1 Bireeche stiidxa Jesús ca dxi que, ne ora gunna Herodes, gobernador de Galilea, irá ni la? 2 na rabi ca xpinni:

―Laguuya irá ni cayuni hombre ca. Nanna pa cadi laabe nga Juan Bautista ma bibani, ne nga runi cayanda cayuni be irá nga.

3 Uní' Herodes zacá purti nanna xi ma bi'ni Juan Bautista. Gunaaze be laa ne bindiibi be laa ne biseguyoo be laa, runi Herodías xheela Felipe bi'chi be. 4 Bidxiichi be purti gudxi Juan laabe cadi jneza chu' né be xheela bi'chi be. 5 Gucala'dxi be ñuuti be Juan oraqueca, peru bidxibi be purti nabé nadxii ca binni que laa ne napa cabe laa de profeta.

6 Peru dxi guca lani xpidó' be la? beda uyaa xiñi dxaapa Herodías nezalú be ne nabé uyuula'dxi be modo biyaa. 7 Para na be rabi be laa:

Intiica inabu naa, zudiee lii.

8 Oraque gudxi jñaa badu dxaapa que laa xi inaba'. Para uyé ra nuu be ne rabi laabe:

Racaladxe udiiu naa ique Juan Bautista ndaani ti bladu'.

9 Ne ora gudxi badu dxaapa que nga laabe la? ucaná ladxidó' be, pa ñanda si qué nudii be ni canaba badu dxaapa que, peru pur ma bidii stiidxa be laa nezalú irá cani zuba né laabe ruaa mexa que la? uní' be icaa badu dxaapa que ni. 10 Para bisenda tidxi be ugá ca xpinni be yanni Juan ndaani lidxi guiiba que. 11 Ne bedané cabe ique que ndaani ti bladu', bidii cabe ni badu dxaapa que, de laa ma bidii ni jñaa.

12 Oraque uyé ca discípulu sti Juan, yecaa ca cuerpu que ne yeucaachi ca ni, para yetidxi ca Jesús xi guca'.

13 Casi gunna Jesús ni, bixele ca de raqué, uyuu ndaani ti canuá, uyé ndaani ti gui'xhi ra iruti guinni. Peru casi gunna binni paraa ze be la? biree ca de ndaani guidxi que, zizá ca dede yendá ca ra nuu be. 14 Ne ora ziyete be de lu canuá que, biiya be mápeca rí binni raqué ne biá be laaca'. Para bisianda be cani huará ni nuu lade ca'. 15 Ne biaana ca binni que raqué dede ma huadxí. Biiya si ca discípulu stibe ma huadxí ngue la? bidxiña ca ra nuu be, ne na ca':

―Ndaani gui'xhi ndi nuu nu, ne ma caxhinni, xiñee qué ga'bu ca binni ca che ca yanna, ti ganda che ca ndaani ca guidxi huiini ca, chi sí ca ni go xhi ca'.

16 Para na be rabi be laaca':

―Cadi naquiiñe che cabe. Laudii ni go cabe laatu.

17 Oraque na ca':

―Qué gapa di du gasti rarí jma que gaayu pan ne chupa benda.

18 Para rabi be laaca':

―Latané cani naa.

19 Oraque bicuí be ca binni que lú ca guixi huiini nuu raqué ne ucuaa be gaayu pan ne chupa benda que ne undisa lú be ibá' bidii be diuxquixe Dios. Para gundaa be cani ne bidii be cani ca discípulu que para gudiizi cani lú ca binni que. 20 Irá xixé binni que gudó dede bidxá ndaani ne biaana ru nandahui. Para bitopa cabe ni biaana que dede bidxá doce dxumi de ca nandahui ni biaana que. 21 Ne irá ni gudó que bia'si gaayu mil hombre sin igaba gunaa ne ba'du'.

22 Oraque ru gudxi be ca discípulu stibe chu' ca ndaani canuá que, che gá ca sti ladu nisa que, laga gabi si be ca binni que ma che be. 23 Ne gudxi si be ca binni que ma che be la? udxi'ba be lú ti dani yení' né be Dios, dede bixhinni be raqué, stubi lucha be. 24 Peru ma bixele canuá ra ze ca discípulu que zitu de uriá, ne nabé canaaze ola ni purti cudxigueta bi ni. 25 Ne nuxcanda que bidxiña Jesús ra nuu canuá que, zeda za lu nisa. 26 Ne ora bi'ya ca discípulu que zeda za be lu nisa la? bidxibi ca' ne bicaa ca ti ridxi muxe', na ca':

Zeeda ti bultu racá.

27 Peru óraque na be rabi be laaca':

―Lachuu dxí. Cadi idxibi tu, naa ndi'.

28 Para na Pedru rabi laabe:

―Señor, pa lii nga la? guridxi naa guenda ra nuu lu', saya lu nisa.

29 Para na be rabi be laa:

―Gudá'.

Oraque biete Pedru de ndaani canuá que zizá lu nisa, ze ra nuu be.

30 Peru biiya si Pedru pabiá' reciu nuu bi que la? bidxibi ne bizulú biaazi', ne bicaa ti ridxi:

―Bilá naa, Señor.

31 Oraqueca bisigaa ná Jesús gundisa laabe ne na rabi laabe:

―Aque huaxié' fe napu xa. Xiñee bidxibi lu, hombre.

32 Ne casi udxi'ba cabe ndaani canuá que, biaana dxi bi que. 33 Oraque bizuxibi ca xcaadxi ni nuu ndaani canuá que xañee be ne na ca':

―Dxandí pe Xiiñi Dios lii.

34 Ne ora yendá cabe sti ladu que, biuu cabe ti lugar lá Genesaret. 35 Ne casi gunna ca binni ni nuu raqué tu laabe la? bicheeche ca stiidxa be irá guidxi ni nuu neza que, ne bedané cabe irá binni huará ra nuu be. 36 Dede gunaba cabe udii be lugar neca ñee xhaba si be cana ca', ne irá ni uda'na xhaba be que bianda.