1 Bets, bzian, goḻsoladz gaṉle zha bzhaac grë pxozgol ne zha ne sca bzënie Moisés ga. Pxeeḻ Dios tib xcow beeṉ ncal zaatne zieetaa zho, ni pteed me zho lo Nisdoo Nizhnie. 2 Zigtaa lo xcow cow, zigtaa lo nisdoo cow, masaque rrieequia lo co brobnis zho, parne tibaque niac zho niacnie zho Moisés.

3 Grëse zho goṉ milagr nroob ne beeṉ Dios, bnabey me bliaaḻ guietxtil zhan gbaa bdeed me dow zho, 4 beeṉcta me nis tib cho quie bdeed me go zho no zho dan bidz co. Lëële Jesús ga bdeed nis co go zho. Lo zho ga zo me, rrieequia me ga nac quie ne bda nis go zho, sac mese rzhixcuaa lo grëtaa xliaadz miech. 5 Niicle scataa goṉ Dios zho, per led grëd zho bioxco nion xtiidz me, nacne ndal zho bnitlo bioliuse zho dan co. 6 Gase na gaṉle gotsaa gwi ne zha bzhaac zho, zeeṉa gzoobladzd ne dziuuṉ ne grë ncuaaṉe ndzinlid ne beeṉ zho. 7 Goḻguieṉ gleyniede to mdio, zigne beeṉ zho. Rnee lo Xtiidz Dios: “Blozhse dow zho, go zho, laa zho psilo biee lo zhimdio zho.”

8 Gotsaa gwi ne gaṉle, pe guieḻnë ne bgaa zho zeeṉe brieequia bla zho lega bionie wnaa, tib dzeque bnabey Dios gut gaḻptsoṉ mil zho. ¡Ni lalnu tsod guic to guṉ to miṉ co! 9 Ib guṉglëëde to Dios, sac zha, zeeṉe beṉngulëë zho me, bnabey me brieequia grë meeḻ pquiaa maw zho, ndal zho gut. 10 Niicle glisquidgaa to teḻ pe nac miṉe quiayuṉ me, sac teḻ zha, sca beeṉ palal zho; nacne pxeeḻaque me anjl ne rnitlo, ndal zho bnitlo anjl co. 11 Sca nagoṉ bzhaac grë pxoz gol ne ga, gotsaa guieṉ ne sca dziuuṉd ne miṉe beeṉ zho, miṉe beeṉ zho ga laaw zhobnee lo Xtiidz Dios parne gacndioṉ new, guieṉ ne zaacse gban ne, ne nac ne miech ne mban leṉ dze rii ne znu ziaadyoble nitlo guidzliu.

12 Gacxe waa, zha ne rzac mbanpaa zho zigne racladz Dios, none nsin so zho zeeṉa guṉd zho ncuaaṉe guṉctal xtoḻ zho. 13 Nli no ncuaaṉe rcheep ne guṉctal ne xtoḻ ne, per nacda ncuaaṉe griiṉ rieṉ. Pe zhidaa miech ne zieded lo miṉ co. Tsod miṉe guiab ne ib lëbd ne griee ne lo. Miṉe naca none gnalo ne Dios, sac teḻ me ib csaand me guiab ne tib lo ncuaaṉe glëbd ne griee ne; sca nac xtiidz me, ni mesi goṉ ctsëëd me miṉe rnee me. Me nac meṉ ne gacnieṉ ne grieelo griee ne low.

14 Bets, bzian, goḻguieṉ sca ib none csaan to grë mdio, gnalodraa tow. 15 Miech nixbiini nac to, grë miṉe rne naa lo to nu, naṉ to gaṉle ncuaaṉe rquiina. 16 Goḻwi gaṉle, zeeṉe rdioow ne guietxtil, rdio ne vin, rdziuuṉ ne xtsee ne beeṉ Jesús ga, ga rlu tipse nac ne grë ne nacnie ne me. 17 Niicle ne ndal nac ne, per ne tibaque guietxtil ne rdioow ne, miṉ co gane tibaque cuerp nac ne grë ne, ni lëë xcuerp Jesús ga. 18 Scaque zha Israel, zeeṉe row zho xpëël ma ne riogon lo Dios, ga rlu zho ne nacnie zho me.

19 Zha ne rnalogaa mdio, zeeṉe row zho grë ncuaaṉe riogon lo mdio, scaque tibaque rac zho grë zho mdio. Per guiabde to togo mban mdio, togo mazdragaa nac bëël ne rgogon zho lo mdio. 20 Miṉe racladz naa guieṉ to, zeeṉe sca ruṉ grë miech pe rgogon zho lo grë mdio, lo meṉdox ga rgogon zhow, led lo Diosda. Goḻguieṉ sca, ib tsiesëëbde to lo grë zha ne quiayownie mdio, zeeṉa gacniede to meṉdox. 21 Lëdraaw ga goṉ guṉ to, teḻ rlozhse rquiin to xtsee ne psaṉ Jesús diidz ga dziuuṉ ne, ni tsieque to tsieguie to, tsietow to zaatne rownie zho meṉdox. 22 ¡Guṉscade to, guṉglëëde to Dios! ¡Goḻguieṉ gaṉle, lëbd ne dziaṉ ne xquieḻblëë me!

23 Zig rne naa ga: “Nli zac guṉ ne ncuaaṉe gacladztaa ne, per led grëda nonguieḻ.” Teḻ naa, zrieelo guṉ naa ncuaaṉe gacladztaa naa, per led grëda yquiin par guṉ naa xyudar grëraa zha bets ne, lozh tsoguic zho Xtiidz Dios; 24 sac goṉ, ib none dzioxco ne grëraa zha ne nacgrë ne. 25 Zig nac grë bëël ne rdo lo lgui, zac gow tow, ib guṉde to gnabdiidz to dieṉ zha naca, sac goṉ nend bëël ne biogon lo mdiow, dzigo laa dzeb co tsonie guic to. 26 Goḻguieṉ gaṉle, Dios psaṉ guidzliu, scagaa grëtaa ncuaaṉe no low cheṉ me naca.

27 Zeeṉe teḻ zha tsiegaa to tib wagw lidz tib zha ne gard gliladz Jesús, bëël ne gneedztaa zho goḻgowa, per scaque gnabdiidzde to dieṉ zha naca; zeeṉa peet dzeb tsonied zdoo to. 28 Per teḻne grieequia tib zha ne gnë bëël ne biogon lo mdiow, gowde tow; zeeṉa csaṉde to zdoo zho. 29 Niicle ne ndioṉpaa ne led doḻd ga guṉ to gow tow, per zha ne gaṉa ga sadoḻ zdoo zho.

Nana gnë to: “¿Pe nac dzigo por stib zho grieelod guṉ naa miṉe racladz naa? 30 Teḻ rded naa xquizh lo Dios zeeṉe pe tib guieḻwagw ne rquiin naa, ¿pe nac dzigo por miṉe rzacse stib zho, grieelod gow naaw?” 31 Goḻguieṉ gaṉle, racda por zha cose; sac grëse ncuaaṉe dziuuṉ ne, haxta ncuaaṉe dioow new, ncuaaṉe dio new, none zeeṉe nodziuuṉ new cxobneṉ ne gaṉle pa lotaa meṉ nroob nac Dios. 32 Gotsaa guieṉ ne sca gaṉle dziuuṉd ne ncuaaṉe yquiaaqui csaṉ ne zdoo stib miech, zigtaa zha Israela, zha stib guiedza, zha ne nolegaa xnëz Diosa. 33 Teḻ naa, zanaḻd naa ncuaaṉe gdziladz naa naase, sinque rioxco naa grëtaa ncuaaṉe ruṉ naa, ruṉ naaw par gacnie naa grëse miech, zeeṉa grieelo tso guic zho gnab zho lo Dios csilaa me zho lo xtoḻ zho.