1 Udi'di cabe nisa que, biuu cabe xquidxi ca gadareno. 2 Ne casi pe biete Jesús de ndaani canuá que, bidxiña ti hombre riguite binidxaba ique ra nuu be, 3 biree de lade ba' purti raqué nabeza, ne iruti randa rundiibi laa, nin ne cadena. 4 Stale tiru bindiibi cabe cadena ná be ne ñee be, peru cada tiru la? ruxuuxe be cani ne iruti randa rucueeza laabe. 5 Idubi dxi ne idubi gueela ma canazá be lu dani ne lade ba', canaucaa be ridxi ne ma cayuniná be laca laabe ne guie. 6 Peru de zitu ru biiya be Jesús, bixooñe be ne bizuxibi be xañee, 7 ne bicaa binidxaba ni napa be que ridxi:

―Xi napa nia lii, Jesús Xiiñi Dios ni nandxó'. Rinaba lii cadi guniná lu naa.

8 Uní' be zaqué purti cayabi Jesús laabe iree be de hombre que. 9 Ne unaba diidxa Jesús laabe tu lá be. Para na be:

―La'ya Legión purti stale du.

10 Ne ucuá be lú Jesús cadi cuee laacabe de lugar que. 11 Bia'si canazá jma bihui cue' ti dani canayó. 12 Para na ca binidxaba que, rabi ca Jesús:

―Biseenda laadu ra nuu ca bihui ca, bidii lugar chu' du luguiá came.

13 Ne óraque biree ca de hombre que ne bidii Jesús lugar yechuu ca luguiá ca bihui que. Nuu bia' chupa mil bihui raqué. Ne casi biuu ca luguiá ca bihui que biete tí came de ra dxi'ba came. Bia'si pe ndaani nisa biaba came, ne raqué guti came.

14 Ne bixooñe cani cayapa ca bihui que, uyé ca ndaani guidxi ne irá ca ranchu ni nuu neza que, yegüí ca ni uca que. Beeda stale binni, beda guuya ca xi uca raqué. 15 Ne ora bidxiña ca ra nuu Jesús, biiya ca zuba dxa hombre ni gudxite binidxaba ique que, ma nacu lari ne ma bigueta xpiaani', ne bidxibi ca'. 16 Cani bi'ya ora uca ni la? byuí' né ca binni modo bizaaca dxa hombre que ne modo uca ca bihui que. 17 Oraque bizulú ca binni que ucuá ca lú Jesús ixele de xquidxi ca'.

18 Ne ma zichuu Jesús ndaani canuá que bidxiña hombre que ne na gudii be lugar chiné laabe. 19 Peru qué niná di be, sínuque rabi be laa:

―Guyé rali'dxu', yegüí né ca binni li'dxu pabiá' naro'ba ni bi'ni Dios lii ne pabiá' biá lii.

20 Para biree hombre que ze' ne bizulú byuí' né ca binni de ca guidxi sti Decápolis pabiá' naro'ba ni bi'ni Jesús laa. Nabé bidxagayaa irá binni que.

21 Ora bigueta Jesús sti ladu nisa que beeda stale binni ra nuu ne biaana uriá nisa que. 22 Oraque beeda ti hombre lá Jairu naca xaíque sti ti yu'du', ne casi bi'ya laabe bizuxibi xañee be, 23 ne na rabi laabe:

―Ma cayati xiiñe'. Chuu, quixhe ná lu luguiá be ti guianda be ne cadi gati be.

24 Para biree be ziné be laa. Peru nabé stale binni zinanda laabe dede cuquiichi ca laabe.

25 Ne lade irá binni que nuu ti gunaa ma raca doce añu de caxii rini. 26 Ma birá doctor uyé be ra nuu, ne ma biniti be irá ni napa be. Ne lugar de ñanda be, laga jma rusi zirooba enda huará que. 27 Ma huayuna diaga be de Jesús, nga runi biuu be atrá lade ca binni que ne guda'na be xhaba Jesús. 28 Purti na be neca xhaba si Jesús cana be, zianda be. 29 Ne casi pe uda'na be xhaba Jesús biaana dxí ca enda rixii rini que ne bini sentir be ma bianda be. 30 Oraque bidii Jesús cuenta bisianda tuuxa ne biiya dxí atrá, biyubi lú lade ca binni que ne na:

―Tu guda'na xhaba'.

31 Para na ca discípulu stibe rabi laabe:

―Cayuuyu pabiá' cuquiichi binni lii peru nou': “Tu guda'na xhaba'.”

32 Peru biyubi lú be irá ladu para gu'ya be tu uda'na xhaba be. 33 Oraque bidxiña gunaa que, cayaca diti de tantu cadxibi purti nanna xi uca', ne bizuxibi xañee be ne ulee ruaa diidxa de irá ni uca'. 34 Para rabi be laa:

―Bianda lu, xiiñe', purti bini cre lu'. Yanna, sicarú uyé, ma bianda lu ne ma qué zabigueta ru ni.

35 Caní' ru be biuu tu beda tidxi xaíque sti yu'du que, na rabi laa:

―Ma guti xiiñi lu', xi para cuchiiña rou' maistru.

36 Peru ora bina diaga Jesús xi na cabe la? na rabi xaíque que:

―Cadi idxibi lu', bini cre si naa.

37 Ne qué niná Jesús ninanda stale binni laa, sínuque Pedru ne Jacobo ne Juan bi'chi Jacobo si. 38 Ora yendá be ralidxi xaíque que, biiya be rí binni, cayuuna ca ne cucaa ca ridxi. 39 Para biuu be ne rabi be laaca':

―Xiñee cayuni tu irá ruidu ri', ne xiñee cayuuna tu, purti cadi guti di badu dxapa huiini ri'; nisiaasi si be nga.

40 Peru laga bini burla ca laabe, para gulee be irá ca ne ucuaa be bixhoze ba'du que ne jñaa ne cani ziné be que ne biuu cabe ra nuu badu dxapa huiini que. 41 Ne gunaaze be ná ba'du que rabi be laa:

―Talita, cumi.

Ni riní' ni la? “Biasa, badu dxapa huiini'.”

42 Oraqueca biasa badu dxapa huiini que ne gunda uzá. Ma napa badu dxapa huiini que doce añu. Nabé bidxibi ca binni que. 43 Peru biinda ca Jesús lú ca' qué chi tidxi ca ni iruti', ne gudxi be laaca udii ca ni go ba'du que.