1 Grë miṉe rnabey ley ruṉ pxoz, lega nacsew zig tib zhimlë grëtaa miṉe beeṉ Jesús por ne. Horco niicle gzobse iz rienie grë miech co gon zigne rnabey ley, per brieeloda nsaṉmbew zho lo doḻ. 2 Teḻ niaca miṉe gon cose nsaṉmbe zho, dzigo tibtaa vuelt ne niesaṉ zhow lëë niaaṉmbele zho ga; niicle zhagaaw, nieṉpaa zho ne laa zho mbele. 3 Per na, gzobse iz zeeṉe laa zho riesaṉ gon co rsoladz zho ne bii no zho lo doḻ, 4 sac goṉ, grieelod ne xchense ngon yeeṉ, xchense chiv yeeṉ guiaaṉmbe miech lo doḻ.

5 Miṉcocxe waa, zeeṉe laa Jesús biaad lo guidzliu, pe led znu rëb me lo Dios:

8 Gotsaa gwi ne gaṉle, blozhse rëb me racladzdraa Dios tso zho pe ncuaaṉe tsielogon zho lo me, tso zho cxiee zho xchen ma, gzëëg zho ma par guiaaṉmbe zho (niicle ne lo ley sca rnabey guṉ zho); 9 dzigo rëb me: “Dios, laa naa ziaḻ nu zeeṉa guṉ naa miṉe gnabeytaa luu.” Gase nagoṉ rlu ptiche me diidz ne psaṉ Dios ga glo, laa stib diidz cub ne biaaṉnie Dios miech ga psilo noquiin. 10 Ni nligaa beeṉ me miṉe bnabey Dios, bdeed me me gut me lo cruz; ne sca nagoṉ beeṉ me miṉe bnabey Dios, ga psaṉmbe me ne lo doḻ. Tibaque vuelt sca goc me gon co, ni lëë psaṉmbele me ne ga.

11 Grë pxoz, gzobse dze rio zho leṉ yadoo rdziib zho grë gon ne riesaṉ miech; blactaa iz tibaque sca nodziib zho grë gon co, per brieeloda nsaṉmbew miech lo doḻ; 12 saṉgue Jesús goṉ, tibaque vuelt bzhiee xchen me goc me gon psaṉmbe me miech lo doḻ. Laa niina, cue Dios nëz derech ga zob me, 13 quiambëz me gdziṉ dze zeeṉe grëse zha ne rlëë raṉ me, laa zho guiaaṉwin lo me. 14 Tibaque gon ne bdeed me ga, psaṉmbegazh me grëse zha ne nodziṉnie me lo Dios. 15-16 Ni nligaa scaw, haxta Espíritu Sant, zeeṉe blozh bzeet me zha rëb Dios guiaaṉnie me zha Israel diidz stib, zha nis nis gacnaṉ zho xley Dios, zig nac zeeṉe haxta leṉ zdoo zho, haxta leṉ guic zho zhobneew; 17 dzigo bzeet me zeeṉe znu rëb Dios: “Teḻ pe nactaa xquieḻntseeb zho, teḻ pe nactaa xtoḻ zho, gdziṉdraa dze ne csoladz naaw.”

18 Goḻgotsaa gwi ne sca gaṉle, rsoladzdraa Dios xtoḻ ne sac laa Jesús bdiizhlew; gacxe waa, nodraa dzio ne dieṉ pe gon ne gdeed ne par csaṉmbe me ne.

19 Bets, bzian, glo loxaque meṉ ne nacse pxoz nroob rzëëb leṉ yadoo zaatne Ndadoo ga; saṉgue niina, haxta zaatne Ndadoo leṉ yadoo gbaa zrieelo gdziṉ ne, sac xquizh xquieḻnzaac Jesús, bdeed me me bzhiee xchen me psaṉmbe me ne. 20 Zeeṉe sca gut Jesús, rrieequia tib nëz cub ga pxal me par gdziṉ ne zaatne ygaa ne guieḻmban; lëë nëz co ga bzhial zeeṉe sca briez lar ne quia leṉ yadoo ga. 21 Ni ne me nac zhipxoz nroob ne no me yadoo gbaa, 22 niinasi zacle gdziṉ ne haxta lo Dios. Nana sca, dib zdoo ne goḻgotsaa gbig ne lo Dios, dib zdoo ne goḻgotsaa gnalo ne me, beṉque laa me psaṉmbele ne lo grëtaa ncuaaṉe yozh ne rza zdoo ne, rza guic ne; rrieequia bgaz me ne tib nis mbe. 23 Tiblique sca goḻgotsaa gac ne, beṉque ndioṉ ne gaṉle ible zdziṉ dze ne gac miṉe rliladz ne; sac Dios psaṉ diidz co, ni ndioṉ ne rquidied me.

24 Goḻgotsaa dzioxco ne cseedlsa ne gleynie ne zha ne nacgrë ne, ni dziuuṉ ne ncuaaṉe yquiin lo ne grë ne. 25 Dze ne nacle diidz ycaalsa ne dziooḻnie ne Dios, ible none ycaalsa ne grëse ne, guionaḻd ne miṉe ruṉ grë zha ne rzozit. None cso ne diidz lo grë zha ne nacgrë ne, conley ne zdoo zho dziits so zho lo miṉe rliladz ne; xco co none dzio ne niina ne laa dze ne guiaad Jesús ziaadgaxle.

26 Zha ne beeṉbeyle zha nac diidzli, ni lozh ga xtsiinpaa guṉctal zho xtoḻ zho, tsodraa gon ne csaṉmbe zho lo doḻ co; 27 lëëtaa miṉe tsieguiaḻ zho nac guieḻnëdox ne ygaa zho zeeṉe laa Dios guṉ guieḻwxtis; dze co laa me cxeeḻ zho lo guidox, zaatne nitlo grëraa zha ntseeb ne gocndaan lo me. 28 Gotsaa gwi ne gaṉle, niicxe ley ne na pcaania Moisés padzeela ga, zha ne rguiits miṉe rnabeya, ni teḻ no chop tsoṉ zha ne goṉ ne nliw, niicle mazdraa mban rac zho ib rdedlaad zho rut zho zho. 29 Nana, ¿pe leḻgue zha ne dzigo quiits miṉe rnabey Jesús? Mazdraa goṉ nac guieḻnë ne ygaa zho, sac noguitnie zho xchen Jesús ga, rzhidznie zho Espíritu Sant ga sca guṉ zho. Noguitnie zho ren co, ni lëëw bzhiee biaaṉmbe zho lo doḻ, lëëw bzhiee zeeṉe psaṉ Dios stib xtiidz me zha gbig miech lo me; rzhidznie zho Espíritu Sant, ni meṉ co no zhixco zho. 30 Zha ne sca guṉ, ible nroob guieḻnë ne ygaa zho; sac ndioṉ ne gaṉle zha nac xDios ne, me znu rnee: “Naa raguiaḻ guṉ guieḻwxtis; naa gded miṉe rieguiaḻ tib tib miech.” Ni zhobneeque lo Xtiidz me: “Grëse miech, lo me cueero zho grë ncuaaṉe beeṉ zho.” 31 ¡Ne nligaa ncuaaṉe gdzieb ne ted grë zha ntseeb ne sca guiab ladznia Dios, meṉ nguiamban!

32 Saṉgue to, goḻsoladz gaṉle zha bded to zeeṉe griiṉpaa psilo bnalo to Jesús, niicle ne scataa nroob guieḻnë ne goṉ to, per beeṉctalde to xtoḻ to. 33 Blactaa bdziitnie miech to, squi ndxie zha ne nowi laa zho nosacsi to; ni blactagaa goṉ to nosacsi zho zha ne nacgrë to. 34 Grë zha ne biab ladzguiib, mbanse rac zdoo to raṉ to zha rac zho; niicle zeeṉe biaad zha ne biaadla grë ncuaaṉe naccheṉ to, psaan to ptiche zhow, peet güeyniedaque guic to; sac naṉle to mazdraa nac guieḻnzaac ne ygaa to gbaa, ni miṉcosi gdziṉd dze ne nitlow. 35 Nana sca, scaque dziits goḻso; sac teḻne tibaque gnalo to Dios, ible zgaa to guieḻnzaac ne gneedz me. 36 Ible guiaaṉd zdoo to, tibaque dziits goḻso goḻguṉ miṉe rnabey me; zeeṉa ygaa to grë ncuaaṉe bneele me gneedz me lo to. 37 Goḻsoladz gaṉle, znu zhobnee lo Xtiidz me:

39 Saṉgue ne goṉ, nozozite ne lo Dios, sinque dib zdoo ne rnalo ne me. Grë zha ne sca rzozit lo me, nëz ne nitlo zho ga zie zho; laa ne goṉ, ible zgaa ne tib guieḻmban ne gdziṉd dze lozh, sacne znu dib zdoo ne rnalo ne me.