1 Guihdxyi Cesarea guyuuꞌ tuhbi ndxiꞌhw nin laa Corneliu, rnabwaꞌ ba tuhbi gaywaꞌh suldahdu loh tuhbi cwaꞌh nin laa Italianu. 2 Bwiinn zaꞌca duxa naa Corneliu cun gaduhbi xfamihyi ba, neezaa ziahan rooꞌ mweeyi ruchaꞌga ba loh guihdxyi chi para bwiinn Israel, ya garaa dxyih rdxiꞌhn-rnaaba ba loh Dxiohs. 3 Ya tuhbi dxyih zigachiꞌh xcachohnna gudxyih bwaꞌha ba tuhbi xaanjla Dxiohs guyuuꞌtee hasta zuu ba, chiꞌchi rahbi aanjla chi loh Corneliu:

―¿Cuunn luꞌh, Corneliu?

4 Chiꞌchi bwaꞌha Corneliu loh xaanjla Dxiohs, chiꞌchi rahbi ba:

―¿Xi daada?

Chiꞌchi rahbi aanjla Dxiohs loh Corneliu:

―Laꞌh Dxiohs bwiꞌhnn cweenta yiꞌh laasii rbwihdxyi-rnaaba luꞌh laꞌh Ñiꞌh, nee neezaa cun nin rahcanee luꞌh laꞌh raꞌ bwiinn. 5 Yannah guxeꞌhla paaldaa ndxiꞌhw guihdxyi Jope tin chegañiꞌ raꞌ ba loh Simohn, neezaa Pehdru rñiꞌ raꞌ bwiinn laꞌh ba. 6 Nuu Pehdru rwaaꞌ yihdzi tuhbi bwiinn nin laaza Simohn, yihdzi ba zohba rwaaꞌ ñihsadoꞌ, bwiinn chi nin rucuꞌdzi dxihdxi riꞌchi, tin laꞌh Pehdru guluuꞌyi yiꞌh xa nahpaa guunn luꞌh.

7 Ya chin biuuꞌnehza aanjla nin guñiꞌ loh Corneliu chiꞌchi guxeꞌhla Corneliu chiohpa xmooza ba cun tuhbi xsuldahdu ba nin riachiiza stoꞌ ñiꞌh xchiꞌdxyi Dxiohs. 8 Chiꞌchi bwiiꞌyidxyiꞌdxyi Corneliu loh xpwiinn ba nin guzahca ba, chiꞌchi guxeꞌhla ba laꞌh raꞌ daada raꞌ chi guihdxyi Jope. 9 Chin barah gueꞌla zee raꞌ ba loh neziuh. Ya gahxula para guihdxyi Jope zigachiꞌh laꞌyidxyihin, hohrapaꞌhza chi gucah Pehdru yihca yuuꞌ hasta nuu ba tin gudidxyi-gunaaba ba loh yuꞌbi Dxiohs. 10 Per bichiaꞌhan duxa Pehdru, ya guclaaꞌdzi ba ñahw ba, ya gaduhbi nin cayuhnchaꞌyi raꞌ ba xi gahw raꞌ ba, bwaꞌha Pehdru tuhbi bihsi, 11 bwaꞌha ba llaaꞌndxibaaꞌ billaalan biehta tuhbi ziga lahdxi maanta hasta loh yuh ya gadahpa xchihnan yiꞌbiduꞌh. 12 Laꞌn lahdxi manta chi nuu raꞌ garaa clahsatiiꞌ maan nin zohba gadahpa ñaaꞌ ñiꞌh neezaa bweꞌlda, guraagu neezaa maan raꞌ nin zohba xihyi Ñiꞌh. 13 Chiꞌchi bihn Pehdru tuhbi rsiaaꞌ nin guñiꞌ loh ba:

―Pehdru, gwasuꞌnchii tin gudxiinn maan gahw luꞌh.

14 Chiꞌchi rahbi Pehdru loh Ñiꞌh:

―Aaca, nin tuhbi nnagahdxi gaawuhn maan dxiimma.

15 Chiꞌchi rahbi Dxiohs loh Pehdru:

―Ayiru guiñiꞌ luꞌh maan dxiimma nin luꞌh basiaan.

16 Guhca deeꞌ chohnna bweelta, chiꞌchi biahsa lahdxi manta chi bacahan llaaꞌndxibaaꞌ. 17 Tal nin cayuhnn Pehdru lligaaba guiñiꞌ xi niꞌchi nin bwaꞌha ba, badzihn raꞌ ndxiꞌhw nin guxeꞌhla Corneliu rwaaꞌ yihdzi Simohn nin rucuuꞌdzi dxihdxi. 18 Ya seguihdu guñiꞌ raꞌ ba rwaaꞌ leeꞌ chi tin gunaabadxyiꞌdxyi raꞌ ba gu riꞌchi nuu tuhbi daada nin laa Simohn Pehdru. 19 Gaduhbi nin cayuhnn Pehdru lligaaba pur nin bwaꞌha ba, guñiꞌ Spíritu Saantu Dxiohs loh ba rahbi Ñiꞌh:

―Bwaꞌha, chohnna ndxiꞌhw cagadxiꞌhyi yiꞌh. 20 Gwasuꞌnchii tin gwanee laꞌh raꞌ bwiinn nin radxiꞌhyi yiꞌh. Ayi guunn luꞌh stuhbi lligaaba tin naꞌh guxeꞌhlaraꞌn ba zeecaꞌha raꞌ ba yiꞌh Pehdru.

21 Chiꞌchi bieꞌta Pehdru hasta nuu raꞌ ba, chiꞌchi rahbi ba loh raꞌ ba:

―Naꞌh nin cagadxiꞌhyi tu. ¿Xi zeꞌ tu?

22 Chiꞌchi rahbi raꞌ ndxiꞌhw raꞌ chi loh Pehdru:

―Corneliu nin rnabwaꞌ tuhbi gaywaꞌh suldahdu, naa ba tuhbi bwiinn zaꞌca, tuhbi bwiinn nin rbwihdxyi-rnaaba laꞌh Dxiohs garaatiiꞌ dxyih ya rñiꞌ zaꞌca raꞌ bwiinn Israel xcweenta ba, ya tuhbi xaanjla Dxiohs guñiꞌ loh ba rahbi:

―Guixeꞌhla luꞌh nin chegalliꞌhi laꞌh Simohn Pehdru tin dxihn tu xchiꞌdxyi ba ―rahbi aanjla chi loh Corneliu.

23 Seguihdu rahbi Pehdru:

―Gultiꞌdxi laꞌñuuꞌ tin dxiaꞌhannee tu naꞌh.

Ya chin barah gueꞌla zenee Pehdru laꞌh raꞌ xpwiinn Corneliu cun spaaldaa raꞌ bwiinn Jope. 24 Ya seguihdu badzihn raꞌ ba guihdxyi Cesarea, riꞌchi laꞌh Corneliu batiaaꞌhala garaa lasaaꞌ ba cun xamihgu raꞌ ba rwaaꞌ yihdzi ba tin cabweeza raꞌ ba gadzihn Pehdru. 25 Chin badzihn Pehdru rwaaꞌ yihdzi Corneliu bireꞌh Corneliu tin bagachaꞌgaloh ba laꞌh Pehdru, chiꞌchi bazuꞌnllihbi ba loh Pehdru. 26 Chiꞌchi gunaꞌzu Pehdru naa ba guteesuꞌnchii ba laꞌh Corneliu, chiꞌchi rahbi Pehdru loh ba:

―Ayi guzuꞌnllihbi luꞌh loon laasii naan tuhbi bwiinn ziga yiꞌh gahca.

27 Cayuuꞌyidxyiꞌdxyi garaa raꞌ ba, biuuꞌgarii raꞌ ba laꞌn yihdzii Corneliu, ya chin guyuuꞌtii raꞌ ba bwaꞌha Pehdru gadxah raꞌ bwiinn laꞌñuuꞌ, 28 chiꞌchi rahbi Pehdru loh raꞌ ba:

―Yuꞌbitu naann tu bwiinn Israel ayi nuu guchaꞌga ba loh tuhbi bwiinnziitu nin luꞌh ayi naa bwiinn Israel; ayiza chuu ba rwaaꞌ yihdzii raꞌ ba. Per guñiꞌ Dxiohs loon zahca guchaꞌgaꞌhn chyuuchiꞌhzi bwiinn, 29 niꞌchin nnah nin gudihdxyi tu naꞌh lwehgu zeꞌldahn nin ayi gunaaba dxyiꞌdxyiꞌhn. Nnah rnaꞌbadxyiꞌdxyiꞌhn, ¿xi naa gudihdxyi tu naꞌh?

30 Chiꞌchi rahbi Corneliu loh Pehdru:

―Gudahpa dxyih zigachiꞌh xcachohnna gudxyih, cabwiidxyihn-canaꞌbaꞌhn loh Dxiohs rwaaꞌ yiidzihn riiꞌ chin luꞌh baluuꞌyiloh tuhbi ndxiꞌhw nahcu ba lahdxi nin rcaꞌbachaꞌh, 31 naa ba loon: “Corneliu, laꞌh Dxiohs bihnn chin rbwihdxyi-rnaaba luꞌh laꞌh Ñiꞌh neezaa bagannaastoꞌ Ñiꞌh chin rudiꞌhi luꞌh mweeyi laꞌh raꞌ bwiinn prohbi. 32 Niꞌchin nnah guxeꞌhla nin chee guihdxyi Jope tin checaꞌha raꞌ ba laꞌh Simohn Pehdru nin nuu rwaaꞌ yihdzi ndxiꞌhw nin laazaa Simohn bwiinn chi rucuuꞌdzi dxihdxi guihdxyi Jope, yihdzii ba zohba gahxugah rwaaꞌ ñihsadoꞌ, ya chin gadzihn Pehdru riiꞌ laꞌh ba guiñiꞌ ba loh tu xchiꞌdxyi Dxiohs.” 33 Niꞌchin guxeꞌhlaꞌhn nin bieꞌgalliꞌhi yiꞌh, per zuxchiillDxiohs zeꞌ luꞌh. Yannah laꞌnu dxuu riiꞌ nezloh Dxiohs tin dxihn dxiahga nu xchiꞌdxyi Dxiohs nin baniꞌhi Ñiꞌh guiñiꞌ luꞌh loh nu ―rahbi Corneliu loh Pehdru.

34 Chiꞌchi rahbi Pehdru loh raꞌ ba:

―Nnahyi guhcabwaꞌn tuhbiloh nadziiꞌhi Dxiohs garaa raꞌ bwiinn; ayi ruhnn Ñiꞌh guriin-guriin cun cada tuhbigah raꞌ bwiinn. 35 Per Dxiohs chyuuchiꞌhzi bwiinn guidxyiyuh nin ruzuꞌnllihbi nez loh Ñiꞌh cun nin ruzoꞌbadxiahga xchiꞌdxyi Ñiꞌh nee nin nabahan xnehza dee raꞌ nin nadziiꞌhi Ñiꞌh. 36 Dxiohs guñiꞌ loh raꞌ ndxiꞌhw nin zeezahnee raꞌ xchiꞌdxyi zaꞌca Jesucristu, ya laꞌh Ñiꞌh naa Xtaada raꞌ nuꞌh, laꞌhza Ñiꞌh rnabwaꞌ gaduhbi guidxyiyuh. 37 Laꞌhtu naann tu xi guhca cun bwiinn Israel raꞌ, guzaꞌlohon nez guihdxyi Galilea, ya que guyaꞌloh baluuꞌyi Jwahn nahpaa chioobaañihsa raꞌ bwiinn tin cwihsiinn raꞌ ba chin gadzihn Crixtu. 38 Naann chaꞌyi za tu xa badiꞌhi Dxiohs guelrnabwaꞌ cun Spíritu Saantu Ñiꞌh laꞌh Lliiꞌn Ñiꞌh nin laa Jesuhs nin zeꞌ guihdxyi Nazaret, ya chin gucaꞌnzaa Jesuhs nin naa Crixtu bwiꞌhnn Ñiꞌh dziꞌn roo raꞌ, milahgru raꞌ, basiaca za Ñiꞌh bwiinn raꞌ nin batiꞌdxi bwiinndxaaba trabahjw duxa, bwiꞌhnn Ñiꞌh dziꞌn roo raꞌ riiꞌ laasii guhcanee Xtaada Dxiohs Ñiꞌh laꞌh Ñiꞌh. 39 Laꞌhnu bidiaꞌhaloh nu garaa raꞌ dziꞌn nin bwiꞌhnn Jesucristu lahdxyi raꞌ bwiinn Israel cun loh guihdxyi Jerusalehn, ya seguihdu gudxiinn raꞌ ba laꞌh Ñiꞌh bacaꞌh raꞌ ba Ñiꞌh loh tuhbi cruhzi. 40 Ya chin biohnna dxyih babahn Ñiꞌh loh raꞌ bwiinnguuchi, bacah Ñiꞌh llaaꞌndxibaaꞌ. 41 Ayi baluuꞌyiloh Jesucristu loh chyuuchiꞌhzi bwiinn sino que loh si nu ziga gulii Dxiohs laꞌhnu; bidaꞌwnee nu Ñiꞌh bidwanee nu Ñiꞌh limentu chin babahan Ñiꞌh loh raꞌ bwiinnguuchi. 42 Ya guxeꞌhla Ñiꞌh laꞌhnu tin chogatiꞌchii nu dxyiꞌdxyi xcweenta Ñiꞌh loh raꞌ bwiinn tin gacabwaꞌ raꞌ ba Dxiohs gulii laꞌh Jesucristu tin gaca Ñiꞌh Jwehsi xteenn raꞌ bwiinn nabahan cun bwiinnguuchi raꞌ. 43 Galohyi bacaꞌh raꞌ nin luꞌh guñiꞌ xchiꞌdxyi Dxiohs dxihtsi, rahbi raꞌ ba:

―Garaa raꞌ bwiinn nin chechii stoꞌ Ñiꞌh xchiꞌdxyi Jesucristu zuziaꞌcaa Dxiohs xtuhlda raꞌ ba.

44 Zeezah gahca cañiꞌ Pehdru dxyiꞌdxyi raꞌ chi chin guyuuꞌtii Spíritu Saantu Dxiohs laꞌn lastoꞌ raꞌ bwiinn nin gwachii raꞌ stoꞌ ñiꞌh xchiꞌdxyi Jesucristu. 45 Badxyigaaꞌ duxa loh raꞌ bwiinn Israel nin naa raꞌ xpwiinn Jesucristu nin zeꞌnee Pehdru laasii bwaꞌha raꞌ ba guleezaa Spíritu Saantu Dxiohs lastoꞌ raꞌ nin luꞌh naa raꞌ bwiinnziitu, 46 laasii bihn raꞌ ba cañiꞌ raꞌ bwiinn chi guriinn-guriinn dxyiꞌzah, neezaa bihn raꞌ ba cañiꞌnee raꞌ bwiinn chi Dxiohs, 47 chiꞌchi rahbi Pehdru loh raꞌ ba:

―¿Ta zinaaba garaa raꞌ bwiinn rii ayi chioobaañihsa raꞌ ba yaque guleezaa Spíritu Saantu Dxiohs lastoꞌ raꞌ ba ziga nuu Ñiꞌh lastoꞌ raꞌza nuꞌh?

48 Chiꞌchi gunabwaꞌ Pehdru gurohbaañihsa raꞌ ba cun lah Jesucristu, ya seguihdu guñiꞌnee raꞌ ba Pehdru tin dxiaꞌhannee raꞌ ba laꞌh Pehdru spaaldaa dxyih riꞌchi.