1 Bee lliꞌñia, rquieꞌa bee bedichiaꞌ quieꞌ luhua para nú la riꞌihua dula. Pero tunu nuꞌhua enu rriꞌi dula, rluꞌcuaꞌahua tucu enu rni lu cuendaꞌahua lu Diose, nu liꞌinu necanu Jesucristo enu leca xunga uriꞌi dula. 2 Equie nú unguti Jesucristo, nuꞌ nú rriꞌi Diose perdona stulaꞌahua. Nu la acane equie cuendaꞌ stulaꞌtsiaꞌahua, leꞌca necane lu cuendaꞌ stula ye bee bene iliulabe.

3 Liaꞌahua nediyaꞌ nzeꞌcaꞌahua tunu sucuaꞌahua Stichiaꞌ Diose, che nzu arquiaꞌahua nú itá nuluꞌlaꞌahua liꞌinu. 4 Pero tunu nuꞌ enu rni: “Liꞌá nuꞌlua Diose”, nu la zucuꞌlla stichiaꞌnu, necalla enu niquichiaꞌ, xne la chequieella lunú neli neca. 5 Pero enu sucuꞌ Stichiaꞌ Diose diquinuꞌ arquiꞌ neli secalla liꞌinu. Scua nediyaꞌahua nú necaꞌahua beneꞌnu. 6 Tatse bene enu rni nú neca beneꞌ Diose, rquiꞌña nú huañilla tucu nú uhuañi Jesucristo.

7 Bee saꞌa enu nzeli arquiaꞌahua Jesucristo, bee bedichiaꞌ nú rnia luhua nee la necuqui necane, leꞌca liꞌi bedichiaꞌ quieꞌ neca stichiaꞌ Jesucristo nú ubeneꞌlaꞌhua hasta huaꞌtu. Leꞌca liꞌi bedichiaꞌ quieꞌ neca nú rnia luhua nee. 8 Pero rnia bee bedichiaꞌ quieꞌ luhua xi neca tucu nú necuqui neca, xne sianu necane equie cuendaꞌ Jesucristo urre necane equie cuendaꞌ liꞌihua, rlubeꞌ nucuaꞌ nu neli necane xne nze tsanaꞌ arquiꞌlahua inziu nú necha neca nu nzequiehua lunú neca nzeꞌca.

9 Tunu nuꞌ enu rni nú nzequieella inziuꞌ Diose nu rana arquiꞌlla bee saꞌlla, liꞌilla nzequieescaꞌlla inziu nú necha neca. 10 Enu seca bee saꞌ liꞌi silla neli nzequieella inziuꞌ Diose, scua leca modo nú riꞌi dula ana lulla. 11 Pero bene enu rana arquiꞌ bee saꞌ liꞌilla nehuañilla lunú necha neca, nu nzequiella nú necha neca cuaꞌ, sin nú riꞌilla beyaꞌ cá enza nzalla, xne utsaꞌna nú necha neca cuaꞌ liꞌilla leta rulaꞌ xi neca tucu bene enu la biꞌya.

15 La leꞌhua nú riꞌihua lunú necha neca rriꞌi bee bene lu iliulabe quieꞌ niꞌbee nú nuꞌ lu iliulabe. Tunu nuꞌ enu máse seca lunú nuꞌ lu iliulabe, nu la zeca nzeꞌe Paꞌahua Diose. 16 Xne niꞌ tucu nú necha neca nuꞌ lu iliulabe quieꞌ la yeꞌta nucuaꞌ lu Diose, nzeꞌta tsia nucuaꞌ leꞌca lubee bene iliulabe. Nu ninguieꞌ neca lunú necha neca rriꞌi bee bene iliulabe. Riꞌilla tucu nú necatsia elliebacuꞌlla, nu rleꞌlla nú luꞌculla ye lunú rlañiꞌlla cuna nú reca nelliñalla lunú rluꞌculla. 17 Pero iliulabe tucu bichia laxue cuna ye beenú necha neca rriꞌi bee bene. Pero enu nehuañi tucu nú niarquiꞌ Diose, luꞌculla elunehuañi nú leca xunga laxu cuna liꞌinu.

18 Bee lliꞌñia, liꞌá nia luhua nú lacaxeaꞌ nzu nú laxu iliulabe. Xne ubeneꞌlaꞌhua nú rquiꞌña nú riña tucu enu rriꞌi condra Cristo, nu ni nzeꞌe lubee bene nú neca nzeꞌe Cristo, nu nee nucuaꞌala huaxi enu rriꞌi condra Cristo, enzeꞌe nediyaꞌahua nú lacaxeaꞌ nú laxu iliulabe. 19 Bee enu rriꞌi condra Jesucristo, uchiuꞌu beei leꞌca leta bee saꞌahua enu nzeli arquiaꞌahua Jesucristo, pero laca beei mero bee saꞌahua, xne tunu neca beei bee saꞌahua ayaꞌna beei leta bee saꞌahua enu nzeli arquiaꞌahua Jesucristo. Pero unga nucuaꞌ para nú lañiꞌ bee bene nú laca beei bene letaꞌahua.

20 Uliquiꞌla Jesucristo Espíritu Santo luhua, nu equie cuendaꞌ Espíritu Santo yehua nediyaꞌhua lunú neli neca. 21 Rquieꞌa bee bedichiaꞌ quieꞌ luhua, nu la necane lunú la nediyaꞌhua ta lunú neli neca, sino que lunú nediyaꞌlaꞌhuane, xne liꞌihua nediyaꞌhua nú la yeꞌta niꞌ tucu bee eluquichiaꞌ lunú neli neca.

22 Nee, ¿ti neca bene enu niquichiaꞌ? Bene zeꞌe neca enu rni nú la neca Jesuse liꞌi Cristo. Nucuaꞌ rriꞌi condra Cristo xne la chili arquiꞌ nucuaꞌ Paꞌahua Diose, nu niꞌ Lliꞌñinu Jesucristo. 23 Xne tatse bene enu rni nú la neca Jesucristo Lliꞌñi Diose, liꞌilla la chululla Diose Paꞌahua. Pero enu rni nú neca Jesucristo Lliꞌñi Diose, liꞌisilla nuꞌlulla Paꞌahua Diose.

24 Enzeꞌe la tsanaꞌ arquiꞌhua bedichiaꞌ nú ubeneꞌhua desde nú uquixiehua nú uyali arquiꞌhua Jesucristo, nu tunu nzequiehua bedichiaꞌ nú ubeneꞌhua desde chenu uquixie nú uyali arquiꞌhuane, che si nzequiehua nú nehuañihua cuna Paꞌahua Diose cuna Lliꞌñinu Jesucristo. 25 Nu ninguieꞌ neca nú ucuaqui uꞌna Jesucristo, nú liquiꞌnu luaꞌahua elunehuañi nú leca xunga laxu lu Diose.

26 Rquieꞌa bee bedichiaꞌ quieꞌ luhua, equie cuendaꞌ bee bene enu rcuaꞌna nú zequienu liꞌihua. 27 Pero liꞌihua nehuañihua cuna Espíritu Santo nú uliquiꞌ Jesucristo luhua, nu la quiꞌña nú nuꞌ ti zeteꞌ liꞌihua, xne leꞌca liꞌi Espíritu Santo neca enu zeteꞌ yeene liꞌihua, nu puro nú neli zeteꞌnu nu la zeteꞌnu eluquichiaꞌ. Enzeꞌe uhuañihua tucu nú rnibiyaꞌ Espíritu Santo para nú chequiehua nú neca tucutsiahua cuna Jesucristo.

28 Nee bee lliꞌñia, liꞌá nia luhua nú uquia quieehua inziuꞌ Jesucristo, para nú la lliquiaꞌahua chenu riñanu, nu niꞌ nú tuaꞌahua liꞌinu. 29 Liꞌihua nediyaꞌhua nú rriꞌi Diose tucu nú neli neca, nu rquiꞌña nú riꞌihua beyaꞌ nú ye bee bene enu rriꞌi tucu nú neli neca, liꞌibeella neca beella Lliꞌñi Diose.