1 Dios, nacuʼ Dios quiaʼ, ateʼ idú ládxaʼa ruguiljaʼ Liʼ.

Ribidxi ládxaʼa Liʼ, ateʼ idútë le nacaʼ rizë́ ladxiʼ Liʼ.

Zoaʼ tu luyú bidxi ga ni rudú ládxaʼa, ateʼ bitiʼ bi dë nisa.

2 Ben ga iléʼedaʼ Liʼ lu lataj ga naʼ zoa cazuʼ,

para iléʼedaʼ yöl-laʼ huáca quiuʼ, en yöl-laʼ beníʼ quiuʼ.

3 Tuʼ nácatërö dxiʼa yöl-laʼ dxiʼi ladxiʼ quiuʼ ca yöl-laʼ naʼbán caz.

Que lë ni naʼ cuʼa Liʼ yöl-laʼ ba.

4 Guíaʼ Liʼ: “Xclenuʼ” tsanni ni zoaʼ nabanaʼ.

Uchisaʼ naʼa, en ulidzaʼ Loʼ.

5 Ruhuölaj rudzéʼe icja ládxiʼdaʼahuaʼ le nácatërö dxiʼa,

ateʼ lu yöl-laʼ rudzeja quiaʼ riguʼa Liʼ yöl-laʼ ba.

6 Röjnedaʼ Liʼ cateʼ déaʼ lu le rátiʼdaʼ.

7 Rizáʼ ládxaʼa ca nacuʼ cateʼ rinaʼsaʼ yëla.

Rácalen cazuʼ nedaʼ,

en tuʼ run chiʼu nedaʼ, lu yöl-laʼ rudzeja quiaʼ rul-laʼ quiuʼ.

8 Nazö́n cazuʼ Liʼ böʼ naca cazaʼ.

Rizö́n cazuʼ Liʼ nedaʼ,

9 pero ilaʼyaza lataj chul-la

nupa të́ʼëni iluti nedaʼ.

10 Ilátigaca lu guíë tuchiʼ.

Ilágugaca böʼcuʼ zugaʼ léguequi.

11 Nu rinná bëʼ uláz queëʼ Xanruʼ udzeja ladxiʼ lahuëʼ Dios.

Uluʼzíʼ xibé yúguʼtë nupa tuʼzxöni ladxiʼ Lëʼ,

tuʼ usayaj cazëʼ Lëʼ ruíʼigaca nupa taʼzíʼ yëʼ.