1 Orze' nzhab Jesús:

―Walika kwa'n nin lo go; xa' gat ño ro' kurral plo nzho rë mbëkxi'l, wa'n xa' ze'. 2 Per xa' ño ro' kurral, xa' ze' nak xa' walika xa' nikina rë mbëkxi'l. 3 No lë' xa' nikina ro' kurral, nixa'l xa'i par ño xa' nikina rë mbëkxi'l ze', no nilibe' rë mbëkxi'l ze' chi baxtor che'n bima. No or nigo' xa' bima, nibezh xa' tuga' rë mbëkxi'l ze' kun lë bima. 4 No or nilox nigoche xa' rë mbëkxi'l ze', orze' nizhubner xa' lo bima, orze' rë ma ñakë tich xa', porke nilibe' bima chi xa'. 5 Per tu xa' gat nilibe't rë mbëkxi'l ze', nayakët bima tich xa', lë'la karre nikë' bima lo xa', gat nzhakbe't bima chi xa'.

6 Midi'zh Jesús kure' par nabei chi nganu laxto' bixa' kwan gab widi'zh re', per nangazobyekt bixa'i.

7 Orze' nzhab Jesús xtu wëlt:

―Walika kwa'n nin, na nak nela ro' kurral plo ño rë xa' nak nela mbëkxi'l da ga'. 8 Rë xa' mbi'd lo go or naga yala lo go, ngok bixa' nela rë men wa'n ga', no nela rë men nzhut men ga'; per rë men da xa' nak nela mbëkxi'l ga', une bixa' gat lë't Dios mixë'l rë men ze'. 9 Na nak nela ro' kurral ga', no rë xa' ño le'n kurral che'n Dios por na, lë' bixa' ro' lo kwa'n nazhe'b kwa'n nzho bixa', no gak bixa' nela rë mbëkxi'l ma ño no niro' le'n kurral par nzhao ma yix nayë'. 10 Per rë xa' nzë namás par liwa'n, no par chil xa' rë men da xa' nak nela mbëkxi'l ga'; per na nzhal par nen yalnaban kwa'n nayot lox par go. 11 Lë'da nak baxtor xa' nazhi' rë ma che'n, mbaino ter gat da por lë' bima, 12 per rë xa' nikë zhi'n nab tsa por dimi, or nine xa' lë' tu ma nazhe'b nzë, orze' nila' nzë'b xa' rë mbëkxi'l, nikë' xa' karre, porke gat lë't xa' xa' nak che'n ma; orze' nizen ma nazhe'b ze' rë mbëkxi'l, mbaino más ma nire'chbe orze'. 13 Men nzhax ka' ze', nikë' xa' karre or nine xa' ma nazhe'b ze', nila' nzë'b xa' rë mbëkxi'l, lë' xa' nile' por dimi namás.

14 Orze' nzhab Jesús:

―Nase nazhi' rë mbëkxi'l da, no nilibe'n rë ma da; mbaino rë ma da, nilibe' ska rë ma da. 15 Se'ska nilibe' Xuza da, no nilibe'n Xuza; mbaino ter gat da por rë men da, xa' nak nela mbëkxi'l ga'. 16 Mbaino kinun más men, xa' nak nela mbëkxi'l, ma naga yo le'n kurral da; kuze' naki'n nu bixa' yakan; no gon bixa' kwa'n gapa par kwin bixa' tutsa kun más rë men da xa' nzho le'n kurral da, mbaino tutsa da kina rë bixa'.

17 ’Lë' Xuza Dios nazhi' da, por niye laxto'n gat da, par ruban da xtu wëlt. 18 Yent cho men gak gut da chi lë'da naziyël gat da. Zak len gat da, mbaino zak len ruban da. Kure' nak kwa'n ne Xuza len.

19 No or mbin rë xa' nile' mandad xid rë men Israel xtu wëlt rë widi'zh re', orze' xtu wëlt chop mod ngok xigab che'n rë bixa', 20 nzho bixa' nzhab:

―¿Chon nzhon go kwa'n nidi'zh xa' ba'? ¡Ka mbi mal nzen xa' ba', kuze' nzhak miyizh xa'!

21 Per más bixa' nzhab:

―¡Wenka xa', porke nagakt di'zh tu xa' nzho mbi mal laxto' sa'! ¿No xmod liyak tu xa' nzho mbi mal laxto' tu men nikal-lo?

22 Le'n rë zhë ze', mer rë mbëo' nayag, or nzhal lani kwa'n nile' bixa' gazob li'n che'n yado' yezh Jerusalén, 23 dub nikizë Jesús ro' yado' gax laka Ro' Pwert che'n Salomón, 24 no ze' migan nayax men xa' nile' mandad xid rë men Israel, naka'n plo nzo Jesús, par nzhab bixa':

―¿Pok ka nel lo no cho lux? Chi lu nak Krist, naka'chtal; binei lo no tuli.

25 Orze' nzhab Jesús:

―Lë'da ni lai lo go, per gat ñilat go da; por rë zhi'n nazhon kwa'n nilen por mandad che'n Xuza nilu', cho ka da, 26 per gat ñilat go da, porke gat lë't men da go. 27 Rë xa' nak men da, nzhon bixa' widi'zh da mbaino nilibe'n bixa', no ñi'dkë bixa' ticha; 28 mbaino len, ban bixa' kun Dios par dubta', no ni nayora' zhë lox bixa' lon, no yent cho kubchi bixa' lon. 29 Lë' Xuza michi bixa' lon, no lë'gaka Me más kwa'ro lo rë kwa'n nzho, no yent cho gak kubchi rë men da lo Me. 30 Lë' Xuza Dios no na, tutsa nak no.

31 Xtu wëlt, nguzen rë men Israel ze' ke par ngakë' bixa'i ta' Jesús, 32 per nzhab Jesús lo bixa':

―Por mandad che'n Xuza milen rë zhi'n nazhon xid go; no nal, ¿por cho tu rë zhi'n nazhon re' nzhakla go gut go da kun ke?

33 Orze' nzhab rë men Israel ze':

―Nakot no kel por ni tu rë kwa'n nazhon mile'l ba', sino por midi'zhal kwa'n gat lë' lo Dios; nzhabal, nakal yubska Dios, mbaino ¡men yizhyuolx!

34 Per nzhab Jesús lo bixa':

―¿Chi gat lë't lo ley che'n go nzobni' widi'zh re': “Na ni, lë' go nak dios”? 35 Nane be, par dubta' wali kwa'n nzobni' lo Ley che'n Dios, yent cho gak chë'i. Men miza' Dios widi'zh re', nzhab Me, xa' re' nak nela Dios ga'. 36 No chi lë' Dios ngule da par mixë'l Me da yizhyuo re', orze', ¿chon nidi'zh go, midizha kwa'n gat lë' lo Dios, por midizha, nak da Xga'n Dios? 37 No chi lë'da gat nile rë kwa'n nzhakla Xuza gak, orze' bila' go nayilat go da; 38 per chi nilene, ter nayilat go da, namás biwi' go por rë kwa'n nilen, par ne goi no par zobyek go, lë'da tutsa nak kun Xuza, no tutsa nak ska Xuza kun na.

39 Orze' xtu wëlt ngokla bixa' ngazen bixa' Jesús, per mile' Jesús gan ya' bixa'. 40 Orze' miëk Jesús par xtu ro' you' Jordán, plo mililëi' Juan men le'n nits, ze' mia'n Jesús che'p, 41 no ze', nayax men ngwatswi' lo Jesús, kidi'zh bixa':

―Ter nangale't Juan ni tu rë zhi'n nazhon, per rë kwa'n midi'zh Juan por miyi' re', lë'i walika.

42 No ze' nayax men ngwayila Jesús.