1 Na Jesús rabi ca discípulu sti':

―Qué ziaadxa ni uquiinde binni para uchee, peru gapa gá si ni guni ni que laa. 2 Jma galán ñaca para laa pa nugaanda cabe ti guie ngola yanni, nundaa cabe laa ndaani nisadó', que ñuni pur nuchee tobi de ca nahuiini'. 3 Laguuya gá qué chi guni tu zacá.

Pa uchee né hermanu stiu' lii la? bilidxe laa, ne pa inaba be perdón lii la? bini perdonar laabe. 4 Ne pa gadxe tiru uchee né be lii ti dxi ne gadxe tiru que gueda naba be perdón lii la? bini perdonar laabe.

5 Oraque na ca apóstol que rabi Señor:

―Bitale fe stidu.

6 Para rabi be laaca':

―Pa ñapa tu fe neca bia' ti biidxi mostaza la? ñanda ñabi tu yaga ca ñaaxha de xcu, niuzuhuaa ndaani nisadó', ne ñe ni.

7 Pa ñapa tu ti mozo nicheza layú o nigapa yuze, ñee casi ñeeda ñabi tu laa: “Gurí ruaa mexa” la? 8 Co' nja', sínuque ñabi tu laa: “Ulee xha'bu', bi'ni endaró xhi ne udiiu ni gahua xhie'. Iluxe sia', óraque ma cui lu lii, go xhiu'.” 9 Lácaxa rudii tu diuxquixe mozo que purti bi'ni ni gudxi tu laa. 10 Zacaca laatu ora ma bi'ni tu ni bisaana Dios lu ná tu la? sicarí nga lainí': “Gasti qué ñuni du purti bini du ni nexhe si guni du.”

11 Ra ze Jesús Jerusalén udi'di galahui Samaria ne Galilea. 12 Ra yendá be ti guidxi huiini biree chii hombre napa lepra, bizuhuaa ca zitu 13 ne bicaa ca ridxi laabe:

―Jesús, Maistru, biá laadu.

14 Ora bi'ya be laaca rabi be laaca':

―Laché ra nuu sacerdote. Lachiuluí' laa ma bianda tu.

Ne laga ze ca neza nisi pe byui' lepra que ladi ca'. 15 Ora bi'ya tobi de laaca ma bianda, bigueta uxooñe', cucaa ridxi, cusisaca Dios. 16 Bizuxibi xa ñee be dede gudixhe ique layú, cudii diuxquixe. Ngue nda samaritanu laa. 17 Oraque na be:

―Ñee cadi chii cabe bianda la? Laga xca' que ya', uná laaca'. 18 Ñee iruti ru qué nibigueta nusisaca Dios sínuque laga ni cadi binni laanu ri la?

19 Ne óraque rabi be hombre que:

―Biasa, uyé. Bianda lu purti bini cre lu'.

20 Oraque unaba diidxa ca fariseu laabe padxí uzulú guni mandar Dios. Para rabi be laaca':

―Dxi uzulú guni mandar Dios nga cadi ni ihuinni, 21 ne iruti qué zanda gabi laatu, “Rarí cayaca ni”, o “Rarica'”; purti ma cayuni mandar Dios lade tu.

22 Oraque rabi be ca discípulu stibe:

―Zadxiña dxi zacala'dxi tu gu'ya tu Hombre Biseenda Dios, neca ti dxi si, peru qué zuuya tu. 23 Ziuu tu gabi laatu: “Rarí nuu be”, o “Rarica nuu be”, peru qué chi nanda tu. 24 Purti casi riuu xpiaani rayu de ti ladu para sti ladu, zacaca zaca ni dxi gueeda be sti tiru. 25 Peru nirudó' naquiiñe acaná be ne udxii deche ca binni nuu yanna ri laabe. 26 Cásica uca dxi bibani Noé, zacaca zaca dxi ibigueta Hombre Biseenda Dios. 27 Cayó cabe, cayé' cabe, cachaganá cabe ne cucheela cabe dede dxi biuu Noé ndaani arca ne biaba nisa guie, binitilú irá cabe. 28 Ne zaqueca guca dxi bibani Lot. Cayó cabe, cayé' cabe, cazí' cabe, cutoo cabe, caguu cabe biní, ne cucuí cabe yoo. 29 Peru casi guxha ñee Lot de ndaani guidxi Sodoma biaba gui ne azufre de ibá'. Binitilú irá cabe. 30 Zacaca nga zaca ni dxi guenda sti tiru.

31 Ni dxi'ba ique yoo dxi que la? cadi guiete chi caa sti ndaani yoo. Ne zaqueca ni nuu rañaa cadi ibigueta gueda caa sti'. 32 Laguietenala'dxi xi uca xheela Lot. 33 Tu gacala'dxi ulá xpida zuniti ni, peru tu uniti ni la? zalá.

34 Ne gabe ca' laatu, ra nexhe chupa lu tobi si luuna', zie tobi que, stobi que ziaana. 35 Ne zaqueca ra nuu chupa gunaa cayuutu', zie tobi, ziaana stobi. 36 Zaqueca ra nuu chupa hombre rañaa, zie tobi, ziaana stobi.

37 Oraque na ca rabi ca laabe:

―Paraa gaca ni ya', Señor.

Para rabi be laaca':

―Ra nuu ti cuerpu ni ma guti, raqué nga cui zisi irá so'pe'.