104
1 ¡Guluʼë yöl-laʼ ba Xanruʼ, liʼ, böʼ naca cazaʼ!
¡Nayë́pisëtëruʼ Liʼ, Xanaʼ Dios!
¡Zxoʼ nacuʼ naca yöl-laʼ zxön, en yöl-laʼ ba!
2 ¡Nusubagaʼ cuinuʼ beníʼ ca zxoʼ nacu cazuʼ,
ateʼ naguixaj cazuʼ lúzxiba ca tu lariʼ zxön!
3 Naguixjuʼ xilataj lidxuʼ lahui nisa dë xitsáʼalö.
Dxía cazuʼ lu böaj ca tu lu carreta, en ridóʼ lu böʼös.
4 Rugunuʼ dxin böʼ raca ca tu gubáz quiuʼ,
encaʼ yuguʼ guíʼ ca huen dxin quiuʼ.
5 Nuzúʼ tsutsu luyú ni lu xilibi,
en bitiʼ caʼ gaca nu utsáʼ xilataj.
6 Gudixjuʼ nisa zxön luyú ni ca tu lariʼ nabagaʼ le,
ateʼ yöjbagaʼ nísadoʼ naʼ yuguʼ guíʼa.
7 Buzenuʼ le bach nisa naʼ, ateʼ burúaj,
en cateʼ biyö́n chiʼu, bayúdx buzxunnaj nisa naʼ.
8 Gurén yuguʼ lu guíʼa, en bötaj ga naca raʼ yegu,
ga bidxintë yöjsóa ga nupóʼo que nisa naʼ.
9 Gudixjuʼ buzáʼ que nísadoʼ ga bitiʼ gaca tödi.
Bítiʼrö caz tseajbagaʼ nisa naʼ luyú bidxi.
10 Runuʼ ga ralaj beaj yuguʼ lëʼe guíʼadoʼ,
encaʼ ga taʼdödi yegu ga rö́ʼögaca rögaʼ.
11 Yudzu yuguʼ yegu naʼ nisa të́ʼajbaʼ böaʼ guixiʼ,
le rugúa yöl-laʼ ribídx quégacabaʼ burro taʼdásibaʼ laʼ guixiʼ.
12 Yuguʼ raʼ yegu rö́ʼögaca yaga ga tuʼdxíabaʼ biguínnidoʼ xcáʼagacabaʼ,
en túl-labaʼ yuguʼ lu niʼa në́ʼeguequi.
13 Rigúʼu nisa guiö́j quiuʼ yuguʼ lu guíʼa,
en runuʼ ga tuʼhuöla tuʼdzéʼe yuguʼ le dzöʼö luyú.
14 Runuʼ ga rizxö́n yö le tágubaʼ böaʼ bëdx,
en yuguʼ cuan guixiʼ tuʼgún dxin bönachi,
le ilagu niʼa que le nudóʼo luyú,
15 en xisi uva le run ga tudzeja ládxiʼguequi,
en za olivo le taʼgúʼu láhuiguequi lu yöl-laʼ ruzíʼ xibé quéguequi,
en yöta le nabániguequi.
16 Tuʼzíʼ xibé nisa guiö́j yaga cedro dzöʼö lu guíʼa Líbano,
yuguʼ yaga naʼ budóʼo, Xantuʼ.
17 Niʼ tuʼdxiabaʼ biguínni xcáʼagacabaʼ,
ateʼ tunbaʼ biyúz lídxigacabaʼ niʼ.
18 Nunuʼ Liʼ yuguʼ guíʼa sibi ga dzö́ʼöbaʼ bdxinaʼ guixiʼ,
encaʼ yuguʼ zxan bulóaj gapa tapa chiʼi cuíngacabaʼ bizxidxuʼ.
19 Benuʼ beoʼ le naca bëʼ yuguʼ beoʼ que iz,
ateʼ ribía gubidza ga ral-laʼ cuía.
20 Benuʼ chiʼi dzö́ʼölö, en cateʼ naca chul-la
taʼrúajbaʼ taʼdabaʼ böaʼ guixiʼ.
21 Taʼbö́dxiʼabaʼ bëdxi guíxiʼdoʼ, taʼzóa réguʼbaʼ le ilaʼzönbaʼ.
Tuʼguílajbaʼ le nuzóëʼ Dios ilágubaʼ.
22 Cateʼ rilén gubidza tuʼdxinbaʼ lídxigacabaʼ,
en röjö́xagacabaʼ yuguʼ lu zxan bulóaj quégacabaʼ.
23 Níʼirö taʼrúaj bönachi söjaca huen dxin,
en tun caz dxin ga ridxintë ribía gubidza.
24 Xan, ziántërö yuguʼ le nunuʼ Liʼ.
Len yöl-laʼ réajniʼi zxön quiuʼ nunuʼ yúguʼtë.
Nalí luyú yödzölió ni yuguʼ le dxiʼa nunuʼ.
25 Niʼ zoa nisa nácatërö zxön,
ga naʼ nacuáʼabaʼ böaʼ guizxi yu,
böaʼ cuidiʼ, encaʼ böaʼ zxön.
26 Niʼ taʼdödi barco zxön,
encaʼ böaʼ zxön lëbaʼ leviatán, böaʼ naʼ nuzóa cazuʼ.
27 Yúguʼtëbaʼ taʼbö́zabaʼ Liʼ,
cateʼ idxinrö ugaguʼ légacabaʼ.
28 Rugaguʼ légacabaʼ, ateʼ tágubaʼ.
Runödzjuʼ le ilágubaʼ, ateʼ tuʼhuö́laj taʼdzéʼebaʼ.
29 Cateʼ ruhuecjuʼ quiuʼ, tádxibaʼ,
en cateʼ ruziʼu böʼ quiuʼ, tátibaʼ,
en ruhuöáca yu le néquinigacabaʼ.
30 Cateʼ rigúʼu légacabaʼ böʼ, nabángacabaʼ.
Rucubuʼ yúguʼtë le nacuáʼ yödzölió.
31 ¡Ral-laʼ gácaticaʼsö yöl-laʼ ba queëʼ Xanruʼ!
¡Ral-laʼ ilaʼyaza ládxiʼticaʼsö bönachi le nun cazëʼ Lëʼ!
32 Ruyúëʼ Xanruʼ luyú, ateʼ rizxizi.
Riganëʼ yuguʼ guíʼa, ateʼ rirúaj dzön.
33 ¡Gul-laʼ queëʼ Xanruʼ yúguʼtë dza soaʼ ibanaʼ!
¡Gul-laʼ yöl-laʼ ba queëʼ Dios tsanni ni zoaʼ nabanaʼ!
34 ¡Zxixi naca le rizáʼ ládxaʼa ca naca queëʼ!
¡Udzéjalendaʼ-nëʼ Xanruʼ!
35 Ilaʼnítiëʼ bönniʼ dul-laʼ nacuʼë yödzölió ni,
en bítiʼrö ilaʼcuáʼ nupa tuáʼ döʼ.
¡Gulúʼu yöl-laʼ ba Xanruʼ, liʼ, böʼ naca cazaʼ!
¡Yöl-laʼ ba Lëʼ Xanruʼ!