1 Ya chin guyaꞌloh badiꞌchii raꞌ bwiinn, chiꞌchi gudihdxyi Pahblu laꞌh raꞌ xpwiinn Jesucristu tin guñiꞌnee ba laꞌh raꞌ ba, tin bwiꞌhnn ba despedir laꞌh raꞌ ba ya seguihdu guyuuꞌnehza ba para nehz guihdxyi Macedonia. 2 Ya gudiiꞌdxi ba garaa raꞌ guihdxyi nin rnabwaꞌ guihdxyi Macedonia tin mahziru guluuꞌguiꞌw ba laꞌh raꞌ xpwiinn Jesucristu nin nuu raꞌ garaa raꞌ guihdxyi raꞌ chi tin mahziru cheezah dziꞌtsi raꞌ ba loh loh xchiꞌdxyi Dxiohs. Ya ziꞌchizi badzihn ba hasta Grecia. 3 Guihdxyi Grecia chi biaꞌhan ba chohnna bweꞌhw, ya laꞌhba ñah la para guihdxyi Siria, per chin bihn Pahblu cabweeza ziahan raꞌ bwiinn Israel laꞌhba tin guinaꞌzu raꞌ ba laꞌhba, mejor ayi gucah ba laꞌn barcu mahzi bwiꞌhnn ba pur gubiaꞌgarii ba para guihdxyi Macedonia stuhbi. 4 Ya loh nin gunaꞌzunehza ba para Asia gwanee Pahblu laꞌh Sópater, lliiꞌn Pirios, tuhbi bwiinn guihdxyi Berea; cun Aristarcu, cun Segundu nin zeꞌ guihdxyi Tesalónica, Gahyu bwiinn guihdxyi Derbe, Timoteu, cun neezaa Tíquicu cun Trófimos bwiinn Asia raꞌ. 5 Ndxiꞌhw raꞌ riiꞌ guñiiꞌdxiuu loh nu, ya hasta guihdxyi Troas gurihleeza raꞌ ba. 6 Ya chin gudiiꞌdxi lañih nin rahw raꞌ ba pahn nin ayi rahcachaꞌyi cun levadura, chiꞌchi bariaꞌh nu guihdxyi chi tin biuuꞌgarii nu laꞌn tuhbi barcu tin zoo nu nez guihdxyi Troas. Ya riꞌchi chin guhca gaꞌyu gubihdxyi, chiꞌchi badxiꞌloh nu laꞌh raꞌ ba nin riibweeza laꞌh nu, ya riꞌchi bidxuu nu gahdzi dxyih.

7 Chin guhldaa mwer dxyih xmahn, badxaꞌgalasaaꞌ nu tin bidaꞌw nu pahn ziga gudahwnee Jesucristu xpwiinn raꞌpaꞌh Ñiꞌh, ya seguihdu guñiꞌnee Pahblu laꞌh raꞌ xpwiinn Jesucristu hasta chin guhldaa garoolda gueꞌla laasii garah gueꞌla chi gabii ba guihdxyi chi. 8 Yihca tuhbi yuuꞌ hasta badxaꞌgalasaaꞌ nu laꞌn cwartu chi ziahan roo duxa biaꞌñih caadxyih riꞌchi. 9 Ya rwaaꞌ tuhbi bentahn xteenn yuuꞌ chi zohba tuhbi biꞌnxtuhbi nin laa Euticu, ya coma xchih roo baluuꞌyi Pahblu xchiꞌdxyi Jesucristu cun ziahan ru dxyiꞌdxyi laꞌh raꞌ bwiinn raꞌ chi, niꞌchin gunaꞌzu bacaꞌlda laꞌh biꞌnxtuhbi chi ya biduꞌbi bi hasta rwaaꞌ bentahn xteenn yuuꞌ nin riohnna pihsu chi biaaba bi hasta loh yuh, ya chin guteesa raꞌ ba laꞌhbi laꞌbi guhchila. 10 Chiꞌchi bieꞌta Pahblu loh yuh hasta biaaba biꞌnxtuhbi chi chiꞌchi bazuꞌnllihbi Pahblu chiꞌchi gudiꞌdzi ba laꞌhbi ya seguihdu guteesa ba laꞌhbi, chiꞌchi rahbi Pahblu loh raꞌ ba:

―Ayi chuu tu guelrzaaꞌ laꞌhbi nabahan gahca.

11 Ya seguihdu bacah Pahblu stuhbi laꞌn cwaartu guiyaꞌ chi chiꞌchi gutaaꞌha ba pahn gudahw ba, chiꞌchi gwazah guñiꞌ ba hasta barah gueꞌla, ya seguihdu biuuꞌnehza za ba para stuhbi lahta. 12 Ya neezaa biꞌnxtuhbi chi bataꞌh Dxiohs loh guelguhchi ya nee pur nin bwaꞌha raꞌ ba babahn biꞌnxtuhbi chi mahziru guyuuꞌguiꞌw raꞌ ba nin bwaꞌha raꞌ ba pur xcweenta jweersi roo nin nahpaa Dxiohs.

13 Bachiñiꞌdxiuu nu loh Pahblu ya guyuuꞌtii nu laꞌn barcu ya zoo nu guihdxyi Asohn tin riꞌchi bachileꞌza nu Pahblu, laasii bwiꞌhnn ba lligaaba gwah ñah ba guihdxyi chi. 14 Ya chin badxaꞌga nu Pahblu guihdxyi Asohn, chiꞌchi zonee nu ba laꞌn barcu para guihdxyi Mitilene. 15 Ya biriaꞌhnee barcu laꞌhnu riꞌchi, ya chin barah gueꞌla gudiiꞌdxinee barcu laꞌhnu gahxu cweeꞌ isla nin laa Quiu, ya chin barah stuhbi gueꞌla chi badzihn nu pwertu xteenn Samos, ya chin guhldaa stuhbi dxyih badzihn nu guihdxyi Trogiliu, riꞌchi baziꞌlaaꞌdzi nu tuhbi carriyiꞌhn, ya dxyih chi gahca badzihn nu guihdxyi Miletu. 16 Ayi guclaaꞌdzi Pahblu ñahcataꞌh ba Asia niꞌchin ayiza gunnah ba ñoo nu guihdxyi Efesu laasii riooba ba gadzihn ba para guihdxyi Jerusalehn tin riꞌchi gutiꞌdxi ba dxyih lañih nin laa Pentecostehs.

17 Hasta guihdxyi Miletu guyuuꞌ Pahblu chin guxeꞌhla ba dxyiꞌdxyi loh raꞌ nin rnabwaꞌ laꞌh raꞌ xpwiinn Jesucristu guihdxyi Efesu tin guñiꞌnee Pahblu laꞌh raꞌ ba. 18 Ya chin badzihn raꞌ bwiinn Efesu raꞌ chi, chiꞌchi rahbi Pahblu loh raꞌ ba:

―Laꞌhtu naann tu xa guyuuꞌneen laꞌhtu desde dxyih nin badzihnaꞌhn loh yuh raꞌ xteenn Asia riiꞌ. 19 Gaduhbi chieempa guyuuꞌneen laꞌhtu baluuꞌyiꞌhn xchiꞌdxyi Jesucristu laꞌhtu cun gaduhbi stoꞌn, cun xcweenta ñihsabwii nin biaaba loon pur guelrbiinn duxa nin guzaꞌcaꞌhn xcweenta garaa raꞌ lligaaba dxaaba nin bwiꞌhnn raꞌ bwiinn Israel cun naꞌh laasii baluuꞌyiꞌhn xchiꞌdxyi Dxiohs laꞌh raꞌ ba. 20 Per naꞌh ayi basaꞌnaꞌhn gwazah baluuꞌyiꞌhn laꞌhtu xcweenta garaa nin nalluꞌhyi para laꞌhtu tin taꞌh tu loh duhlda; naꞌh baluuꞌyiꞌhn xchiꞌdxyi Dxiohs nez delaanta loh raꞌ bwiinn cun neezaa rwaaꞌ yihdzi raꞌ bwiinn. 21 Guñiꞌn loh raꞌ bwiinn Israel cun neezaa nin ayi naa raꞌ bwiinn Israel tin gusaguuꞌdzi stoꞌ raꞌ ba chezah raꞌ ba xneziuh Xtaada Jesucristu nuꞌh. 22 Yannah cagaxeꞌhla Spíritu Saantu Xtaada Dxiohs nuꞌh naꞌh para guihdxyi Jerusalehn, ya nin ayi gaꞌnnahn xi saꞌcaꞌhn riꞌchi. 23 Per naꞌnnahn cada tuhbi guihdxyi raꞌ hasta rdiꞌdxiꞌhn rñiꞌ Spíritu Saantu Dxiohs loon zidiꞌdxiꞌhn trabahjw duxa, zieꞌwꞌhn laꞌn lahtsi dxiꞌba. 24 Per naꞌh ayi riaan gudziꞌbaꞌhn xquel nabahanahn loh guidxyiyuh riiꞌ per nin nahpaa guꞌnnahn nahpaa guzaꞌloon xcarrehraꞌhn ziga naa xcweenta caargu nin baniꞌhi Daada Jesucristu naꞌh tin ganaalla lligaaba nayaa guluuꞌyiꞌhn laꞌh raꞌ bwiinn laꞌh Ñiꞌh rutaꞌh Ñiꞌh laꞌh raꞌ bwiinn loh duhlda. 25 Yannah laꞌn guhcabwaꞌla nin tuhbi tu ziga baluuꞌyiꞌhn xchiꞌdxyi Dxiohs laꞌhtu, ayiru gabiaꞌgarii gwaꞌha tu xpacaaꞌlahn. 26 Niꞌchin nin cañiꞌn dxyiꞌdxyi nin nanchii sidela ayi chuu tu ayi chaꞌzi tu xcweenta xchiꞌdxyi Dxiohs nin baluuꞌyiꞌhn laꞌhtu laasii nin tuhbi tu ayi biaꞌdxyi ñihn xcweenta dxyiꞌdxyi riiꞌ loh tu. 27 Garaatiiꞌ xchiꞌdxyi zaꞌca Dxiohs baluuꞌyiꞌhn laꞌhtu ya nin tuhbi xchiꞌdxyi Xtaada Jesucristu nuꞌh ayi biaꞌdxyi baluuꞌyiꞌhn laꞌhtu. 28 Niꞌchin gulgahpaa dziꞌtsi nee cun neezaa raꞌ snuhn raꞌ bwiinn nin naa raꞌ xpwiinn Dxiohs tin niꞌchi baniꞌhi Spíritu Saantu guinabwaꞌ tu loh raꞌ bwiinn nin naa xpwiinn Ñiꞌh, tin niꞌchin guziꞌ Ñiꞌh laꞌh raꞌ xpwiinn Ñiꞌh chi cun llerihn Ñiꞌh. 29 Laꞌnaann chaꞌyila, ziꞌ paaldaa bwiinn nin naa ziga maan duxa raꞌ nee ayi dxiaa raꞌ bwiinn raꞌ chi zuxiꞌhn raꞌ ba xneziuh Dxiohs chin ayirun loh guihdxyi raꞌ riiꞌ. 30 Ziuuꞌ za laꞌh gahca lasaaꞌ tu nin guiñiꞌ dxyiꞌdxyi dxixiꞌhw loh tu tin guunn raꞌ ba gusaaꞌn raꞌ xpwiinn Jesucristu xneziuh zaꞌca Dxiohs tin mahzi chenaꞌhla raꞌ ba laꞌh raꞌ nin gusaguiꞌhi laꞌh raꞌ ba. 31 Gulguiaꞌha tin ayi gusaguiꞌhi raꞌ ba laꞌhtu, ayi dxiaꞌlda stoꞌ tu loh chohnna yihza, dxyih naagueꞌla guñiꞌneen laꞌhtu hasta ñihsabwii badaa loon xcweenta tu laasii riaan laꞌhtu guisaguiꞌhi tu, per ñaan loh tu ayi chechii stoꞌ tu xcweenta dxyiꞌdxyi yaꞌdxi raꞌ chi. 32 Yannah, bwihtsi lasaaꞌ raꞌn rusiaꞌhanahn laꞌhtu loh xcweenta Dxiohs nee cun xcweenta xchiꞌdxyi Ñiꞌh nin nahpaa jweersi guzaꞌloh xtsiꞌnzaꞌca Dxiohs laꞌn lastoꞌ tu tin gaaldaa tu guelnabahan nacuubi nin guniꞌhi Dxiohs laꞌh garaa raꞌ bwiinn nin basiaꞌcaa Ñiꞌh loh duhlda. 33 Ayi guzaꞌbi stoꞌn xixteenn tu nin tuhbi xcaꞌyu tu nin xahba za tu chin baluuꞌyiꞌhn xchiꞌdxyi Jesucristu laꞌhtu. 34 Laꞌtu naann laꞌh gahca naꞌh bwiꞌhnnaꞌhn dziꞌn cun naaꞌhahn tin bioꞌh xi gudahwneꞌhn xamihgu raꞌn. 35 Ziꞌchi baluuꞌyiꞌhn xa guunn tu dziꞌn tin gacanee tu laꞌh raꞌ bwiinn nin ayi xi nahpaa, ya gasannah stoꞌ raꞌ nuꞌh dxyiꞌdxyi raꞌ nin guñiꞌ Xtaada Jesucristu nuꞌh mahzi chaꞌyi nin rudiꞌhi que no nin rcaꞌha.

36 Ya chin guyaꞌloh guñiꞌnee Pahblu laꞌh raꞌ ba garaa raꞌ dxyiꞌdxyi raꞌ riiꞌ, chiꞌchi bazuꞌnllihbi ba cun garaa raꞌ bwiinn raꞌ chi tin gudihdxyi-gunaaba raꞌ ba loh Dxiohs. 37 Ya ruꞌn duxa raꞌ ba chiꞌchi gudiꞌdzi raꞌ ba laꞌh Pahblu cun neezaa bachaꞌgarwaaꞌ raꞌ ba laꞌh Pahblu. 38 Ya guyuuꞌ nalaasa duxa stoꞌ raꞌ ba laasii rahbi Pahblu loh raꞌ ba ayiru gwaꞌharu raꞌ ba loh Pahblu nin stuhbitiiꞌ. Ya bagasiaꞌhan raꞌ ba Pahblu hasta bacah ba laꞌn barcu.