1 Pablɨ bguiaab lo de gurtisy, ax raipbɨ laadeb:

—De saa bniety Israelnɨ, iduibte ni nabánia, ne axt hórandxire xíteete rziientia nez lo Dios te pur nare nánna xa nabánia.

2 Chiy Ananías, bxoz ni rnabee lo de bxoz, gunabeeb de ni zuguaa gax cuee Pablɨ par capdeb ruub. 3 Per Pablɨ cuaibbɨ lo bxozqui:

—¡Ziyza cap Dios ruu, bɨndixú! ¿Ta gati zubu ruc par gúnu guelgurtisy zec ni rnabee ley? Ne, ¿xínii runu zec ni quɨt ná ley, rnabiiu capdeb ruua?

4 Chiy de bniety ni zuguaa ruy raipdeb laab:

—¿Ta zeec xquel rsacloo bxozroo xte Dios?

5 Chiyru gunii Pablɨ:

—Gulgaanyguibtɨ dispens, quɨt gucbeetia dec bxoz ni rnabee lo de bxoz laab. Lo xquiits Dios rnii: “Quɨt isaclotiu ni rnabee ladxu.”

6 Chi gucbee Pablɨ dec duudxdeb ná saduceu chiy stuudxdeb ná fariseu, ax aguniib diip:

—Nare fariseu naa, lliin bniety fariseu nare. Ax pur reldilaaza ni ibíi ibány de bɨnguty, ningui cayun de bniety contrɨ nare.

7 Deni guniib ziy, guzulo cachaagac de fariseu cun de saduceu lo diidx, ax gucdeb tiop cuaa. 8 Te pur de saduceu quɨt reldilaaztideb ni ibíi ibány de bɨnguty niclɨza quɨt reldilaaztideb nuu de ánglɨ ne de spírit, per de fariseu ax reldilaazdeb irate de ziy. 9 Parzi tuby guelryai guc ruy. Chiyru güesuldí tuby tiop de maistrɨ ni nán ley, laadeb ni názadeb fariseu, ax guniideb:

—Bnietré xíteete malti baanbɨ. Tal belati tuby spírit o tuby ánglɨ guniné laab, te quɨt idxanzacnɨ contrɨ Dios.

10 Chi guná comandant dec amastecru zélaa guelryaiqui, ax bdxibbɨ nillulldeb Pablɨ. Chiyru gunabeeb gueed de suldad par cuéedeb Pablɨ ruy ax chanédeb laab láani cuartel stuby.

11 Chi biiu guxin stuby, bliulo Jesucrist lo Pablɨ, raipny Pablɨ:

—Guzaclaazu, Pablɨ, te zec ni guniiu pur nare láani guɨdx Jerusalénquɨ, ziyza iniiu pur nare láani guɨdx Roma.

12 Chi bragueel, duudx de bniety Israel bdxadiidxdeb par quinxúdeb Pablɨ, ne guniideb dec quɨt xi iquiintideb niclɨza quɨt xi guéetideb axtisy quinxúdeb laab. 13 Más de cuarent ná ni gunii ziy. 14 Chiy güeninédeb de bxoz ni rnabee lo de bxoz ne de bɨngul xte de bniety Israel, raipdeb laadeb:

—Dunnɨ abniin dec quɨt xi iquiintin axtisy chi abdinxún Pablɨ. 15 Anre laaguibtɨ cun irateru de gurtisy, gulnaabguibtɨ lo comandant guednéb laab illí nez loguibtɨ, digaizy gulniiguibtɨ dec par gacbezaacguibtɨ xáy ná xcuendbɨ. Chiy dunnɨ aizuguaan altant par idinxúnbɨ anste ni idzɨnbɨ ruc.

16 Per llingaan bzaan Pablɨ bindiagllɨ caniideb ziy, ax güell láani cuartel güetixteell lo Pablɨ. 17 Chiyru gurɨdx Pablɨ tuby de capitán, raipbɨ laab:

—Güenelaa bniinré lo comandant te gaipllɨ laab tuby rson.

18 Capitánqui güenéb bniinqui lo comandant, raipbɨ laab:

—Pablɨ ni niaagu gurɨdx nare, chiy gunaabbɨ luaa guednía bniinré nez lobiu te iniill laabiu tuby rson.

19 Comandantqui gunaazbɨ naa bniinqui, güenéb laall tuby lad, gunabdiidxbɨ laall:

—¿Xi rcaazu iniiu nare?

20 Chiy raipy bniinqui laab:

—De bniety Israel abdxadiidxdeb par inaabdeb laabiu illí chanébiu Pablɨ lo de gurtisy, digaizy iniideb dec rcaazdeb gacbezaacdeb xapacquɨy ná xcuendbɨ. 21 Per quɨt chaldilaaztibiudeb, te pur más de cuarent de bɨnqui icanuu xgaats lo nez, ne aguniideb quɨt xi iquiintideb niclɨza quɨt xi guéetideb axtisy quinxúdeb Pablɨ. Anre altant zuguaadeb xi iniibiu.

22 Chiyru raipy comandant bniinqui:

—Quegüe. Ne quɨt tu chagaiptiu ni guniiu nare.

23 Ax gurɨdx comandantqui tiop de capitán xtenbɨ, chiy gunabeeb laadeb ichasaadeb tiop gayuaa suldad ni chia niini, cun setent de suldad ni cueeb cabay ne tiop gayuaa suldad ni icáa lanz par chiadeb Cesarea rca gaa guxin. 24 Ne gunabeezacbɨ laadeb guednédeb cabay cueeb Pablɨ, chiy raipbɨ laadeb icualodeb Pablɨ te idzɨnzaacbɨ lo gobernador Félix. 25 Ax cun laadeb bxiaaldbɨ tuby cart ni rnii:

26 “Nare Claudio Lisias, rguaapadios laabiu gobernador Félix, laabiu ni napbiu guroo guelrnabee. 27 De bniety Israel gunaazdeb bniety nguiuré aniguinxúdeb laab, per chi gucbiia dec bniety Roma laab, chiy guaa cun de suldad xtena güedzɨcaab lodeb. 28 Ne cun rcaaza gacbiia xi runbɨ ningui rdxichnédeb laab, ax bdzɨɨab lo de gurtisy Israel. 29 Chiy gucbiia dec pur de cos xte xleydeb ningui rdxichnédeb laab, per quɨt nátiy ni riáld gatybɨ niclɨza par chúub láani lizguiib. 30 Per cun agucbiia dec xgab de bniety Israel ná quinxúdeb laab, ax caxiaaldab lobiu. Ne araipia de ni rdxichné laab dec cun laabiu gúndeb arreglad xiy rzacnédeb laab. Niy ná ni rguixtiia lobiu.”

31 Chi biiu guxin zec ni gunabee comandantqui de suldad, zénegacdeb Pablɨ par guɨdx Antípatris. 32 Chi bragueel de suldad ni zé niini biecquideb láani cuartel, chiy de ni beeb cabay zéne Pablɨ Cesarea. 33 Chi bdzɨndeb Cesarea, bdeeddeb cart xte comandant gobernador ne baandeb entriagu Pablɨ lob. 34 Chi gulull biildy gobernador lo cartqui, gunabdiidxbɨ Pablɨ calí záb. Chiy chi gucbeeb dec Cilicia záb, 35 ax araipbɨ laab:

—Chi gueed de ni cayun contrɨ liú, chiy icuadiaga ni iniiu.

Ax gunabeeb icualodeb Pablɨ láani palacy xte Herodes.