1 Cayaadxa ru xhoopa gubidxa para ganda saa que, uyé Jesús Betania, ra nuu Lázaro ni bisibani que. 2 Raqué bidii cabe laabe ti endaró xhi. Marta cutiidi ni ne Lázaro zuba né laabe ra mexa que. 3 Ne ucuaa María ti libra aceite rindá' naxhi ni nabé risaca, uxubi ñee be ne bichaa ni ne guicha ique, dede bidxá yoo que de xho' naxhi que. 4 Oraque na Judas Iscariote xiiñi Simón, tobi de ca discípulu stibe (dxa ni chi utoo laabe que):

5 ―Xiñee qué nidoo aceite rindá' naxhi ri chonna gayuaa denariu para ñaazi lú ca pobre.

6 Uní' be zaqué, cadi purti cayá be ca pobre sínuque purti gubaana laabe ne purti rapa be caja bidxichi que, ne ribee be lú ni para laabe.

7 Para na Jesús rabi laabe:

―Zaa nuu be. Cayapa be ni para naa dxi igaache'. 8 Ca pobre la? qué ziuu dxi guiaadxa lade tu, peru naa, zadxiña dxi ma qué ziuaa nia laatu.

9 Stale de ca judíu ora gunna ca nuu Jesús raqué, beda guuya ca laabe, peru cadi laasi be, sínuque laca beda guuya ca Lázaro ni bisibani be que. 10 Ngue runi uní' stiidxa ca xaíque sti ca sacerdote guuti ca nécaca Lázaro, 11 purti pur Lázaro stale de ca judíu caxele de laaca', cayuni cre Jesús.

12 Sti dxi que stale binni ni zigapa saa ro' que, bina diaga ma zeda yuu Jesús Jerusalén. 13 Para biree ca zichagalú ca laabe. Bichuugu ca ziña daa ne bicheeche ca cani ra zidi'di be. Ne bicaa ca ridxi:

―¡Lausisaca ni biseenda Dios! ¡Ndi nga Rey sti Israel!

14 Bidxela be ti burru huiini', udxi'ba be laa, casi cá ni ra na:

16 Qué ñene gá ca discípulu cani cayaca que. Dede dxi ru ma nuu be ibá', dxi que ru bietenala'dxi cabe maca cá irá ni lu gui'chi', ne casi cá ni que zaqué bi'ni binni laabe.

17 Nuu ca binni bi'ya ra bisibani be Lázaro raqué, cayuí' ca ni. 18 Ne ngue runi stale binni yechagalú laabe, purti bina diaga ca de milagru bi'ni be que. 19 Oraque na ca fariseu:

―Biaa guuyu', ma qué zanda guni nu gasti'. Ma irá xixé binni guidxilayú zinanda laabe.

20 Laca uyé caadxi ni cadi judíu lade cani yeusisaca Dios ndaani saa que. 21 Ne uyé ca ra nuu Felipe de Betsaida, ti guidxi sti Galilea, ne rabi ca laa:

―Señor, racala'dxi du idu'ya du Jesús.

22 Para uyé Felipe, yetidxi ni Andrés. Oraque iropa ca yetidxi ca ni Jesús. 23 Para na Jesús rabi laaca':

―Naa nga Hombre Biseenda Dios ne ma bidxiña hora usisaca be naa. 24 Peru gabe ca' laatu, pa qué gati ti guie xuba ora guiaba ndaani yu la? qué zache ndu, peru pa gati ni la? zandani ni ne zacá lú ni. 25 Tu ganaxhii xpida zuniti ni, peru tu qué izaala'dxi xpida ndaani guidxilayú ri la? cayapa ni para enda nabani ni qué zaluxe. 26 Ni racala'dxi gaca xpinne la? sa nanda naa, ne ra chaa la? laca zie ca xpinne' ne zusisaca Bixhoze laaca'.

27 Ma nuu yuuba ladxiduá'. Yanna xi inié'. Ñee zabe Bixhoze ulá naa de ni chi tide ri la? Co', purti para tide ni nga runi bidxiña dede rarí'. 28 Oraque na be:

―Bixhoze', bisisaca lá lu jma.

Oraque ucuá ti ridxi de ibá', na:

―Ma bisisaca ni, ne zusisaca rua' ni sti tiru.

29 Bina diaga ca binni ni nuu raqué ridxi que, ne caadxi de laaca na rayu ni. Peru xcaadxi na ti ángel uní' né laabe. 30 Para rabi be laaca':

―Cadi ucuá di ridxi ri para naa sínuque para laatu. 31 Yanna nga ma chi guiaba ná binni guidxilayú ne ma chi ilá ni runi mandar ndaani ni ti ladu. 32 Ne ora ma undisa cabe naa la? zabidxe binni gueeda ra nuaa'.

33 Ra uní' be zacá bisiá be diidxa xi enda guti chi caa be. 34 Oraque na ca binni que rabi laabe:

―Laadu huayuna diaga du xi na Xqui'chi Dios. Na ni qué ziuu dxi gati Cristu. Xi modo nga nou' lii, naquiiñe indisa cabe Hombre Biseenda Dios lu cruz. Tuu nga Hombre Biseenda Dios ca ya'.

35 Para rabi be laaca':

―Ma nagaba si dxi nuu biaani lade tu. Yanna lasá laga napa tu biaani ti cadi inaaze guelacahui laatu. Purti cani rizá ra nacahui la? qué ganna ca paraa che ca'. 36 Naa nga biaani ni ruzaani laatu ne laga nuaa nia laatu laguni cre naa ti chu' tu ra naya'ni'.

Biluxe si uní' be ngue, biree be de ra nuu ca', yeucachi lú be.

37 Neca bi'ni be stale milagru nezalú ca' peru qué ñuni cre ca laabe. 38 Ne uca ni zacá para iree ni casi pe uní' profeta Isaías chiqué ra na:

42 Neca ne irá nga guyuu stale de ca xaíque bini cre laabe, peru naga'chi' purti ridxibi ca cuee ca fariseu laaca de ndaani yu'du'. 43 Purti jma riula'dxi ca usisaca binni laaca que usisaca Dios laaca'.

44 Oraque uní' Jesús ne gana na:

―Ni runi cre naa la? runi cre ni biseenda naa. 45 Ne ni ruuya naa la? ruuya ni biseenda naa. 46 Naa nga biaani ni ruzaani laatu. Yanna benda ndaani guidxilayú ti irá tu guni cre naa cadi guiaana ra nacahui. 47 Ni ucaa diaga naa ne qué guni ni rabe la? qué zudxiiba donda ique, purti cadi beda udxiiba donda ique binni guidxilayú sínuque beda ula'ya laaca'. 48 Peru tu udxii naa, qué icaa stiidxa la? ma napa ni udxiiba donda ique. Ca diidxa ni unié', ca nga udxiiba donda ique cabe dxi cuidxi Dios cuenta binni guidxilayú. 49 Purti cadi de naa sia' unié' sínuque maca udixhe Bixhoze ni biseenda naa xi inié'. 50 Nanna dxi'che ni udixhe Bixhoze inié ca la? rudii ni enda nabani ni qué zaluxe. Nga runi rinié ni casi gudxi Bixhoze ni naa.