1 Ne biree Jesús de ndaani guidxi que, uyé lu dani Olivo. 2 Sti dxi que siadó' ro' bigueta be ndaani yu'du ro' ne bidxiña irá xixé binni guidxi que laabe para gurí be cusiidi be laaca'. 3 Raqué nuu cabe bedané ca maistru de ley ne ca fariseu ti gunaa bigaa né jnadxii, ne bizuhuaa ca gunaa que galahui', 4 ne na ca rabi ca laabe:

―Maistru, biaa gu'yu gunaa ri' yendá cabe laa ne jnadxii. 5 Lu ley bidii Moisés laadu la? na uchá du guie irá casi laabe ca. Yanna, lii ya', xi nou'.

6 Uní' cabe zaqué para gu'ya si cabe xi na be ti ganda cu' cabe xqueja be. Peru laabe laga guta udaa be ne cucaa né be bicuini ná be layú. 7 Peru tantu si canaba diidxa ca laabe la? biasa be ne rabi be laaca':

―Pa nuu tuuxa qué huayuu dxi uchee la? laa uzulú cu' ná guie uchá laabe.

8 Ne bigueta guta udaa be cucaa be layú. 9 Casi bina diaga cabe ni uní' be que bizulú biree ca binni gola ne zaqué tobi tobi dede birá cabe, purti nanna cabe cadi nayá ladxidó' cabe. Ne ma laasi be ne gunaa que biaana cabe. 10 Oraque biasa be ne biiya be ma stubi si gunaa que nuu, para rabi be laa:

―Uná cani caguu xqueja lu que. Iruti nudxiiba donda ique lu la?

11 Para na gunaa que:

―Iruti, Señor.

Oraque na be:

―Nin naa, qué zudxiiba donda ique lu'. Uyé ne ma cadi uchee rou'.

12 Bigueta uní' né be ca binni nuu ndaani yu'du que, na be:

―Naa zeda gaca casi biaani ni ruzaani binni guidxilayú. Tu gueda nanda naa la? zapa biaani ni rudii enda nabani, ne qué ziuu dxi sa lu guelacahui.

13 Oraque na ca fariseu rabi laabe:

―Qué risaca di ni riníu' ca, purti laca lii caníu' tu naca lu'.

14 Para rabi be laaca':

―Neca laca naa rinié tu naca' peru dxandí ni rinié', purti nanna padé benda ne paraa chaa'. Peru laatu la? qué ganna tu padé benda nin paraa chaa'. 15 Rudxiiba tu donda ique binni casi runi binni guidxilayú. Peru naa qué rudxiiba donda ique iruti'. 16 Ne neca pe nudxiiba donda, ñune ni jneza purti cadi naa sia' ñune ni, sínuque naa ne Bixhoze ni biseenda naa. 17 Cá lu ley stitu, ni iní' chupa binni la? ngue nga ni dxandí'. 18 Rusihuinne tu naca', ne laca rusihuinni Bixhoze ni biseenda naa tu naca'.

19 Oraque na ca rabi ca laabe:

―Paraa nuu Bixho'zo ya'.

Para rabi be laaca':

―Qué runibiá' tu naa ne qué runibiá' tu Bixhoze'. Pa ñunibiá' tu naa la? laca ñunibiá' tu Bixhoze'.

20 Irá nga uní' Jesús ra cusiidi ndaani yu'du que, gaxha de ra nuu caja ra riaba ofrenda. Iruti ninaaze laabe purti ca'ru idxiña xhiora be.

21 Bigueta rabi be laaca':

―Ma chaa'. Zuyubi tu naa peru qué zanda che tu ra chaa', sínuque zati né tu stonda tu.

22 Oraque na ca judíu:

―Ñee chi guuti be laca laabe la? purti na be qué zanda chuu nu ra che be.

23 Para rabi be laaca':

―Laatu za tu de guidxilayú; naa de ibá' naa. Laatu binni guidxilayú laatu; naa cadi binni guidxilayú naa. 24 Nga runi gudxe laatu zati né tu stonda tu. Ne zacá zaca ni. Pa qué guni cre tu naca ni gudxe laatu que la? zati né tu stonda tu.

25 Oraque na ca rabi ca laabe:

―Tu ga lii ya'.

Para rabi be laaca':

―Dede dxi bizuluá' maca gudxe laatu tu naca'. 26 Napa stale ni ñabe laatu ne nudxiiba donda ique tu, peru rue nia binni ni gudxi si ni biseenda naa inié', ne ni na be nga jneza.

27 Peru qué ñene ca pa cuzeete be Dios. 28 Para rabi be laaca':

―Dede ora ma undisa tu Hombre Biseenda Dios luguiá', óraque ru nga ganna tu tu laa. Ne qué rune gasti de naa sia' sínuque rinié ni bisiidi Bixhoze naa. 29 Biseenda Bixhoze naa, ne nuu né naa. Qué huasaana be naa stube purti qué riaana dxie de gune ni riula'dxi be.

30 Ne laga caní' be irá nga la? uyuu stale tu bini cre laabe.

31 Oraque na be rabi be ca judíu ni ma bini cre laabe que:

―Pa qué iree chu tu de lu stiidxa la? zaca xpinne pia' laatu. 32 Ne zanna tu ni dxandí', ne zaladi tu ra cá tu yaga purti ma nanna tu ni.

33 Para na ca rabi ca laabe:

―Za du de Abraham, ne qué huayuu dxi icá du yaga lu ná iruti'. Ximodo ndi nou' zaladi du de ra cá du yaga ya'.

34 Oraque rabi be laaca':

―Laucaa diaga ni chi tidxe laatu ri'. Irá cani ruchee né Dios la? cá ca yaga lu ná enda ruchee. 35 Xiiñi binni ziaana ralidxi bixhoze, peru ni runi si xhiiña cabe la? zándaca chu' dxi cuee cabe laa. 36 Nga runi pa indadi Xiiñi Dios laatu, zalaa pe tu. 37 Nanna za tu de Abraham peru cuyubi tu guuti tu naa purti cadi cacaa tu ni cayabe laatu. 38 Rue nia laatu ni culuí' Bixhoze naa, ne laatu runi tu ni cayabi bixhoze tu laatu.

39 Oraque na ca judíu que rabi laabe:

―Abraham nga bixhoze du.

Para rabi be laaca':

―Pa ñaca tu xiiñi Abraham la? ñuni tu ni bi'ni Abraham. 40 Gudxe sia' laatu ni gudxi Dios naa ne yanna ma racala'dxi tu guuti tu naa. Cadi zacá bi'ni Abraham. 41 Laatu la? runi tu xhiiña bixhoze tu.

Oraque na ca':

―Cadi xiiñi guidxi laadu sínuque nanna du tu bixhoze du, ne Dios nga Bixhoze du.

42 Para rabi be laaca':

―Pa ñaca dxandí xiiñi Dios laatu la? ñanaxhii tu naa, purti zaya de Dios ne ma benda rarí'. Cadi stube benda', sínuque laabe biseenda be naa. 43 Xiñee qué riene tu ni rinié'. Qué riene tu purti qué rucaa diaga chaahui tu stiidxa'. 44 Binidxaba nga bixhoze tu ne racala'dxi tu guni tu ni na be. Dede dxi bizulú guidxilayú huayuuti be binni, ne qué huayuu dxi iní' be ni dxandí', purti qué lica ganna be xii nga ni dxandí'. Ora rusiguii be la? de laabe riale ni, purti nabé rusiguii be ne laabe nga bixhoze gola enda rusiguii. 45 Naa purti rinié ni dxandí la? qué runi cre tu naa. 46 Tu de laatu zanda udxiiba donda ique'. Pa rabe laatu ni dxandí la? xiñee qué runi cre tu naa. 47 Ni ma xiiñi Dios laa la? zucaa diaga stiidxa Dios. Laatu qué rucaa diaga tu stiidxa be purti cadi xiiñi be laatu.

48 Oraque na ca judíu rabi laabe:

―Cayabi ca du samaritanu lii ne nuu neu binidxaba ya'.

49 Para rabi be laaca':

―Cadi nuaa nia dia' binidxaba', sínuque cusisaca Bixhoze', peru laatu raani ná tu naa. 50 Ne cadi cuyube dia' usisaca binni naa peru nuu tu cuyubi ni, ne laa nanna xii nga jneza. 51 Gabe ca' laatu, tu icaa stiidxa' qué ziuu dxi gati'.

52 Oraque na ca judíu:

―Yanna huaxa ma nanna du dxandí nuu neu binidxaba', purti nou' tu icaa stiidxa lu qué ziuu dxi gati'. Xiñee ga guti Abraham ne ca profeta ya'. 53 Ñee jma nandxó' lo que bixhoze du Abraham la? Guti be ne laca guti ca profeta. Tuu nga ru'nu lii pue.

54 Para rabi be laaca':

―Pa laca naa rusisaca naa la? qué risaca dia', peru cadi nga di nga laani sínuque Bixhoze nga rusisaca naa. Laabe nga ni na tu Dios stitu ca. 55 Peru qué runibiá' tu laabe. Naa la? runebia'ya laabe. Pa ñaca qué ñunebia'ya laabe la? nusiguiee casi rusiguii tu. Peru runebia'ya laabe ne ricaa stiidxa be. 56 Bieche bixhoze tu Abraham zuuya naa dxi guenda'. Biiya be naa ne nayeche biaana ladxidó' be.

57 Oraque na ca judíu:

―Nin ca'ru gapu cincuenta añu ne nou' biiyu Abraham la?

58 Para rabi be laaca':

―Laucaa diaga chaahui ni chi tidxe laatu ri': Dede ante gale Abraham, naa maca nuaa'.

59 Oraque gundisa ca guie nuchá ca laabe, peru bicachi lú be ne udi'di be lade ca binni que biree be de ndaani yu'du que.