1 Bee saꞌa enu nzeli arquiaꞌahua Jesucristo, leꞌca nia luhua nú la aca huaxihua enu niarquiꞌ nú aca bee ulaxcuela enu zeteꞌ Stichiaꞌ Diose lubee bene, xne rriꞌihua beyaꞌ nú liaꞌahua enu seteꞌahua Stichiaꞌ Diose lubee bene másela juerte chiuꞌulue lu cuendaꞌahua tunu la riaꞌahua tucu nú rialane. 2 Yeꞌahua nuꞌ chenu rriꞌi dula ana luaꞌahua, neequie tunu nuꞌ enu lá ni niꞌ tucu bedichiaꞌ nú necha neca liꞌilla necalla tucu bene enu chiquiꞌ neca nzeꞌca lu Diose, nu leꞌca recalla rnibiyaꞌlla lulla. 3 Liꞌihua nediyaꞌhua nú chenu rduꞌahua freno ruꞌu bee huayu para nú zucuꞌ beeí lunú niarquiaꞌahua, scua acaꞌahua nibiyaꞌahua lubeeí. 4 Leꞌca esquie necane lu cuendaꞌ bee barco, añinzuca nú llenee nu añinzuca nú juerte siꞌña bii, pero cuna tucu icuꞌ meꞌ nú nzucu rquiꞌ barco, icuꞌ quieꞌ lee timón, cuna icuꞌ quieꞌ senu bene barco catse elu niarquiꞌlla. 5 Leꞌca scua neca lu cuendaꞌ luꞌchi bene, meꞌtsiae pero hasta bee bedichiaꞌ nú máse necha neca xiuꞌu ruꞌu bene. Luꞌchi bene neca xi neca tucu xila meꞌ, pero cuna tucu xila meꞌtsia nuꞌmodo quiee quii diqui neca tucu dañi. 6 Luꞌchi bene neca xi neca tucu quii, necane xi neca tucu elu nuꞌ bee nú necha neca, nu tunu la biꞌyaꞌahua luꞌchiaꞌahua rnitilue liaꞌahua, che diqui lunú nehuañiaꞌahua chiuꞌu bee bedichiaꞌ nú necha neca ruaꞌahua nú nzeꞌta ebila.

7 Liaꞌahua nediyaꞌahua nú ye clasiaꞌ bee nañi xi neca bee iñi, bee serpiente, cuna bee nañi enu nuꞌ lu inzatuꞌ nuꞌ modo reca maxu beeí, nu rriꞌi maxula bene iliulabe beeí. 8 Pero lecati aca riꞌi maxu luꞌchi. Luꞌchi bene neca xi neca tucu nú leca modo aca maxu, necane xi neca tucu nú chee nuꞌ veneno nú ruuti bene. 9 Cuna luꞌchiaꞌahua rniaꞌahua bedichiaꞌ nzeꞌca lu Diose Pa liñibe, nu leꞌca liꞌi rniaꞌahua bedichiaꞌ chiꞌquiꞌ lu saꞌahua enu urecheꞌ Diose tucu nú rnanu. 10 Nu ruꞌahua xiuꞌu bedichiaꞌ nzeꞌca cuna bee bedichiaꞌ chiꞌquiꞌ, bee saꞌa enu nzeli arquiaꞌahua Jesucristo, la yala nú riaꞌahua scua. 11 Liꞌihua nediyaꞌhua nú elu rliñi inza, leca modo nú liñi inza nzeꞌca cuna inza nú neribi. 12 Leꞌca scua la ayu aceituna lu aca higuera, nu la ayu higo lu aca uva, nu leꞌca la liñi inza nzeꞌca elu rliñi inza nú neribi.

13 Tunu nuꞌ tatucuhua enu siꞌ nú reca nu rriꞌi beyaꞌ ye nú neca Stichiaꞌ Diose, rquiꞌña nú aca lleꞌna arquiꞌlla tucu nu rialane, scua lubeꞌlla lunú reca elliebacuꞌlla. 14 Pero tunu chiquiꞌ ria arquiꞌhua lubee saꞌhua nu ye nú niarquiꞌhua para liꞌitsiahua, lecaxi zibiꞌ nú nelliñahua nú recahua Stichiaꞌ Diose, sino que sequienuhua bee bene che. 15 Nu bee clasiaꞌ bee elliebacuꞌ cuaꞌ la yeꞌta bee nucuaꞌ lu Diose, nzeꞌtatsia bee nucuaꞌ lubee bene iliulabe quieꞌ, cuna lu bezeꞌlu. 16 Xne elu nuꞌ beenú ria arquiꞌ bee bene lusaꞌ bene cuna nú niarquiꞌtsia bee bene steneꞌlla para liꞌitsialla, zeꞌe nuꞌ xuu cuna ye beenú necha neca. 17 Pero bee bene enu reca elliebacuꞌ nú nzeꞌta lu Diose, rluti rcuaꞌnalla nú huañi nzeꞌcalla lu Diose, cuna nú nzuxe arquiꞌlla lubee bene, cuna nú nzeꞌcalla lubee bene, cuna nú ñia nzuquie arquiꞌlla bee bene, nu ruaꞌa arquiꞌlla bee bene, nu rriꞌilla nú neca nzeꞌca lu ye bee bene, nu riꞌilla tucu necatse lu ye bee bene. Nu leꞌca saꞌalulla lunú rrnilla. 18 Bee bene enu rcuaꞌna nú la liu bee bene rcuaꞌna beella nú huañi nzeꞌca beella cuna bee bene, scua nehuañi beella tucu nú niarquiꞌ Diose nú huañi beella.