌh cañiꞌ raꞌ ba xcweenta dziꞌn roo raꞌ nin cayuhnn Dxiohs.
12 Garaa raꞌ ba riiyadxyigaaꞌ raꞌ ba, nin ayi gaann raꞌ ba xi lligaaba guunn raꞌ ba, chiꞌchi canaabadxyiꞌdxyi loh lasaaꞌ raꞌ ba, rahbi raꞌ ba:
―¿Xixniꞌca cayahca? ¿Xixnaa ayi rahcabwaꞌ nuꞌh?
13 Chiꞌchi guñiꞌ nuhn bwiinn raꞌ chi squiiꞌ loh raꞌ pooxtla:
―Pwehda riizuhdzii bwiinn raꞌ ca.
Guñiꞌ Pehdru loh raꞌ bwiinn ziga nin cayahca riꞌchi
14 Chiꞌchi gwasuꞌnchii Pehdru cun zatsiꞌh bituhbi pooxtla raꞌ, tin guñiꞌ Pehdru jweersiroo, rahbi ba:
―Yuꞌbitu bwiinn Judea raꞌ neezaa garaa raꞌ nin nuu raꞌ guihdxyi Jerusalehn, gulgahcaꞌdxiahga dxyiꞌdxyi nin guiñiꞌn loh tu. 15 Ayi rzuhdzi dxiꞌh nu ziga ruhnn tu lligaaba. ¿Tayi rwaꞌha tu rsiiyiru ñiꞌ gueꞌdu xcagaꞌ ñiꞌh? 16 Deeꞌ cayahcan tin guzohba dxyiꞌdxyi ziga guñiꞌ profeta Joel xchiꞌdxyi Dxiohs cadxyih roo. 17 Rahbi Dxiohs:
Zadzihn dxyih nin guixeꞌhlaꞌhn Spíritu Saantuhn tin cweezaa Ñiꞌh laꞌn lastoꞌ garaatiiꞌ bwiinn,
nee lliiꞌngaꞌn tu lliiꞌndxaꞌpa tu ziñiꞌ za raꞌ bi xchiꞌdxyiꞌhn.
Lliiꞌngaꞌn tu zwaꞌhaloh raꞌ bi mahziru cohsaroo,
ya xtatitaguhla tu ziñiꞌ xcaꞌlda raꞌ ba cohsa raꞌ nin guluuꞌyiꞌhn laꞌhraꞌba.
18 Guixeꞌhlaꞌhn Spíritu Saantuhn para garaa raꞌ nin chechiistoꞌ raꞌ ñiꞌh xchiꞌdxyiꞌhn ndxiꞌhw gunnaꞌh raꞌ,
ya ziñiꞌ raꞌ ba xchiꞌdxyiꞌhn.
19 Guiyaꞌ llaaꞌndxibaaꞌ zwaꞌha tu cohsa roo nin gaca neezaa loh guidxyiyuh zwaꞌha tu ziꞌchi gahca sehn roo raꞌ nin gaca ziga rihn, bwehla,
neezaa xcahyi gaca ziga guhxa.
20 Ya loh gubihdxyi gacahyin, ya loh bweꞌhw gañahan zigazi rihn.
Nahpaa gaca garaa raꞌ cohsa rii chiꞌchiyi gadzihn dxyih duxa nin dxieꞌldahn ziga naann Xtaada Dxiohs tu.
21 Ya garaa bwiinn nin rbwihdxyilah Naꞌh zilaꞌh raꞌ ba loh duhlda.
22 Rahbiza Pehdru:
―Bwiinn Israel raꞌ, gulgahcaꞌdxiahga dxyiꞌdxyi raꞌ nin guiñiꞌn. Dxiohs baluuꞌyi laꞌh tu chyu naa Jesucristu nin zeꞌ Nazaret pur dziꞌn roo raꞌ, milahgru raꞌ, sehn raꞌ nin luꞌh bwiꞌhnn Ñiꞌh nezloh tu. Laꞌh gahca Dxiohs badiꞌhi guelrnabwaꞌ laꞌh Jesucristu niꞌchin bwiꞌhnn Ñiꞌh dziꞌn roo raꞌ chi. Laꞌtu naann la deeꞌ. 23 Per galohtiiꞌ laꞌh Dxiohs naann la xa guunnee tu laꞌh Jesucristu nin naa Lliiꞌn Ñiꞌh. Pura xigaaba gahca Ñiꞌh biuꞌn Ñiꞌh ntriehgu Lliiꞌn Ñiꞌh loh tu tin batiꞌdxi tu Ñiꞌh loh raꞌ bwiinn nadxaaba nin bacaꞌh laꞌh Ñiꞌh loh cruhzi tin guhchi Ñiꞌh. 24 Per lwehgu bacwaꞌhn Dxiohs laꞌh Jesucristu loh guelguhchi laasii ayi guyuuꞌ xtuhlda Ñiꞌh. Nee ayi ñahca ñicaꞌha guelguhchi laꞌh Jesuhs laasii rnabwaꞌ Ñiꞌh laꞌh guelguhchi. 25 Chin babahn Jesuhs, guzohba dxyiꞌdxyi nin bacaꞌh guehtu rrehyi Davihd loh dxihtsi xcweenta Ñiꞌh; squiiꞌ guñiꞌ Davihd loh Dxiohs:
Garaa dxyih rwaꞌhahn loh luꞌh Dxiohs, zuu luꞌh xlahdu derehchuꞌhn cayahcanee luꞌh naꞌh tin ayi guidxyihbi lastoꞌn.
26 Niꞌchin guñaazahn loh luꞌh pura taantu riahxiꞌhn laasii zucwaꞌhn luꞌh naꞌh chin gachiꞌhn;
27 nee ayiza gusaaꞌn luꞌh dxiaꞌhan xalmaꞌhn laꞌn baꞌ; ayiza gusaaꞌn luꞌh guudxyi tihxi Lliiꞌn luꞌh nin nadziiꞌhi luꞌh;
28 laꞌluꞌh baluuꞌyi la naꞌh xa guibahanahn para tuꞌpazi, nee zusiahxi luꞌh naꞌh laasii guibahannee luꞌh naꞌh llaaꞌndxibaaꞌ.
29 Rahbiza Pehdru:
―Bwihtsi raꞌ, guyaa guiñaan loh tu, nee naannza tu baaguhca cadxyihrooꞌ guhchi guehtu Davihd nee zee rañihchi gahca ba, baaguyuuꞌdziꞌtsi ba laꞌn baꞌ, per zahca guidiaꞌha nuꞌh xpaꞌ guehtu rrehyi Davihd. 30 Per guñiꞌ guehtu Davihd xchiꞌdxyi Dxiohs chin gubahan ba, ya biaꞌhandxyiꞌdxyinee paꞌh Dxiohs laꞌh Davihd nahpaa gudiꞌhi Dxiohs tuhbi llahga ba nin guiriaꞌhlah Crixtu, ya llahga rrehyi Davihd laꞌh Daada Jesucristu nin bwiꞌhnn gahn xlahdu derehchu Dxiohs, yannah naa Ñiꞌh rrehyi ziga guhca xtatita Davihd Ñiꞌh rrehyi, 31 pwihsi baluuꞌyixgah Dxiohs cohsa raꞌ riiꞌ laꞌh rrehyi Davihd, niꞌchin guñiꞌ guehtu Davihd taꞌh Jesucristu loh raꞌ bwiinnguuchi laasii ayi gunnah Dxiohs ñiaꞌhan xahlma Jesucristu laꞌn gabihldxyi, nee ayiza gunnah Dxiohs ñuuꞌdxyi bweꞌhltihxi Jesucristu laꞌn baꞌ hasta bigaꞌtsi Ñiꞌh. 32 Niꞌchin bacwaꞌhn Dxiohs laꞌh Jesucristu loh raꞌ bwiinnguuchi, laꞌhnu ziga xpwiinn Ñiꞌh bidiaꞌhaloh nu guhchi Ñiꞌh nee seguihdu gahca babahn Ñiꞌh. 33 Ya ziga babwihdxyi Dxiohs laꞌh Jesucristu ziaa Ñiꞌh llaaꞌndxibaaꞌ tin chuu Ñiꞌh xlahdu derehchu Xtaada Dxiohs Ñiꞌh ya badiꞌhi Dxiohs guelrnabwaꞌ laꞌh Jesucristu cun Spíritu Saantu tin gutiꞌdxi Ñiꞌh Spíritu Saantu para laꞌh raꞌ bwiinn guidxyiyuh, ya nin riiywaꞌha tu cun neezaa nin cayihn tu niꞌchipaꞌhn naa nin cayuhnn Spíritu Saantu. 34 Laasii ayi guehtu Davihd dxiꞌh naa nin bwaa llaaꞌndxibaaꞌ sino que Jesucristu bwaa xlawaaꞌha guehtu Davihd laasii laꞌh gahca guehtu Davihd rahbi:
Guñiꞌ Dxiohs loh Daada nin rnabwaꞌ loon; rahbi Ñiꞌh:
“Guzohba xlahdu derehchuꞌhn,
35 ya hasta que no gadzihn dxyih nin gutsiiꞌgaraꞌn bwiinn raꞌ nin rdxyiꞌchinee yiꞌh loh luꞌh tin gacabwaꞌ raꞌ ba yiꞌh rnabwaꞌ luꞌh garaatiiꞌ.”
36 Niꞌchin rñiꞌn loh tu ―rahbi Pehdru―, laꞌhtu nin bacaꞌh laꞌh Jesucristu loh cruhzi, bwiinn Israel raꞌ gulgahcabwaꞌ, laꞌDxiohs bazuh laꞌh Daada Jesucristu tin guinabwaꞌ Ñiꞌh laꞌhnuꞌh neezaa gutaꞌh Ñiꞌh laꞌhnuꞌh loh duhlda.
37 Chin bihn raꞌ ba guñiꞌ Pehdru yihca raꞌba ziga naa raꞌ ba bwiinn nin bacaꞌh laꞌh Jesuhs loh cruhzi, bieꞌsuh guhca nalasastoꞌ raꞌ ba, chiꞌchi rahbi raꞌ ba loh Pehdru cun spaaldaa raꞌ pooxtla nin canee Pehdru riꞌchi:
―¡Ahyi bwihtsi raꞌ!, ¿xa niꞌcachiꞌh gachidiꞌhnn nu nnah?
38 Chiꞌchi rahbi Pehdru loh raꞌ ba:
―Gulgasaguꞌdzistoꞌ tu loh Dxiohs cun neezaa chioobaañihsa cada tuhbigah tu pur lah Jesucristu laasii ziꞌchi naa tuhbi sehn guzoꞌbadxiahga tu xchiꞌdxyi Jesucristu, nee tin ziꞌchiza zuhnn Dxiohs pardohn xtuhlda tu, ya chiꞌchiyi zuniꞌhi Dxiohs Spíritu Saantu laꞌhtu tin cweezaa Ñiꞌh laꞌn lastoꞌ tu. 39 Laasii xclaaꞌdzi Dxiohs guniꞌhi Ñiꞌh Spíritu Saantu Ñiꞌh laꞌhtu, neezaa lliiꞌn tu cun neezaa bwiinnziitu raꞌ, o sea garaa raꞌ bwiinn nin guntaaꞌyi Ñiꞌh gaca raꞌ xpwiinn Ñiꞌh.
40 Ya seguihdu gwazah ru guñiꞌ Pehdru ziahan roo ru dxyiꞌdxyi loh raꞌ bwiinn Israel raꞌ chi squiiꞌ:
―Gulguiriaꞌcaa loh raꞌ bwiinn nin rusahcaloh nin rii raꞌ loh guidxyiyuh nnah tin taꞌh tu loh jwiisi nin gaca.
41 Ya guroꞌbañihsa garaa raꞌ bwiinn nin gwachiistoꞌ raꞌ ñiꞌh dxyiꞌdxyi raꞌ nin guñiꞌ Pehdru, ya dxyih chi gwabiiga ziga chohnna mihyi bwiinn tin biahca raꞌ ba tuhsi cun xpwiinn JesuCristu. 42 Ya garaa raꞌ ba gwazahnee dziꞌtsi raꞌ ba dxyiꞌdxyi nayaa nin baluuꞌyi raꞌ pooxtla laꞌh raꞌ ba, cun biahxi duxa raꞌ ba nee, laasii tuhsi biahca raꞌ ba cun xpwiinn Jesucristu, cun tuhsi gudahw raꞌ ba cun xpwiinn Jesucristu, zigazi gudahwnee Jesucristu laꞌh raꞌ xpwiinn Ñiꞌh chin guyuuꞌnee Ñiꞌh laꞌh raꞌ ba, ya ziꞌchi badiaaꞌha raꞌ ba tuhsi lahta tin gudihdxyi-gunaaba raꞌ ba loh Dxiohs tin gacanee Ñiꞌh laꞌh raꞌ ba.
Mohda ziga gubahan raꞌ xpwiinn Jesucristu galoh
43 Badxyigaaꞌ duxa loh raꞌ bwiinn pur dziꞌn roo raꞌ nin bwiꞌhnn pooxtla raꞌ cun milahgru raꞌ nin bwiꞌhnn raꞌ ba. 44 Ya garaa ziga gwachiistoꞌ raꞌ ba xchiꞌdxyi Dxiohs tuhsi nabahan raꞌ ba nee tuhsiza rnabwaꞌ raꞌ ba xixteenn lasaaꞌ raꞌ ba. 45 Ya guzaꞌloh batooꞌ raꞌ ba xixteenn raꞌ ba chiꞌchi bwiꞌhnn cumpahñu lasaaꞌ raꞌ ba segun bichiꞌhnn cada tuhbigah raꞌ ba mweeyi. 46 Nee diahrutiiꞌ badiaaꞌha raꞌ ba laꞌn guidoꞌ cun tuhsi guhca xigaaba raꞌ ba. Ya de taantu riahxinee lasaaꞌ raꞌ ba, niꞌchin cada tuhbigah raꞌ ba baguhn lasaaꞌ raꞌ ba yihdzi cada tuhbigah raꞌ ba tin gudahwnee lasaaꞌ raꞌ ba. 47 Ya ziꞌchi mahziru gwazah guñiꞌ raꞌ ba chuhla naa Dxiohs, garaa raꞌ bwiinn guñiꞌ raꞌ ba xpwiinn Jesucristu naa raꞌ bwiinn zaꞌca. Ya niꞌchin dxyih cun dxyih gwazah gudahla raꞌ bwiinn nin riachiistoꞌ raꞌñiꞌh xchiꞌdxyi Jesucristu laasii cayahcanee Dxiohs cayahca ziahan raꞌ ba.