7
Lunú rriꞌi nú rriꞌi bee bene dula
(Mt. 15:1-20)
1 Tucu bichia uyabica bee fariseo cuna bee ulaxcuela enu reca leyꞌ Moisés lu Jesuse, nzeꞌta bee benequieꞌ enza Jerusalén. 2 Chequie chenu ulañiꞌ bee benecuaꞌ nu nuꞌ chiucu chuna bee beneꞌ Jesuse enu ne naa chenu udacu beella tucu nú neca costumbreꞌ bee ulaxcuela cuaꞌ, che uzeꞌta bee benecuaꞌ bee beneꞌ Jesuse. 3 (Xne nzequie bee fariseo cuna bee bene Israel costumbreꞌ bee beneꞌ beei enu udetela, nú la acu beei tunu la naa beei ya beei huaxi bese. 4 Leꞌca chenu ubenchilaꞌ beei nú uya beei ruꞌu iꞌya la acu beei tunu la naa beei ya beei, tucu nú neca costumbreꞌ beei. Leꞌca nzequie beei huaxilá bee costumbreꞌ beei, nú xa rquiee beei bee vaso cuna bee situ cuna bee exquiꞌña nú necacheꞌ icuꞌ cuna luna nú raꞌtse beei.) 5 Enzeꞌe unidichiaꞌ bee fariseo cuna bee ulaxcuela enu reca leyꞌ Moisés lu Jesuse nú unibeei:
―¿Xinu la chequiee bee beneꞌlu tucu nú neca bee costumbreꞌ bee beneaꞌahua enu udetela, xinu la naa bee beneꞌlu yabeei chenu racu beei tucu nú riala nú riꞌi beei?
6 Chequie ucuaqui Jesuse lubee benecuaꞌ nú uninu:
―Rriꞌihua tucu nú rlubeꞌhua nú rriꞌi nzeꞌcahua, pero lia rriꞌihua nucuaꞌ. Neli neca nú uni profeta Isaías chenu uquieꞌella lunú uni Diose lu cuendaꞌhua nú uninu:
Bee benequieꞌ rriꞌi beei tucu nú chiquiꞌ rluꞌcu beei ulaꞌna lua,
pero istu nzu arquiꞌbeei lua.
7 Lecaxi zibiꞌ nú rnibeei nú rluꞌcu beei ulaꞌna lua,
xne seteꞌ beei bee bene tucu nú necatsia elliebacuꞌ bee bene.
8 Liꞌihua sanaꞌ arquiꞌhua Stichiaꞌ Diose para nú nzequiehua bee costumbreꞌtsiaꞌ bee bene nú xa rquiehua bee situ cuna bee vaso cuna beelá nú neca xi neca bee nucuaꞌ.
9 Leꞌca uni Jesuse lubeei:
―Sanaꞌ arquiꞌhua Stichiaꞌ Diose para nú sucuꞌtsiahua nú neca bee costumbreꞌhua. 10 Nu uni Moisés: “Luꞌcu bee bene ulaꞌna lu paꞌlla cuna lu naꞌlla”, nu “Bee bene enu riꞌña nú zeca paꞌ cuna nú zeca naꞌ ati bene zeꞌe che.” 11 Pero liꞌihua rnihua nú nuꞌ modo ni tucu bene lu paꞌlla cuna lu naꞌlla: “Leca modo nú riꞌá elietsa luhua, xne ye lunú rlucua neca nucuaꞌ Corbán” (rni bedichiaꞌ Corbán nú necala nucuaꞌ cuendaꞌ Diose). 12 Che rnihua nú bee bene enu rni scua la quiꞌña nú riꞌi nzeꞌe elietsa lu paꞌ nzeꞌe cuna lu naꞌ nzeꞌe. 13 Scua neca nú la zucuꞌhua Stichiaꞌ Diose, xne nzequiehua bee costumbreꞌhua nu seteꞌhua bee saꞌhua nu rriꞌihua huaxilá beenú neca scua.
14 Che ubixia Jesuse bee bene, nu uninu lubeei:
―Uquieꞌe diacahua nu uriꞌihua beyaꞌ lunú rnia: 15 La riꞌi bee bene dula equie cuendaꞌ nú racu bee bene, pero rriꞌi bee bene dula lunú xiuꞌu ruꞌu bee bene, cuna lunú rriꞌi bee bene, nucuaꞌ neca nú rriꞌi nú rluꞌcu bee bene dula. 16 Tatse bee bene enu niarquiꞌ nú yeneꞌ nú rnia, quieꞌe diaca nzeꞌe nucuaꞌ che.
17 Chenu utsaꞌna Jesuse bee bene zeꞌe nu uyuꞌunu liñi tucu niꞌi nu unidichiaꞌ bee beneꞌnu lunu nú xa neca lunú uzeteꞌnu scua. 18 Che uninu lubeella:
―¿Xieꞌ leꞌca nuuhua ne riꞌihua beyaꞌ lunú unia scua la? ¿Xieꞌ la riꞌihua beyaꞌ nú la riꞌi bee bene dula equie cuendaꞌ nú racu bee bene, 19 xne lunú racu bee bene la chuꞌu nucuaꞌ liñi arquiꞌ bee bene riuꞌutsia nucuaꞌ xlaꞌcu bee bene nu chu xiuꞌu zecae?
Scua udixiuleꞌenu nú ye bee elubacu la riꞌi bee nucuaꞌ nú rluꞌcu bee bene dula. 20 Leꞌca uni Jesuse lubeei:
―Lunú xiuꞌu ruꞌu bee bene cuna lunú rriꞌi bee bene, nucuaꞌ neca nú rriꞌi nú rriꞌi bee bene dula. 21 Xne liñi arquiꞌ bee bene rliñi nú necha nchiñi elliebacuꞌ bee bene nú rriꞌi bee bene eluhuexe cuna nú rriꞌi bee bene eluhuanaꞌ cuna nú ruuti saꞌa bee bene, 22 cuna nú rluꞌcu niyu stucu unaꞌa urre rluꞌcu unaꞌa stucu niyu, cuna nú rleꞌ bee bene luꞌculla steneꞌ saꞌalla, cuna nú rriꞌi bee bene nú necha neca, cuna nú sequienu bee bene saꞌa bee bene, cuna nú rluꞌcu bee bene bee vicio, cuna nu riea arquiꞌ bee bene lu saꞌa bee bene, cuna nú rni bee bene eluquichiaꞌ, cuna nú rutiꞌ bee bene, cuna nú rriꞌi bee bene beenú la zibiꞌ. 23 Ye beenú necha neca cuaꞌ nzeꞌta liñi arquiꞌ bee bene nu rriꞌi bee nucuaꞌ nú rriꞌi bee bene dula.
Xa utsu tenelí arquiꞌ tucu unaꞌa enu la neca bene Israel Jesuse
(Mt. 15:21-28)
24 Chenu uchiuꞌu Jesuse zeꞌe nú nzanu lu iliu Tiro cuna lu iliu Sidón, che uyuꞌunu liñi tucu niꞌi xne la niarquiꞌnu nú acabiyaꞌ bee bene nú nzucunu zeꞌe, pero ne aca nú acachiꞌlunu zeꞌe. 25 Xne luego chu ubeneꞌ tucu unaꞌa nú nzucunu zeꞌe nu uyanchu elu nzucunu, xne rluꞌcunchu tucu xinchiuꞌcunchu enu nchiñi benechiquiꞌ arquiꞌ nu chu utsu lliquinchu lunu. 26 La neca unaꞌa quie bene Israel, necanchu bene Sirofenicia. nu uziquienchu lu Jesuse para nú huanu benechiquiꞌ arquiꞌ xinchiuꞌcunchu. 27 Pero uni Jesuse lu unaꞌa zeꞌe:
―Uzela nú acuxu bee enduꞌ xne la neca nzeꞌca nú axi bene pá ruꞌu bee enduꞌ deteꞌ bene acu bee nicu.
28 Che uninchu lunu:
―Nelíꞌlu nú unilu scua. Pero hasta bee nicu racu pá ubee nú sanaꞌ ruꞌu enduꞌ liñi mexa.
29 Chequie uni Jesuse lunchu:
―Uni nzeꞌcalu nú unilu scua, uquiaꞌa niꞌlu uchiuꞌula benechiquiꞌ arquiꞌ xinchiuꞌculu nee.
30 Chenu uriñanchu niꞌinchu ulañiꞌnchu xinchiuꞌcunchu nuxu lu luna, pero uchiuꞌula benechiquiꞌ arquiꞌnchu che.
Chenu uriꞌiyeca Jesuse tucu bene enu lacalí ni nu nenguataꞌ
31 Che uchiuꞌu zeca Jesuse lu iliu Tiro nu udetenu eyeche Sidón cuna bee eyeche lu iliu Decápolis nu uriñanu ruꞌu inzatuꞌ Galilea. 32 Zeꞌe uriñayuu bee bene tucu niyu enu nenguataꞌ lunu cuna nú la ni nzeꞌcai nu unacuꞌ bee bene zeꞌe lunu nú ricuꞌnu yanu equiei. 33 Chequie unguyaꞌ Jesuse niyu zeꞌe tucu chú, nu uduꞌnu cuene yanu liñi rucu diacai nu utiꞌnu xenenu lu luꞌchii. 34 Che ubiꞌyanu enza liñibe nu utsii arquiꞌnu nú uninu:
―¡Efata! ―rni bedichiaꞌ quieꞌ: ¡Uyaꞌla! 35 Hora zeꞌe, uyaꞌla rucu diaca niyu zeꞌe nu uyecaꞌ luꞌchii nu uquixie uni nzeꞌcai. 36 Nu unibiyaꞌ Jesuse nú la ixiuleꞌe bee bene zeꞌe lu niꞌ tucu bee bene lunú unga zeꞌe, pero añinzuca nú unibiyaꞌ Jesuse nú la ni bee bene nucuaꞌ aꞌla mase uni bee bene nucuaꞌ. 37 Chiquiꞌ uyanu arquiꞌ bee bene zeꞌe, nu unibeei:
―Ñia neca lu ye nú rriꞌinu hasta nú rriꞌinu nú uyeꞌe diaca bene enu nenguataꞌ nu rriꞌinu nú rni bene enu la aca nii.