1 Ne ora biete Jesús de lu dani que, yenanda stale binni laa. 2 Lade ca binni que zeeda ti hombre huará, napa lepra. Bidxiña be bizuxibi be xañee Jesús ne na be rabi be laa:

―Señor, nanna zanda gusianda lu naa, pa na lu'.

3 Para gudixhe ná Jesús luguiá be ne rabi laabe:

―Zusianda lii.

Ne oraqueca bianda be ne nayá biaana ladi be. 4 Para na Jesús rabi laabe:

―Biiya gá qué chi tidxu ni iruti', sínuque uyé ra nuu sacerdote ne bidii ti ofrenda casi bicaa Moisés guni binni ora ma bianda, para uluí' lu binni ma bianda lu'.

5 Ne ora ziyuu Jesús ndaani guidxi Capernaum, bidxiña ti capitán ne na rabi laa:

6 ―Señor, rinaba lii gusianda lu ti mozo stinne'. Nexhe be ralidxe', ma guti galaa be, ne cayudu yuuba laabe.

7 Para rabi be laa:

―Ziaa' ne zusianda laabe.

8 Oraque na capitán que rabi laabe:

―Iruti nga naa para cheu' ralidxe'. Uní' si, ne zacá zianda mozo stinne'. 9 Purti nuu tu runi mandar naa ne laca nuu ca soldadu ne rune mandar laaca'. Pa gabe tobi che la? zie, ne pa gabe stobi gueeda la? zeeda, ne pa gabe mozo stinne', bi'ni ndi la? zuni.

10 Ora bina diaga be xi uní' xaíque que la? bidxagayaa be ne na be rabi be cani nanda laabe que:

―Laguuya', nin lade cani za de Israel qué huadxela nin tobi ni napa fe bia' napa hombre ri'. 11 Ne gabe ca' laatu ziuu dxi gueeda stale binni de idubi naca guidxilayú ne ziuu né ca Abraham ne Isaac ne Jacob ra runi mandar Dios. 12 Laga cani nexhe ñuu, ca ngue pe qué ziuu, sínuque zalá ca lu guelacahui purti qué ñuni cre ca', ne raqué gu'na ca' dede go yaa ca guidi ruaa ca'.

13 Ne óraque rabi be capitán que:

―Guyé yanna, ne cásica bini cre lu ca, zacá zaca ni.

Ne dxandí oraqueca bianda mozo que.

14 Oraque guyé Jesús ralidxi Pedru, ne biiya nexhe né suegra be xindxá'. 15 Para guda'na Jesús ná suegra be ne biree xindxá' que de laa. Ne oraqueca biasa gunaa que bidii ni gudó cabe.

16 Huaxhinni que bedané cabe stale binni ni caguite binidxaba ique, ra nuu Jesús. Ne ti diidxa si uní' be biree ca binidxaba que. Ne laca bisianda be stale binni huará. 17 Ne guca ni zaqué ti iree ni modo pe uní' Dios de ruaa profeta Isaías chiqué:

18 Ti tiru biiya Jesús ma rí binni laa, para gunaba tidi sti ladu nisa Galilea que. 19 Peru nuu ru be raqué beeda ti maistru de ley ra nuu be, na rabi laabe:

―Maistru, racaladxe chi nanda lii ratiica che lu'.

20 Para rabi be laa:

―Ca mistu gui'xhi napa ca ra guiaana ca', ne ca mani huiini laca napa ca lidxi ca', peru naa nga Hombre Biseenda Dios ne qué gapa nin ra quixhe ique'.

21 Ne laca beeda tobi de ca discípulu stibe ra nuu be, na rabi laabe:

―Señor, bidii lugar ucaache sia' bixhoze ti chi nanda lii.

22 Peru na be rabi be laa:

―Dananda naa. Bisaana nga guni cani qué na gueda nanda naa.

23 Biuu be ndaani canuá que ne laca biuu ca discípulu stibe. 24 Ne mala biete ti bi yooxho', ne biasa ola dede biuu nisa ndaani canuá que, peru ma nisiaasi be óraque. 25 Para bicuaani ca laabe, ne na ca rabi ca laabe:

―Gucané laadu, pacaa zati nu.

26 Para rabi be laaca':

―Xiñee cadxibi tu. Aque huaxié' napa tu fe xa, hombre ca'.

Oraque biasa be ne gudxi be bi yooxho que guiaana dxí, ne zaqueca gudxi be ca ola que, ne oraqueca guta dxí cani. 27 Nabé bidxagayaa ca hombre que ne na ca':

―Tu naca hombre ri pue, dede bi ne nisa runi ni na.

28 Ra yendá cabe cherica nisa que, biuu cabe neza Gadara. Ne raqué bidxaga lú be chupa hombre ni riguite binidxaba ique, biree ca de lade ba'. Iruti randa ridi'di neza ra nuu ca' purti ricá ca luguiá binni. 29 Ne bicaa ca ridxi laabe, na ca':

―Xi napa né du lii, Jesús, Xiiñi Dios. Ñee zeda guniná lu laadu ante ganda dxi la?

30 Zitu huiini de ra nuu cabe que, canayó jma bihui. 31 Para na ca binidxaba que rabi laabe:

―Pa chi ndeeu laadu de ca hombre ri la? bidii lugar chu' du luguiá ca bihui rica'.

32 Oraque rabi be laaca':

―Laché.

Ne oraqueca biree ca yechuu ca luguiá ca bihui que, ne mala biete ti ca bihui que de ra dxi'ba ca', yeguiaba ca ndaani nisa ne raqué guti ca'.

33 Oraque bixooñe cani cayapa laacame, de yendá ca ndaani guidxi que, ne byui' né ca irá binni xi guca', ne ni bizaaca ca hombre ni udxite binidxaba que. 34 Para biree idubi guidxi que yechaga lú ca Jesús ne gudxi ca laabe iree be de xquidxi ca'.