1 Chenu ulaxu nú ulañia bee nucuaꞌ, cheela ulañia stucu ángele enu nzeꞌta laca enza liñibe nu chiquiꞌ rluꞌcu ángele quieꞌ poder, nu ellieꞌnu uduꞌllieꞌe diqui lu iliulabe, 2 nu chiquiꞌ fuerte uninu:

―Unitilula, unitilula eyeche llene Babilonia nu nee necatsiae xi neca niꞌ bee bezeꞌlu, nu leꞌca necatsiae xi neca niꞌ ye clasiaꞌ bee benechiquiꞌ, nu xi neca niꞌ ye bee iñi enu rcuecuꞌ bee enu necha rna xiñia arquiꞌ bee bene. 3 Xne xi neca chenu rduꞌniqui saꞌ bee bene, scua uriꞌinu eyeche llene zeꞌe ye bee bene iliulabe para nú riꞌi beei ye clasiaꞌ eluhuexe, nu bee arre enu nucuaꞌa lu yu iliulabe uriꞌi eluhuexe cuna eyeche zeꞌe, nu bee bene enu rriꞌi berexe lu yu iliulabe unga beella xene equie cuendaꞌ ye clasiaꞌ eluhuexe nú reca eyeche zeꞌe.

4 Luzeꞌelá ubenea stucu chi nú uni enza liñibe:

―Uchiuꞌuhua eyeche cuaꞌ, liꞌihua enu neca bee benea para nú la riꞌihua saꞌ bee dula nú rriꞌi bee benecuaꞌ, nu para nú la nehuana zecahua tucu nú nehuana zeca eyeche llenecuaꞌ. 5 Xne huaxi añi stula beei nu hasta liñibe riñae, nu la zañiꞌ Diose stulabeei. 6 Uriꞌinuhua bee benecuaꞌ tucu nú uriꞌinubeei beelá bee bene, nu uriꞌihua nú ixiubeei chiucu bese másela lunú uriꞌinu beei beelá bee bene, nu uriꞌihua nú chiucu bese másela nehuana zeca beei tucu nú uriꞌinubeei bee bene. 7 Uriꞌihua nú nehuana zeca bee bene eyeche llenecuaꞌ nu ucunaꞌhua beei, scua tucu nú ñia nzu arquiꞌbeei uriꞌi beei nú necha neca, nu tucu nú uriꞌi bee eyeche cuaꞌ elliebacuꞌ chenu unii: “Liꞌá nzucuaꞌa caꞌa xi nzucu tucu reyna, laca unaꞌa zaqui, nu leꞌca lecaꞌ bichia nú nehuana zecaa.” 8 Nu tucutsia bichia tucutse riña nú nehuana zeca bee bene eyeche cuaꞌ, atibeei, unaꞌbeei, zeca beei biñia, nu bichiꞌ beei, chiquibeei xne chiquiꞌ llene neca poderꞌ Diose nú deteꞌ castiya lubee bene eyeche llene cuaꞌ.

9 Nu bee arre lu iliulabe bee enu uriꞌi lunú niarquiꞌtsia, bee enu uriꞌi eluhuexe, cuna eyeche llenecuaꞌ, liꞌibeei nehuana zeca beei, nu unaꞌbeei, chenu lañiꞌbeei llene nú riqui eyeche cuaꞌ. 10 Nu istu cuaꞌa bee arre cuaꞌ equie nú xiquibeei castiya nú reca eyeche cuaꞌ, nu rnibeei:

―¡Cueꞌcurulu, cueꞌcurulu Babilonia, eyeche llene nú chiquiꞌ unga neca equie! Xne terratuinza uriña castiyaꞌlu.

11 Nu bee bene enu rriꞌi berexe nehuana zeca beei nu unaꞌbeei equie cuendaꞌ eyeche llenecuaꞌ xne lecaꞌ bee bene enu tsi ye nú rutibeei: 12 xi neca bee oro, plata, quiee nú ñia rnaa, perla, laquie fiñio, nu laquie seda nú neluu morado, nu ye clasiaꞌ bee aca nú ñia rlia nu ye beenú ungacheꞌ cuna bee aca fiñio, nu beenú ungache bronce, icuꞌ, nu mármol nu marfil. 13 Leꞌca esquie lacaꞌ utibeei canela cuna ye clasiaꞌ bee cuanaꞌ nú ñia rlia, lecaꞌ modo utibeei quiendixi, mirra, perfume, aceite de oliva, harina nú fiñio, trigo, uꞌnaꞌ, sanchi, huayu, acareta, nu leꞌca la acaꞌ utibeei bee bene. 14 Nu leꞌca nibeei lu eyeche zeꞌe:

―¡La luꞌcuaꞌlu ye bee elulleꞌca nú chiquiꞌ uyuꞌu arquiꞌlu, nu ulaxulí ye eluxeneꞌlu cuna ye beenú chiquiꞌ ñia rnaa uluꞌculu!

15 Bee berexecuaꞌ uriꞌi nú unga xene beei equie cuendaꞌ eyeche llene Babilonia cuaꞌ, istu cuaꞌa beei equie nú xiquibeei castiya nú zeca eyeche cuaꞌ, unaꞌbeei nu nehuana tsu arquiꞌbeei. 16 Nu nibeei:

―¡Cueꞌ eyeche llene cuaꞌ, cueꞌ eyeche llene cuaꞌ! Elu utsucheꞌe bee bene cuna laquie fiñio, nú neluu nu morado, liꞌibeei enu utsucheꞌ cuna oro, cuna perla cuna quiee nú ñia rnaa. 17 ¡Xne terratuinza ulaxu ye bee eluxenecuaꞌ!

Ye bee bene enu nza liñi barco, cuna ye bee capitánꞌ barco, cuna yebee marinero nu bee bene enu rriꞌi riñaꞌ lu inzatuꞌ, istu ucuaꞌa beei. 18 Chenu ulañiꞌbeei llene nú riqui eyeche llene cuaꞌ, che ubixiali beei nú unibeei:

―¿Leca xunga ulañiaꞌahua tucu eyeche llene tucu nú neca eyeche quieꞌ?

19 Nu che uduꞌbeei yubeꞌchaꞌ equie beei nu runaꞌbeei, nú nehuana seca beei, nu unibeei:

―¡Cueꞌe! ¡Cueꞌ eyeche llene! Xne equie cuendaꞌ eluxeneꞌe unga xene ye bee bene enu rluꞌcu barco, ¡nu terratuinza ulaxu eyeche cuaꞌ!

20 Che uyene tucu chii liñibe nú uni:

―Pero liꞌihua enu nucuaꞌa liñibe, nu liꞌihua bee beneꞌ Diose, nu liꞌihua bee apóstol nu bee profeta, ñia utsu arquiꞌhua lunú seca eyeche cuaꞌ xne scua rriꞌi Diose elu usticiaꞌnu equie nú uriꞌinu bee bene eyeche cuaꞌ cuna liꞌihua.

21 Nu tucu ángele enu chiquiꞌ naaqui uletsa tucu quiee llene, nú rnaa xi rnaa quiee molino nu utsiꞌquinue lu inzatuꞌ, nu uninu:

―Scua tucu nú chiquiꞌ fuerte utsiꞌquia quiee quieꞌ, scua chiquiꞌ fuerte nehuana zeca eyeche llene Babilonia, nu lecaꞌti lañiꞌ liꞌi stucu bese. 22 La yeneaꞌ nú rula bee arpas, niꞌ bee musica, niꞌ flauta, niꞌ bee trompeta bee calle eyeche Babilonia cuaꞌ. Nu niꞌ stucu bee bene lecaꞌ ti rriꞌi riñaꞌ eyeche zeꞌe, nu niꞌ nú xichi bee molino rriꞌi riñaꞌ la yeneaꞌ eyeche zeꞌe. 23 Nu lecaꞌ bee bichia nú aca achee nú nuꞌ quii eyeche zeꞌe, nu la chiaꞌ bee bene eyeche llene zeꞌe, niꞌ tsaꞌa chia la riaꞌa beei, niꞌ berexe la riaꞌbeei, añinzuca nú chiquiꞌ neca equie bee berexe eyeche cuaꞌ lu iliulabe huaꞌtu, nu uzequienu eyeche llene cuaꞌ ye bee bene iliulabe cuna elu uliñi.

24 Nu leꞌca eyeche cuaꞌ udiñi bee bene bee profetaꞌ Diose, cuna bee bene enu nzeli arquiꞌ Diose, no por equie cuendaꞌ eyeche cuaꞌ udiñi bee bene beelá bee bene enu unguti lu iliulabe.